Cyber Fraud Alert : చలాన్ కట్టాలంటూ మెసేజ్ వస్తే జాగ్రత్త.. లక్షల్లో డబ్బులు స్వాహా అయిపోతాయి, ఇలా చేస్తే డబ్బు తిరిగి వస్తాయట

APK Scam Warnings : చలాన్ పేరుతో వచ్చే సైబర్ మోసాల బారిన పడకుండా జాగ్రత్తగా ఉండాలని.. వెంటనే బ్యాంకుకు ఫిర్యాదు చేయాలని అంటున్నారు. వీలైనంత త్వరగా డబ్బు రావాలంటే ఏమి చేయాలో చూసేద్దాం.

చలాన్ మెసేజ్‌లో వచ్చిన APK ఫైల్.. ఖాతా నుంచి లక్షలు మాయం

ఇటీవల నోయిడా సెక్టార్ 58లో నివసిస్తున్న ఓ వ్యక్తి ఫోన్​కి జనవరి 13న చలాన్​కు సంబంధించిన ఒక సందేశం వచ్చింది. అందులో ఒక APK ఫైల్ ఉంది. అతను ఫైల్​ డౌన్లోడ్ చేసుకున్నాడు. కొంత సమయం తర్వాత ఖాతా నుంచి 3.17 లక్షల రూపాయలు కట్ అయ్యాయి. విషయం అర్థం చేసుకున్న వెంటనే అతను ఫిర్యాదు నమోదు చేశాడు.

బాధితుడు ఆలస్యం చేయకుండా 1930 హెల్ప్‌లైన్, నేషనల్ సైబర్ క్రైమ్ రిపోర్టింగ్ పోర్టల్‌లో సమాచారం అందించాడు. సెక్టార్ 58 పోలీస్ స్టేషన్ సైబర్ హెల్ప్ డెస్క్ గోల్డెన్ అవర్స్‌లో చర్యలు తీసుకుని సంబంధిత బ్యాంకు ఖాతాలను గుర్తించి డబ్బును బ్లాక్ చేశారు. చట్టపరమైన ప్రక్రియ పూర్తయిన తర్వాత మొత్తం డబ్బు తిరిగి ఖాతాలో జమ అయింది.

మోసం జరిగిన తర్వాత ప్రతి నిమిషం చాలా ముఖ్యం. లావాదేవీ జరిగిన వెంటనే ఫిర్యాదు చేస్తే.. డబ్బును మరింత బదిలీ చేయకుండా ఆపవచ్చు. ఆలస్యం అయితే డబ్బు చాలా ఖాతాలకు వెళుతుంది. ఇది రికవరీని కష్టతరం చేస్తుంది. అందువల్ల వెంటనే రియాక్ట్ అవ్వడం అత్యంత ముఖ్యమైన భద్రతగా చెప్తారు.

మీకు కూడా ఇలాంటి మోసం జరిగితే.. వెంటనే సంబంధిత బ్యాంకుకు తెలియజేయండి. వెంటనే 1930కు కాల్ చేయండి. ఆ తర్వాత నేషనల్ సైబర్ క్రైమ్ రిపోర్టింగ్ పోర్టల్​లో ఆన్లైన్ ఫిర్యాదును నమోదు చేయండి. లావాదేవీ ID, సమయం, ఎంత అమౌంట్ కట్ అయిందో అనే దాని గురించి ఖచ్చితమైన సమాచారం ఇవ్వాలి.

అలాంటి మోసాల బారిన పడకుండా ఉండటానికి.. తెలియని లింక్‌లను లేదా APK ఫైల్‌లను డౌన్‌లోడ్ చేయకూడదు. బ్యాంక్, KYC లేదా చలాన్‌లకు సంబంధించిన సందేశాలను నేరుగా నమ్మవద్దు. అధికారిక ప్లాట్‌ఫారమ్‌ల నుంచి మాత్రమే యాప్‌లను ఇన్‌స్టాల్ చేయండి. ఫోన్‌లో ఉన్న అనుమానాస్పద యాప్‌లను వెంటనే తీసివేయండి. మీ పాస్‌వర్డ్‌లను క్రమం తప్పకుండా మార్చుకోండి.

దీనితో పాటు మీ బ్యాంక్ ఖాతాలో టూ ఫ్యాక్టర్ ఆథెంటికేషన్, SMS అలర్ట్‌లను యాక్టివేట్ చేసుకోండి. చిన్న జాగ్రత్త పెద్ద నష్టం నుంచి రక్షిస్తుంది. సైబర్ మోసాల విషయంలో అవగాహన, వెంటనే చేసిన ఫిర్యాదే మీ బలమైన రక్షణ కవచం.