Fire Accident In Andhra Pradesh Secretariat: సచివాలయంలో అగ్నిప్రమాద ప్రదేశాన్ని పరిశీలించిన సీఎం చంద్రబాబు

Fire Accident In Andhra Pradesh Secretariat: ఆంధ్రప్రదేశ్‌ సచివాలయంలో ఈ ఉదయం అగ్ని ప్రమాదం జరిగింది. రెండో బ్లాక్‌లో ఉంచిన బ్యాటరీలు కారణంగా ఇలా జరిగిందని పోలీసులు ప్రాథమికంగా తేల్చారు.

సచివాలయంలో అగ్నిప్రమాద ప్రదేశాన్ని పరిశీలించిన సీఎం చంద్రబాబు

వెలగపూడి సచివాలయంలోని రెండవ బ్లాక్‌లో తెల్లవారుజామున అగ్నిప్రమాదం జరిగింది. అగ్ని ప్రమాదం జరిగిన ప్రదేశాన్ని ముఖ్యమంత్రి చంద్రబాబు నాయుడు పరిశీలించారు.

సీఎస్ విజయానంద్, డీజీపీ హరీష్ కుమార్ గుప్తా, హోంమంత్రి అనిత, జీఏడీ పొలిటికల్ సెక్రటరీ ముఖేష్ కుమార్ మీనాతో కలిసి సీఎం చంద్రబాబు పరిశీలించారు.

అగ్నిప్రమాదం ఎలా, ఏ సమయంలో చోటు చేసుకుందని సీఎం అధికారులను అడిగి తెలుసుకున్నారు. ముఖ్యమైన ప్రాంతాల్లో ప్రతిచోటా సీసీ కెమెరాలు ఏర్పాటు చేయాలని, తద్వారా ప్రమాదానికి కారణాలు తెలుసుకోవడానికి అవకాశం ఉంటుందని సీఎం చంద్రబాబు అన్నారు.

అగ్నిప్రమాదం జరిగిన ప్రదేశానికి ఫోరెన్సిక్ బృందం ఎన్ని గంటలకు వచ్చిందని అడిగారు సీఎం. ప్రమాదానికి గల కారణాలను తెలుసుకునేందుకు అవసరమైన ఆధారాలను సేకరించారా లేదా అని చంద్రబాబు అడిగారు.

సచివాలయంలో అన్ని చోట్లా భద్రతా ప్రమాణాలన్నీ పాటిస్తున్నారా లేదా అన్నది ఆడిట్ చేయాలని సూచించారు చంద్రబాబు.

మొదటి బ్లాక్‌లోని బ్యాటరీ రూమ్‌ను కూడా సీఎం పరిశీలించారు. ఇటువంటి బ్యాటరీ గ్యాలరీనే రెండో బ్లాక్‌లో అగ్నిప్రమాదానికి గురైందని సీఎంకు సీఎస్ వివరించారు.

సీఎంఆర్ఎఫ్ విభాగాన్ని పరిశీలించిన చంద్రబాబు అక్కడి అపరిశుభ్రతపై అసంతృప్తిని వ్యక్తం చేశారు. 24 గంటల్లో చెత్తనంతా క్లీన్ చేయాలని ఆదేశించారు.

పని ప్రదేశాల్లో ఎక్కడా తాత్కాలికంగా కూడా చెత్త కనబడటానికి వీళ్లేదని అన్నారు.