Fast Charging Damage on Battery Life : ఫాస్ట్ ఛార్జింగ్ మీ ఫోన్ బ్యాటరీకి శత్రువుగా మారుతుందా? తొందరపాటులో ప్రతి ఒక్కరూ ఈ తప్పు చేస్తున్నారు

Fast Charging : నేటి బిజీ లైఫ్​లో ఫాస్ట్ ఛార్జింగ్ అనేది చాలా ఉపయోగకరమైనదే. కానీ దీనివల్ల బ్యాటరీ లైఫ్​పై ఎఫెక్ట్ పడుతుందని చెప్తున్నారు. దానికారణమేంటో ఇప్పుడు చూసేద్దాం.

ఫాస్ట్ ఛార్జింగ్ చేస్తే ఫోన్లు పాడైపోతాయా

PCMag వెబ్​సైట్ నివేదిక ప్రకారం.. మీరు ఫోన్‌ను ఛార్జ్ చేసిన ప్రతిసారీ.. దాని బ్యాటరీ ఛార్జ్ ఫుల్ అవుతుంది. ఇలా ఫుల్ ఛార్జ్ ఫాస్ట్​గా అవ్వడం వల్ల బ్యాటరీ సామర్థ్యం తగ్గుతుందని తెలిపింది. దీనికి ప్రధాన కారణం బ్యాటరీ లోపల ఉండే ఎలక్ట్రోలైట్ ద్రావణం. కాలక్రమేణా దానిలోని లవణాలు గడ్డకట్టడం ప్రారంభించి.. దీని వలన శక్తి ప్రసరణ నిలిచిపోతుంది.

మీరు ఫోన్​ను ఫాస్ట్ ఛార్జర్​తో ఛార్జ్ చేసినప్పుడు.. ఈ ప్రక్రియ మరింత వేగంగా జరుగుతుంది. ఫాస్ట్ ఛార్జింగ్ సమయంలో బ్యాటరీపై ఒకేసారి ఎక్కువ వోల్టేజ్ పడుతుంది. దీనివల్ల బ్యాటరీ లోపలి నుంచి డ్యామేజ్ అవుతుంది.

ఎక్కువ కాలం పాటు హై పవర్ ఛార్జర్లను ఉపయోగిస్తే.. ఫోన్ బ్యాటరీ వేడెక్కి త్వరగా పాడయ్యే అవకాశం ఉంది. అయితే ఇప్పుడు కొత్త స్మార్ట్‌ఫోన్‌లలో అధునాతన బ్యాటరీ నిర్వహణ వ్యవస్థలు ఉన్నాయి. ఇవి ఈ నష్టాన్ని చాలా వరకు తగ్గిస్తాయి.

పాత ఫోన్లలో హీట్ మేనేజ్మెంట్ సరిగా ఉండదు. దీనివల్ల ఫాస్ట్ ఛార్జర్​ ఉపయోగిస్తే బ్యాటరీ త్వరగా వేడెక్కిపోతుంది. కానీ ఇప్పుడు ఫోన్ కంపెనీలు తమ పరికరాలలో హీట్ షీల్డ్, థర్మల్ లేయర్, చాలా గేమింగ్ ఫోన్లలో అంతర్నిర్మిత కూలింగ్ ఫ్యాన్లు కూడా అందిస్తున్నాయి. దీనివల్ల బ్యాటరీపై ఉష్ణోగ్రత ప్రభావం తగ్గుతుంది.

అనేక నివేదికలు కూడా తరచుగా ఫాస్ట్ ఛార్జింగ్ చేయడం వల్ల బ్యాటరీ జీవితకాలం తగ్గుతుందని తెలిపాయి. బ్యాటరీ ఇప్పటికే పూర్తిగా ఛార్జ్ అయి.. మళ్ళీ ఫాస్ట్ ఛార్జ్ చేసినప్పుడు.. దాని లోపల థర్మల్ ఒత్తిడి పెరిగి.. బ్యాటరీ డౌన్ అవుతుంది. ఆధునిక ఫోన్లు ఈ ప్రక్రియను నియంత్రించడానికి స్మార్ట్ ఛార్జింగ్ సిస్టమ్‌లను ఉపయోగిస్తాయి. కానీ ఓవర్ఛార్జింగ్ లేదా ఫాస్ట్ ఛార్జర్లను ఉపయోగించడం వల్ల బ్యాటరీపై నెగిటివ్ ప్రభావం ఉంటుంది.

ఫాస్ట్ ఛార్జింగ్ అనేది నేటిరోజుల్లో అవసరమే. కానీ.. దానిని నిరంతరం ఉపయోగించడం వల్ల బ్యాటరీ జీవితం తగ్గుతుంది. మీ ఫోన్ ఎక్కువ కాలం పనిచేయాలని మీరు కోరుకుంటే.. అప్పుడప్పుడు సాధారణ ఛార్జింగ్‌ను ఉపయోగించడం మంచిది. వేగంగా ఛార్జ్ చేయడం సౌకర్యవంతంగా ఉన్నప్పటికీ.. నెమ్మదిగా ఛార్జింగ్ చేయడం వల్ల మీ బ్యాటరీ లైఫ్ పెరుగుతుంది.