Telangana municipal elections 2026: ఉత్తర తెలంగాణలో కాంగ్రెస్ వర్సెస్ బీజేపీ - పుంజుకునేందుకు ప్రయత్నిస్తున్న గులాబీ దళం
Municipal elections 2026: తెలంగాణ మున్సిపల్ ఎన్నికల రాజకీయ సమీకరణాలు వేగంగా మారుతున్నాయి. ఉత్తర తెలంగాణలో బీజేపీ వర్సెస్ కాంగ్రెస్ మధ్యే ప్రధాన పోటీ కనిపిస్తోంది.
BJP vs Congress in North Telangana: ఉత్తర తెలంగాణలోని అదిలాబాద్, నిజామాబాద్, కరీంనగర్ వంటి ఉమ్మడి జిల్లాల్లో మున్సిపల్ ఎన్నికల ప్రచారం పతాక స్థాయికి చేరింది. గత అసెంబ్లీ , పార్లమెంట్ ఎన్నికల ఫలితాలను బట్టి చూస్తే, ఈ ప్రాంతంలో బీజేపీ బలంగా పుంజుకోగా, అధికార కాంగ్రెస్ తన పట్టును నిలబెట్టుకునే ప్రయత్నం చేస్తోంది. అయితే, గత దశాబ్ద కాలంగా ఈ ప్రాంతంలో తిరుగులేని శక్తిగా ఉన్న బీఆర్ఎస్ ఇప్పుడు తీవ్రమైన నైరాశ్యంలో కనిపిస్తోంది. క్షేత్రస్థాయిలో ద్వితీయ శ్రేణి నాయకత్వం ఇతర పార్టీల వైపు మొగ్గు చూపుతుండటం, కేసీఆర్ వంటి అగ్రనేతలు మున్సిపల్ ఎన్నికలపై పెద్దగా దృష్టి సారించకపోవడం వల్ల గులాబీ దళం డీలా పడినట్లు భావిస్తున్నారు.
ఉత్తర తెలంగాణలో గెలుపు పార్టీలకు కీలకం
ఉత్తర తెలంగాణలోని ప్రధాన పట్టణాలు ఇప్పుడు ఎన్నికల రణక్షేత్రాలుగా మారాయి. ఈసారి ఎన్నికలు జరుగుతున్న మొత్తం 7 మున్సిపల్ కార్పొరేషన్లలో 5 కార్పొరేషన్లు కరీంనగర్, రామగుండం, నిజామాబాద్, మంచిర్యాల, కొత్తగూడెం ఈ ప్రాంతానికే చెందినవి కావడం విశేషం. వీటితో పాటు ఉమ్మడి అదిలాబాద్, నిజామాబాద్, కరీంనగర్ జిల్లాల్లో సుమారు 35కు పైగా మున్సిపాలిటీలు ఉన్నాయి. ఈ పట్టణాల్లో పట్టు సాధించడం ద్వారా రానున్న అసెంబ్లీ ఎన్నికలకు పునాది వేసుకోవాలని అటు కాంగ్రెస్, ఇటు బీజేపీ పావులు కదుపుతున్నాయి.
స్వయంగా రంగంలోకి దిగిన రేవంత్ రెడ్డి
ముఖ్యమంత్రి రేవంత్ రెడ్డి ఉత్తర తెలంగాణపై ప్రత్యేక దృష్టి సారించి, కీలక మంత్రులకు బాధ్యతలు అప్పగించారు. నిజామాబాద్ జిల్లా ఇన్‌ఛార్జ్‌గా మంత్రి ఉత్తమ్ కుమార్ రెడ్డి, వరంగల్ బాధ్యతలను మంత్రి పొంగులేటి శ్రీనివాస్ రెడ్డి పర్యవేక్షిస్తున్నారు. ప్రభుత్వ సంక్షేమ పథకాలను ప్రజల్లోకి తీసుకెళ్లడం ద్వారా మున్సిపాలిటీలను క్లీన్ స్వీప్ చేయాలని కాంగ్రెస్ యోచిస్తోంది. మరోవైపు, బీజేపీ జాతీయ నాయకత్వం హిందుత్వ కార్డును బలంగా వాడుకుంటోంది. ఎంపీలు బండి సంజయ్ , ధర్మపురి అరవింద్ తమ నియోజకవర్గాల్లోని కార్పొరేషన్లను గెలవడం తమకు ప్రతిష్ఠాత్మకమని భావిస్తూ వార్డుల వారీగా పర్యటిస్తున్నారు. రెండు పార్టీలు హోరాహోరీగా పోరాడుతున్నాయి.
బీఆర్ఎస్ డీలా పడటానికి కారణాలేంటి?
బీఆర్ఎస్ పార్టీలో మునుపటి జోష్ కనిపించడం లేదు. మాజీ మంత్రులు మరియు ఎమ్మెల్యేలు సొంత నియోజకవర్గాలకే పరిమితం కావడం, పార్టీ కార్యకర్తలకు భరోసా ఇచ్చే నాయకత్వం లోపించడం ఆ పార్టీని దెబ్బతీస్తోంది. ముఖ్యంగా నిజామాబాద్, కరీంనగర్ వంటి ప్రాంతాల్లో బీజేపీ, కాంగ్రెస్ మధ్యే ద్విముఖ పోటీ నెలకొంది. కవిత పార్టీని వీడటం బీఆర్ఎస్ కు పెద్ద దెబ్బగా మారింది. చాలా చోట్ల బీఆర్ఎస్ అభ్యర్థులు మూడో స్థానానికి పరిమితమయ్యే ప్రమాదం ఉందని విశ్లేషణలు వస్తున్నాయి. ఫిబ్రవరి 11న జరగనున్న ఈ ఎన్నికలు ఉత్తర తెలంగాణలో ఎవరి బలం ఎంతో తేల్చనున్నాయి. అధికారంలో ఉన్న కాంగ్రెస్ పట్ల పట్టణ ఓటర్లు మొగ్గు చూపుతారా? లేక పార్లమెంట్ ఎన్నికల్లో మెజారిటీ ఇచ్చినట్లుగానే బీజేపీకి పట్టం కడతారా? అన్నది వేచి చూడాలి.
టాప్ హెడ్ లైన్స్
ట్రెండింగ్ వార్తలు
