Makar Sankranti 2022: గతేడాది ఎలా చేశారో తెలియదు కానీ… ఈ సంక్రాంతికి ఇలా చేయండి

హిందువులకు మకర సంక్రాంతి చాలా ప్రత్యేకం. దేశవ్యాప్తంగా సందడి ఉన్నా తెలుగు రాష్ట్రాల్లో అంతకు మించి అనిపిస్తుంది. సూర్యుడు దిశను మార్చుకునే ఈ పవిత్రమైన రోజున కొత్తగా ఉండాలంటే కొత్తగా ఆలోచించాల్సిందే

Sankranthi 2022

సంక్రాంతి అంటేనే భోగి మంటలు, రంగు ముగ్గులు, గొబ్బిళ్లు, పిండివంటలు, కోడి పందాలు, పతంగులు, కొత్త అల్లుళ్లు, ఇల్లంతా బంధువులు... ఒకటా రెండా..సంక్రాంతి గురించి చెప్పుకుంటూ పోతే చేంతాడంత ఉంది. అయితే అంతా కలసి ఆనందంగా గడిపే క్షణాలను మరింత ఆనందంగా మార్చుకునేందుకు చిన్న చిన్న పనులు చేయమంటున్నారు పండితులు. 

నదీస్నానం
మకర సంక్రాంతి రోజున గలగలపారే నీటిలో స్నానం చేయడం చాలామంచిదంటారు. దేశంలో వివిధ ప్రాంతాల ప్రజలు ఈరోజు గంగా నదిలో కానీ, తమకు సమీపంలో ఉన్న నదిలో కానీ స్నానం చేస్తారు. అవకాశం లేనివారు గతంలో నదీస్నానానికి వెళ్లినప్పుడు బాటిల్స్ లో తీసుకొచ్చిన నీటిని ట్యాంక్ లో మిక్స్ చేసి చేసినా కొంత ఫలితం ఉంటుందని చెబుతారు. 

సూర్యుడికి నమస్కారం చేయండి
ఉరకల పరుగల జీవితంలో ఎప్పుడు నిద్రపోతున్నామో, ఎప్పుడు లేస్తున్నామో ( అందరూ కాదు) పట్టించుకోవడం లేదు.  కనీసం సంక్రాంతి రోజైనా సూర్యోదయానికి ముందు నిద్రలేచి స్నానం చేసి సూర్యుడికి అర్ఘ్యం( దోసిలితో నీరు) అర్పించండి.  మకర రాశిలోకి ప్రవేశించిన సూర్య భగవానుని ఆరాధించడం వల్ల ఇప్పటి వరకూ జీవితంలో ముసురుకున్న చీకట్లు మాయమై వెలుగులు విరజిమ్ముతాయని విశ్వాసం. ఈ రోజు సాయంత్రం ( సంధ్యా సమయంలో) ఏమీ తినొద్దు. 

దానం చేయండి..
మకర సంక్రాంతి రోజున దాతృత్వానికి ప్రత్యేక ప్రాముఖ్యత ఉంది. ఈ రోజున పేదలకు వస్త్రదానం చేయండి, ఇంటింటా సందడి చేసే డూడూ బసవన్నకి ఆహారం అందించండి. పల్లెటూర్లలో ఉండేవారు మీకు సమీపంలో ఉన్న పశువుల పాకకు వెళ్లి వాటికి ఆహారం అందించి నమస్కరించి రండి.ముఖ్యంగా ఈ రోజు నల్లనువ్వులు దానం చేయడం చాలా మంచిదంటారు. 

పిండి వంటలు పంచుకోండి
సంక్రాంతికి దాదాపు పది రోజుల ముందు నుంచీ పిండివంటలు ఘుమఘుమలాడిపోతుంటాయి. ఏ ఇంట చూసినా  పిండి వంటలు తయారీనే. కొందరు పండుగ రోజు నువ్వులు తినడం ఏంటనే సెంటిమెంట్ తో ఉంటారు కానీ చాలా ప్రాంతాల్లో నువ్వులతో చేసిన వంటలను సంక్రాంతికి ఆస్వాదిస్తారు. లడ్డు, ఖిచ్డి తయారు చేసి పంపిణీ చేస్తారు. ఇన్ని చేసుకున్నాం, అన్ని చేసుకున్నాం అని చెప్పుకోవడం కాదు..సరదాగా చుట్టుపక్కల వారితో మీరు చేసినం వంటకాలు పంచుకోండి

అన్నమో రామచంద్రా అనేవారి ఆకలి తీర్చండి
తెల్లవారు జామున నిద్రలేచిన మొదలు నిద్రపోయే వరకూ టైమ్ చూసుకునే టైమ్ లేకుండా పండుగ రోజు గడిపేస్తారు. అయితే మధ్యాహ్నం భోజనం చేసిన తర్వాత ఆభుక్తాయాసం తీర్చుకునేందుకు మీరున్న ప్రాంతాన్ని ఓసారి చుట్టేసి రండి. ఎక్కడైనా ఎవరైనా ఆకలితో ఉంటే ఆ రోజు వారికి మీకు తోచిన సాయం చేయండి. దేవుడు ఎక్కడో ఉండడు..మనం చేసే సాయం లోనూ, ఆకలితో ఉండేవారికి పెట్టే అన్నంలోనే ఉంటాడంటారు కదా..అందుకే పండుగ రోజు మనం పది రకాల వంటకాలతో భోజనం చేయడం కాదు.. పస్తులున్న వారి కడుపునింపండి...

ఈ సంక్రాంతి మీ అందరి జీవితాల్లో సుఖసంతోషాలను నింపాలని ఆశిస్తోంది మీ ఏబీపీ దేశం....

Also Read: సంక్రాంతికి శ్రీశైలం మల్లన్న కల్యాణం, భక్తులకు ఈ నిబంధనలు తప్పనిసరి...
Also Read: అడుగు అడుగులోనూ తన్మయత్వమే.. జీవితంలో ఒక్కసారైనా ఈ వనయాత్ర చేస్తే చాలంటారు..

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి