Vitamin D : విటమిన్ డి కోసం ఎండలో ఎంతసేపు ఉండాలి? ఉదయం, సాయంత్రం కాకుండా ఏ టైమ్​లో ఉంటే మంచిది

Sunlight and Vitamin D : ఎక్కువసేపు ఎండలో కూర్చుంటే ఎక్కువ ప్రయోజనం అని చాలామంది అనుకుంటారు కానీ.. తప్పుడు సమయంలో లేదా తప్పుడు పద్ధతిలో ఎండ తీసుకుంటే ప్రయోజనం కంటే నష్టమే ఎక్కువట.

విటమిన్ డి కోసం ఏ టైమ్లో ఎండలో ఉంటే మంచిది

విటమిన్ డి పొందడానికి ఉదయం 10 గంటల నుంచి మధ్యాహ్నం 2 గంటల వరకు ఎండ చాలా మంచిది. ఈ సమయంలో సూర్యుని UVB కిరణాలు చర్మంపై పడి విటమిన్ డి ఉత్పత్తి చేయడంలో సహాయపడతాయి. ఉదయం చాలా తొందరగా లేదా సాయంత్రం ఎండలో ఎక్కువ ప్రభావం ఉండదు.

ప్రతిరోజు 15 నుంచి 30 నిమిషాల వరకు ఎండలో ఉండటం సరిపోతుంది. ముఖం, చేతులు, కాళ్ళపై నేరుగా ఎండ తగలాలి. ఎక్కువసేపు ఎండలో కూర్చోవడం వల్ల సన్బర్న్, చర్మం దెబ్బతినే ప్రమాదం ఉంది.

సూర్యరశ్మిని తీసుకునేటప్పుడు శరీరాన్ని పూర్తిగా కప్పి ఉంచడం వల్ల విటమిన్ డి ఏర్పడదు. ఎక్కువగా బట్టలు ధరిస్తే లేదా పూర్తిగా సన్‌స్క్రీన్ రాసుకుని కూర్చుంటే ప్రయోజనం తగ్గుతుంది.

సూర్యరశ్మి తీసుకోవడంలో చాలా మంది ఈ తప్పులు చేస్తుంటారు. గంటల తరబడి ఎండలో అవసరం లేకుండా కూర్చోవడం, తల నుంచి పాదాల వరకు బట్టలు ధరించడం, చాలా సన్ స్క్రీన్ ఉపయోగించడం, ఉదయం లేదా సాయంత్రం ఎండలో కూర్చోవడం వంటివి చేస్తుంటారు. దీనివల్ల విటమిన్ డి శోషణ తగ్గుతుంది. చర్మానికి కూడా హాని కలుగుతుంది.

సరికాని రీతిలో ఎండ తగలడం వల్ల చర్మం నల్లబడటం, ఎండ వల్ల కలిగే కాలిన గాయాలు, ముడతలు, చర్మం దెబ్బతినడం, తక్కువ సూర్యరశ్మి తీసుకోవడం వల్ల విటమిన్ D లోపం ఏర్పడుతుంది. కాబట్టి సరైన సమయంలో, సరైన పద్ధతిలో ఎండ తీసుకోవడం ముఖ్యం.

సూర్యరశ్మి ద్వారా శరీరంలో ప్రధానంగా విటమిన్ D3 తయారవుతుంది. ఇది ఎముకలను బలంగా చేస్తుంది. కండరాలను ఆరోగ్యంగా ఉంచుతుంది. రోగనిరోధక వ్యవస్థను బలపరుస్తుంది. ప్రతిరోజు కొంతసేపు ఎండలో ఉండటం ద్వారా శరీరాన్ని ఆరోగ్యంగా ఉంచుకోవచ్చు. అయితే తప్పు పద్ధతి చర్మం, ఆరోగ్యానికి రెండింటికీ హానికరం కావచ్చు.