Trump Warns Iran: ఇరాన్కు ట్రంప్ అల్టిమేటం- త్వరగా నిర్ణయం తీసుకోకపోతే అంతమే!
Trump: ఇరాన్ చర్చలకు సిద్ధంగా ఉన్నట్లు నటిస్తూనే, మరోవైపు కవ్వింపు చర్యలకు పాల్పడుతోందని ట్రంప్ ఆరోపిస్తున్నారు. త్వరగా నిర్ణయం తీసుకోకపోతే అంతం తప్పదని అంటున్నారు.
Iran War Latest News Telugu: పశ్చిమాసియాలో ఇరాన్, ఇజ్రాయెల్ మరియు అమెరికా మధ్య నెలకొన్న యుద్ధ వాతావరణంపై అమెరికా అధ్యక్షుడు డోనాల్డ్ ట్రంప్ అత్యంత ఘాటుగా స్పందించారు. ఈ ఉద్రిక్తతలకు ముగింపు పలికేలా ఇరాన్ నాయకత్వం వెంటనే స్పందించాలని, లేదంటే ఊహించని పరిణామాలు ఎదుర్కోవాల్సి ఉంటుందని ఆయన హెచ్చరించారు.
పశ్చిమాసియాలో మండుతున్న యుద్ధజ్వాలల మధ్య డోనాల్డ్ ట్రంప్ సోషల్ మీడియా వేదికగా ఇరాన్ ప్రభుత్వానికి ఒక బలమైన హెచ్చరిక జారీ చేశారు. వెంటనే సీరియస్గా స్పందించండి అంటూ ఆయన చేసిన వ్యాఖ్యలు అంతర్జాతీయ స్థాయిలో సంచలనం రేపుతున్నాయి. ఇరాన్ చర్చల విషయంలో జాప్యం చేస్తోందని, ఒకవేళ సమయం మించిపోతే తాము తీసుకోవబోయే చర్యల నుంచి వెనక్కి తగ్గే ప్రసక్తే లేదని ట్రంప్ స్పష్టం చేశారు. ఇరాన్ చర్చలకు సిద్ధంగా ఉన్నట్లు నటిస్తూనే, మరోవైపు కవ్వింపు చర్యలకు పాల్పడుతోందని ఆయన ఆరోపించారు.
ఈ క్రమంలోనే ట్రంప్ ప్రభుత్వం ఇరాన్కు 15 పాయింట్ల శాంతి ప్రణాళికను పంపినట్లు సమాచారం. ఇందులో భాగంగా హార్మూజ్ జలసంధిని పూర్తిగా తెరిచి అంతర్జాతీయ నౌకలకు రక్షణ కల్పించడం, అణ్వాయుధ కార్యక్రమాలను శాశ్వతంగా పక్కన పెట్టడం వంటి కఠిన నిబంధనలు ఉన్నాయి. ఈ ప్రతిపాదనలకు ఇరాన్ అంగీకరించకపోతే, ఆ దేశంలోని అతిపెద్ద విద్యుత్ కేంద్రాలు, ఇంధన మౌలిక సదుపాయాలను లక్ష్యంగా చేసుకుని దాడులు చేస్తామని ట్రంప్ హెచ్చరించారు. ఇప్పటికే ఈ దాడులను ఐదు రోజుల పాటు వాయిదా వేస్తున్నట్లు ప్రకటించిన ఆయన, ఈ లోపు ఇరాన్ ఒక నిర్ణయానికి రావాలని గడువు విధించారు.
మరోవైపు, ఇరాన్ నావికాదళ కమాండర్ అలీరెజా తంగ్సిరి మరణం తర్వాత యుద్ధం మరింత ముదిరినట్లు కనిపిస్తోంది. ఇరాన్ తన క్షిపణి వ్యవస్థలను యుద్ధానికి సిద్ధం చేయగా, అమెరికా కూడా తన మెరైన్ దళాలను ,శక్తివంతమైన యుద్ధ నౌకలను పర్షియన్ గల్ఫ్ వైపు మళ్లిస్తోంది. ఇరాన్ చర్చల ప్రతినిధులు వింతగా వ్యవహరిస్తున్నారని, బయటకు చర్చలు లేవని చెబుతున్నా లోలోపల మాత్రం సంధి కోసం అడుగుతున్నారని ట్రంప్ ఎద్దేవా చేశారు. ఒకవేళ శాంతి ఒప్పందం కుదరకపోతే ఇరాన్పై నరకాన్ని చూపిస్తామని వైట్ హౌస్ వర్గాలు తీవ్రంగా హెచ్చరించాయి.
🚨 TRUMP --
— News Algebra (@NewsAlgebraIND) March 26, 2026
"Iran proposed making me Supreme Leader" 😳
"I said No. Thankyou. They were so insisting"
"They want to make a deal so BADLY, but they're afraid to say it because they figure they'll be killed by their own people"
"They're also afraid they'll be killed by United… pic.twitter.com/8akHiN4U1U
ఆర్థికంగా చూస్తే, ఈ అనిశ్చితి వల్ల అంతర్జాతీయ మార్కెట్లో ముడిచమురు ధరలు భారీగా పెరుగుతున్నాయి. హార్మూజ్ జలసంధిని ఇరాన్ పాక్షికంగా మూసివేయడం వల్ల ప్రపంచ ఇంధన సరఫరా గొలుసు దెబ్బతింటోంది. ఈ పరిస్థితుల్లో భారత్ వంటి మిత్రదేశాలతో కూడా ట్రంప్ నిరంతరం సంప్రదింపులు జరుపుతున్నారు. యుద్ధాన్ని సాధ్యమైనంత త్వరగా, అంటే ఏప్రిల్ నెలాఖరుకల్లా ముగించాలన్నది ట్రంప్ లక్ష్యంగా కనిపిస్తోంది. అయితే ఇరాన్ మాత్రం తాము ఎవరికీ లొంగిపోయే ప్రసక్తే లేదని, తమ నిబంధనల ప్రకారమే శాంతి ఉంటుందని భీష్మిస్తోంది. ఈ పరిణామాలు రాబోయే కొద్ది రోజుల్లో పశ్చిమాసియా భవిష్యత్తును నిర్ణయించనున్నాయి.
టాప్ హెడ్ లైన్స్
ట్రెండింగ్ వార్తలు
