YSRCP 70 Constituency Incharges Change : 70 నియోజకవర్గాల ఇన్ఛార్జ్ల మార్పుపై జగన్ కసరత్తు.. ఆర్థిక బలవంతులు దొరుకుతారా?
YSRCP Organizational Revamp : 70 మంది నియోజకవర్గ ఇన్ఛార్జ్లను మార్చాలని వైసీపీ అధినేత జగన్ భావిస్తున్నారు. కొత్త నేతలను వెతకడం అధిష్టానానికి పెద్ద సవాల్గా మారబోతోంది.

AP Local Body Elections Impact on YSRCP Leadership: ఆంధ్రప్రదేశ్ ప్రతిపక్ష వైఎస్సార్ కాంగ్రెస్ పార్టీలో మరోసారి భారీ సంస్థాగత ప్రక్షాళన చర్చ తెరపైకి వచ్చింది. ఇటీవల జరిగిన మున్సిపల్, పరిషత్ ఎన్నికల ఫలితాల సమీక్ష, అలాగే ప్రస్తుతం జరుగుతున్న గ్రామ పంచాయతీ ఎన్నికల్లో నేతల పనితీరును అంచనా వేసి రాష్ట్రంలోని సుమారు 60 నుంచి 70 అసెంబ్లీ నియోజకవర్గాల ఇన్ఛార్జ్ల పనితీరు ఆశించిన స్థాయిలో లేదంటూ అధినేత వైఎస్ జగన్ మోహన్ రెడ్డికి అంతర్గత నివేదికలు అందినట్లు తెలుస్తోంది. కేవలం సెల్ఫీ రాజకీయాలకు పరిమితమవుతూ, క్షేత్రస్థాయిలో క్యాడర్కు అండగా నిలబడని నాయకులపై వేటు వేసి, రాబోయే డిసెంబర్ లేదా సంక్రాంతి తర్వాత కొత్త ఇన్ఛార్జ్లను నియమించాలని తాడేపల్లి అధిష్టానం కసరత్తు చేస్తున్నట్లు పార్టీ వర్గాల్లో జోరుగా ప్రచారం జరుగుతోంది.
కొత్త వాళ్లు దొరకడం అంత తేలిక కాదు!
అయితే, ఒక రాజకీయ పార్టీలో పనితీరు బాగోలేని నేతలను మార్చడం సర్వసాధారణ ప్రక్రియ అయినప్పటికీ.. ప్రస్తుత విపక్ష పరిస్థితుల్లో వైసీపీ అధిష్టానానికి ఇదొక కత్తిమీద సాములా మారింది. రాష్ట్రంలో కూటమి ప్రభుత్వం అత్యంత బలంగా ఉన్న ఈ తరుణంలో, నియోజకవర్గ ఇన్ఛార్జ్ బాధ్యతలు తీసుకోవడమంటే కేవలం పదవిని అలంకరించడం కాదు. పార్టీ కార్యక్రమాలకు, ఉద్యమాలకు, కేసుల్లో ఇరుక్కున్న కార్యకర్తలకు సొంత జేబు నుంచే భారీగా ఆర్థిక భారాన్ని భరించాల్సి ఉంటుంది. ఎంతో కష్టం మీద అక్కడక్కడా ఆర్థికంగా బలంగా ఉన్న నాయకులను ఒప్పించి ఇన్ఛార్జ్లుగా నియమించినప్పటికీ, ఇప్పుడు పనితీరు పేరుతో వారిని పక్కన పెడితే.. ఆయా నియోజకవర్గాల్లో ఆ స్థాయి ఆర్థిక బలం ఉన్న కొత్త నాయకులు ముందుకు రావడం దాదాపు అసాధ్యమన్న ఆందోళన పార్టీ ముఖ్యనేతల్లోనే వ్యక్తమవుతోంది.
టీడీపీ నేతలతో కుమ్మక్కయ్యారా?
ఇక్కడే మరో కీలకమైన అంతర్గత కోణం దాగి ఉంది. చాలా నియోజకవర్గాల్లో ఇన్ఛార్జ్లు క్షేత్రస్థాయిలో చురుగ్గా తిరగకపోవడానికి కేవలం వారి నిర్లక్ష్యం మాత్రమే కారణం కాదని, అధికార పార్టీ నేతలతో మ్యాచ్ ఫిక్సింగ్ చేసుకున్నారనే ఆరోపణలతో పాటు, తమ వ్యాపారాలు, ఆస్తులను కాపాడుకోవాలనే భయం కూడా వారిని వెనక్కి లాగుతోందని రాజకీయ విశ్లేషకులు చెబుతున్నారు. పైగా, అధిష్టానం నుంచి ఆశించిన స్థాయిలో ఆర్థిక, నైతిక మద్దతు లభించనప్పుడు సొంత డబ్బులు ఖర్చు పెట్టి రాజకీయం చేయడానికి ద్వితీయ శ్రేణి నేతలు సాహసించడం లేదు. ఇదే సమయంలో స్థానికేతర నేతలను ఇన్ఛార్జ్లుగా నియమించిన చోట్ల క్యాడర్తో సమన్వయం పూర్తిగా దెబ్బతిందనే వాస్తవం తాజా స్థానిక సంస్థల ఎన్నికల్లో బయటపడింది.
జాగ్రత్తగా డీల్ చేయాలి!
ఒకవేళ జగన్ మోహన్ రెడ్డి నిజంగానే 70 మంది ఇన్ఛార్జ్లను మారిస్తే, అది రెండు రకాల ప్రమాదాలకు దారితీసే అవకాశం ఉంది. మొదటిది—పదవి కోల్పోయిన అసంతృప్త నేతలు, ఆర్థిక బలవంతులు అధికార కూటమి వైపు చూసే ప్రమాదం పొంచి ఉంది. రెండోది—కొత్తగా నియమితులయ్యే వారికి పార్టీని నడిపించే ఆర్థిక స్థోమత లేకపోతే, క్షేత్రస్థాయిలో క్యాడర్ మరింత నిర్వీర్యమయ్యే పరిస్థితి ఏర్పడుతుంది. ఇప్పటికే పలువురు కీలక నేతలు పార్టీని వీడిన నేపథ్యంలో, ఇప్పుడు 70 నియోజకవర్గాల్లో మార్పులు చేపడితే అది పార్టీలో కొత్త ఉత్సాహాన్ని నింపుతుందా లేక అంతర్గత కుమ్ములాటలను మరింత పెంచుతుందా అన్నది ఆసక్తికరంగా మారింది. 2029 ఎన్నికలే లక్ష్యంగా పార్టీని క్షేత్రస్థాయి నుంచి ప్రక్షాళన చేయాలన్న జగన్ ఆలోచన ఆచరణలో పెను సవాళ్లను ఎదుర్కొంటోంది. పనితీరు లేని ఇన్ఛార్జ్లను తొలగించాలన్న కఠిన నిర్ణయానికి, సొంత ఖర్చుతో పార్టీని మోసే నాయకుల కొరతకు మధ్య వైసీపీ అధిష్టానం ఏ విధమైన సమతుల్యతను పాటిస్తుందో రాబోయే రోజుల్లో తేలనుంది.
టాప్ హెడ్ లైన్స్
ట్రెండింగ్ వార్తలు





















