Early Signs of Liver Issues : కాలేయ వాపు ప్రధాన లక్షణాలు ఇవే.. నిర్లక్ష్యం చేస్తే ప్రాణాంతకమే

Liver Issues : కాలేయ సమస్యలు చాలా ఆలస్యంగా తెలుస్తాయి. అయితే వాటికంటే ముందు కొన్ని లక్షణాలు కనిపిస్తాయట. అవేంటో చూసేద్దాం.

కాలేయ వాపునకు ప్రధాన లక్షణాలు ఇవే

కడుపు ఉబ్బరం లేదా వాపు కాలేయ వాపునకు ప్రధాన లక్షణం. పడుకున్నప్పుడు కడుపు నిండినట్లు లేదా ఒత్తిడి ఉన్నట్లు అనిపిస్తుంది. ఇది కూడా కాలేయ వాపునకు సంకేతమే. దీనిని చాలామంది గ్యాస్ అనుకుని నిర్లక్ష్యం చేస్తారు. కాబట్టి దీనిని నిర్లక్ష్యం చేయకుండా వైద్య సహాయం తీసుకోవాలంటున్నారు.

కాళ్లల్లో వాపు వస్తుంది. ఉదయం లేచిన తర్వాత కూడా అలాగే ఉంటే.. దానిని నిర్లక్ష్యం చేయడం సరికాదు. ఇది కాలేయం బలహీనంగా ఉందనటానికి, శరీరంలో ద్రవం నిలుపుదలకి సంకేతంగా చెప్తారు.

కాలేయం సరిగ్గా పనిచేయనప్పుడు.. శరీరంలో బిలిరుబిన్ పెరుగుతుంది. దీని కారణంగా కళ్లలోని తెల్లటి భాగం, చర్మం పసుపు రంగులోకి మారుతాయి. మూత్రం రంగు కూడా ముదురు రంగులోకి మారుతుంది. ఇది కామెర్లకు స్పష్టమైన సంకేతం.

ఎంత రెస్ట్ తీసుకున్నా.. త్వరగా అలసిపోవడం, మెదడు మందగించినట్లు అనిపించడం కాలేయ సమస్యకు సంకేతంగా చెప్తారు. దీనిని బ్రెయిన్ ఫాగ్ అని కూడా అంటారు.

కాలేయం తీవ్రంగా ఉన్నప్పుడు పొత్తికడుపులో ద్రవం పేరుకుపోతుంది. దీనివల్ల పడుకున్నప్పుడు శ్వాస తీసుకోవడంలో ఇబ్బందులు వస్తాయి. అసాధారణంగా బరువు పెరుగుతారు.

ఈ లక్షణాలను సకాలంలో గుర్తిస్తే.. వెంటనే వైద్యుడిని సంప్రదించాలి. దీనివల్ల పరిస్థితి విషమించకుండా ఉంటుంది. కాలేయ వ్యాధి నెమ్మదిగా పెరిగి.. తర్వాత ప్రాణాంతకం అవుతుంది. అందుకే సకాలంలో వైద్య సహాయం తీసుకోవాలి.