DIY Tomato Gardening : కుండీలోనే టమోటాలు పెంచేయండిలా.. ఈ సింపుల్ టిప్స్ ఫాలో అయితే చాలు

Grow Tomatoes at Home : ఇంట్లోనే టమోటాలు పెంచాలనుకుంటున్నారా? అయితే ఎలాంటి కెమికల్స్ లేకుండా టెర్రస్, బాల్కనీలో టమోటాలు ఈజీగా పెంచగలిగే టిప్స్ ఇవే.

టమోటాలు ఈజీగా పెంచే టిప్స్ ఇవే

ఈ రోజుల్లో చాలామంది తాజా కూరగాయలను తినడానికి ఇష్టపడుతున్నారు. అలాంటివారు ఇంట్లో టమోటాలు పెంచుకోవచ్చు. వీటిని చాలా సులభంగా కిచెన్ గార్డెన్​లో లేదా కుండీల్లో పెంచుకోవచ్చు. తక్కువ ఖర్చుతో కెమికల్స్ లేకుండా తాజా, టేస్టీ టమోటాలు ఎలా పెంచవచ్చో చూసేద్దాం.

టమోటాలు పెంచడానికి ఎక్కువ స్థలం లేదా పరికరాలు అవసరం లేదు. వాటిని కుండీలలో, గ్రో బ్యాగులలో, బాల్కనీలలో, టెర్రస్‌లపై లేదా పెరట్లో కూడా సులభంగా పెంచవచ్చు.

విత్తనాలను సిద్ధం చేయడానికి.. ఇంట్లో ఇప్పటికే ఉన్న టమోటాలను ఉపయోగించవచ్చు. దీనికోసం పూర్తిగా పండిన, మంచి టమోటాను ఎంచుకోండి. దానిని కోసి.. విత్తనాలను బయటకు తీయండి.

ఈ విత్తనాలను రెండు మూడు రోజుల పాటు కప్పి ఉంచడం వల్ల వాటి పై పొర తొలగిపోయి, మొలకెత్తే సామర్థ్యం పెరుగుతుంది. ఆ తర్వాత, విత్తనాలను కడిగి, నీడలో ఆరబెట్టి, మట్టిలో నాటండి.

టమోటాలు నాటడానికి.. ముందుగా నీరు నిలవని కుండీలో మట్టి, ఆవు పేడ, కొద్దిగా ఇసుక కలిపి నింపండి. ఆ తర్వాత, విత్తనాలను అర అంగుళం నుంచి ఒక అంగుళం లోతులో నాటి.. వాటిని మట్టితో తేలికగా కప్పండి. ప్రతిరోజూ తేలికగా నీరు పోస్తే, 7 నుంచి 8 రోజుల్లో నారుమొక్కలు మొలకెత్తుతాయి.

టమాటా మొక్కలకు ప్రతిరోజూ 5 నుంచి 6 గంటల సూర్యరశ్మి అవసరం. అందువల్ల, వాటిని మంచి సూర్యరశ్మి తగిలే ప్రదేశంలో ఉంచండి. తక్కువ నీరు పెట్టండి. ఎందుకంటే అధిక నీరు వేర్లను దెబ్బతీస్తుంది. మట్టిని మరీ తడిగా కాకుండా.. తేలికపాటి తేమతో ఉంచండి. వారానికి ఒకసారి సేంద్రియ ఎరువు వేయడం మొక్కను బలోపేతం చేస్తుంది.

మొక్క పెరిగేకొద్దీ దానికి ఆధారం అవసరం. దీనికోసం మీరు మీ డాబా లేదా బాల్కనీలో ఒక చెక్క కర్రను లేదా మేకును ఉపయోగించవచ్చు.

సరైన సంరక్షణతో టమాటా మొక్కలు కొన్ని వారాల్లోనే పూత మొదలుపెడతాయి. సుమారు 60 నుంచి 70 రోజుల్లో పక్వానికి వస్తాయి. ఒకే మొక్క చాలా కాలం పాటు టమాటాలను ఇస్తుంది.