Live in Relationship: భారత్‌లో సహజీవనం నేరమో కాదు ఘోరమో కాదు: రాజస్థాన్ కోర్టు సంచలన కామెంట్స్

Live in Relationship: 18 ఏళ్లు నిండిన వాళ్లు లివ్ ఇన్ రిలేషన్‌షిప్‌లో ఉండటం భారత్‌లో చట్టవిరుద్ధం కాదని, నేరం కాదని రాజస్థాన్ హైకోర్టు చెప్పింది.

18 సంవత్సరాలు దాటిన వారు సహజీవనం చేయడం చట్టవిరుద్ధం కాదు - రాజస్థాన్ హైకోర్టు

Source : Canva

Live-in Relationship: రాజస్థాన్ హైకోర్టు లివ్-ఇన్ జంటకు సంబంధించిన కేసులో తీర్పునిస్తూ, భారతీయ చట్టం ప్రకారం, వివాహ వయస్సు రాకపోయినా, మేజర్ అయిన స్త్రీ, పురుషులు పూర్తి సమ్మతితో లివ్-ఇన్ రిలేషన్‌షిప్‌లో కలిసి జీవించడం చట్టవిరుద్ధం లేదా నేరం కాదని పేర్కొంది.

తల్లిదండ్రులకు వ్యతిరేకంగా కేసు వేసిన లివ్-ఇన్ జంట

రాజస్థాన్ కోటా జిల్లాకు చెందిన 18 ఏళ్ల యువతి, 19 ఏళ్ల యువకుడు లివ్-ఇన్ రిలేషన్‌షిప్‌లో కలిసి జీవిస్తున్నారు. దీని కోసం, గత అక్టోబర్ 27న ఒక ఒప్పందంపై కూడా సంతకం చేశారు. అయితే, వారి తల్లిదండ్రులు ఈ సంబంధానికి తీవ్రంగా వ్యతిరేకత వ్యక్తం చేసినట్లు సమాచారం. అంతేకాకుండా, వారు వివిధ బెదిరింపులకు పాల్పడినట్లు తెలుస్తోంది.

దీంతో, ఆ లివ్-ఇన్ జంట దీనిపై పోలీసు స్టేషన్‌లో ఫిర్యాదు చేసింది. అయితే, సంబంధిత యువకుడికి ఇంకా వివాహ వయస్సు అయిన 21 సంవత్సరాలు నిండలేదని, పోలీసులు ఎటువంటి చర్యలు తీసుకోలేదు. తమకు తగిన రక్షణ కల్పించాలని కోరుతూ రాజస్థాన్ హైకోర్టులో పిటిషన్ దాఖలు చేశారు.

"18 ఏళ్లు దాటిన వారు లివ్-ఇన్‌లో ఉండటానికి చట్టపరంగా ఎటువంటి అడ్డంకులు లేవు"

దీని తరువాత, ఈ కేసు విచారణకు వచ్చినప్పుడు, ప్రభుత్వ న్యాయవాది వాదనలు వినిపిస్తూ, కేసులో ఉన్న యువకుడు చట్టపరమైన వివాహ వయస్సు అయిన 21 సంవత్సరాలు చేరుకోలేదని, కాబట్టి చట్ట ప్రకారం అతను వివాహం చేసుకోలేడు లేదా లివ్-ఇన్‌లో కలిసి జీవించలేడు అని వాదించారు.

కానీ దీనిని అంగీకరించని న్యాయమూర్తి, 18 ఏళ్లు దాటిన వారు లివ్-ఇన్‌లో ఉండటానికి చట్టపరంగా ఎటువంటి అడ్డంకులు లేవని పేర్కొన్నారు. 18 సంవత్సరాలు లేదా అంతకంటే ఎక్కువ వయస్సు ఉన్న ఎవరైనా భారతీయ చట్టం ప్రకారం మేజర్‌గా గుర్తింపు పొందుతారని, మేజర్లు కలిసి జీవించే నిర్ణయం తీసుకునే హక్కుతో సహా వ్యక్తిగత ఎంపికలు చేసుకునే హక్కు కలిగి ఉంటారని న్యాయమూర్తి అన్నారు.

చట్టపరమైన వివాహ వయస్సు ఒకరి గోప్యతను దోచుకోదని, భారతదేశంలో లివ్-ఇన్ రిలేషన్‌ చట్టవిరుద్ధం లేదా నేరం కాదని న్యాయమూర్తి అన్నారు. అంతేకాకుండా, మేజర్‌ల గోప్యత, జీవించే హక్కును ఆర్టికల్ 21 రక్షిస్తుందని, వారు ఎక్కడ నివసించాలో, జీవిత భాగస్వామిని ఎంచుకునే హక్కు వారికి ఉందని న్యాయమూర్తి స్పష్టం చేశారు.

అంతేకాకుండా, 18 ఏళ్లు దాటిన ఇద్దరు వ్యక్తులు కలిసి జీవించాలని నిర్ణయించుకుంటే, వారి నిర్ణయంలో ప్రభుత్వం జోక్యం చేసుకోలేదని న్యాయమూర్తి స్పష్టం చేశారు. ఈ కేసులో పోలీసులు లోతుగా విచారణ జరిపి, దరఖాస్తుదారులకు ప్రమాదం ఉంటే, వారికి తగిన రక్షణ కల్పించాలని ఆదేశించారు.