Another new airport for Delhi: ఢిల్లీకి మరో ఇంటర్నేషనల్ ఎయిర్ పోర్టు - నోయిడా విమానాశ్రయం ప్రారంభానికి రెడీ
Noida Airport : నోయిడా అంతర్జాతీయ విమానాశ్రయం ప్రారంభోత్సవానికి సర్వం సిద్ధమైంది. శనివారం ఈ మెగా ప్రాజెక్టును జాతికి అంకితం చేయనున్నారు.
Noida International Airport: ఢిల్లీ-ఎన్సీఆర్ ప్రాంతానికి మకుటాయమానంగా, ఉత్తరప్రదేశ్ అభివృద్ధికి కేంద్ర బిందువుగా నిలవనున్న నోయిడా అంతర్జాతీయ విమానాశ్రయం ప్రారంభోత్సవానికి సర్వం సిద్ధమైంది. ప్రధాని నరేంద్ర మోదీ, ఉత్తరప్రదేశ్ ముఖ్యమంత్రి యోగి ఆదిత్యనాథ్ సమక్షంలో శనివారం ఈ మెగా ప్రాజెక్టును జాతికి అంకితం చేయనున్నారు. ఇది ఉత్తరప్రదేశ్ రాష్ట్రానికే కాకుండా, దేశ విమానయాన రంగంలోనే ఒక చారిత్రాత్మక ఘట్టం.
ఆసియాలోనే అతిపెద్ద విమానాశ్రయం
గౌతమ్ బుద్ధ నగర్ జిల్లాలోని జేవార్ వద్ద సుమారు 5,000 హెక్టార్ల భారీ విస్తీర్ణంలో ఈ విమానాశ్రయాన్ని నిర్మిస్తున్నారు. ఇది పూర్తయితే భారత్లోనే కాకుండా, ఆసియాలోనే అతిపెద్ద విమానాశ్రయంగా, ప్రపంచంలోనే నాల్గవ అతిపెద్ద విమానాశ్రయంగా రికార్డు సృష్టించనుంది. మొత్తం నాలుగు దశల్లో జరగనున్న ఈ ప్రాజెక్టు పూర్తయ్యాక, ఏటా 7 కోట్ల మంది ప్రయాణికులకు సేవలు అందించే సామర్థ్యాన్ని కలిగి ఉంటుంది.
ఢిల్లీ-ఎన్సీఆర్కు రెండో అంతర్జాతీయ విమానాశ్రయం
ప్రస్తుతం ఢిల్లీలోని ఇందిరా గాంధీ అంతర్జాతీయ విమానాశ్రయం (IGI) పై ఉన్న విపరీతమైన ఒత్తిడిని తగ్గించడానికి నోయిడా ఎయిర్పోర్ట్ కీలకం కానుంది. ఢిల్లీ నుంచి సుమారు 72 కిలోమీటర్ల దూరంలో ఉన్న ఈ ఎయిర్పోర్ట్.. నోయిడా, ఘజియాబాద్, అలీఘర్, ఆగ్రా, మథుర , ఫరీదాబాద్ వంటి నగరాల ప్రజలకు ఎంతో చేరువ కానుంది. దీనివల్ల పశ్చిమ ఉత్తరప్రదేశ్ , హర్యానా ప్రాంతాల్లో రవాణా వ్యవస్థ పూర్తిగా మారిపోనుంది.
డిజిటల్ , నెట్ జీరో ఎమిషన్ ఎయిర్పోర్ట్
ఈ విమానాశ్రయాన్ని పూర్తిస్థాయిలో డిజిటల్ ఎయిర్పోర్ట్ గా తీర్చిదిద్దుతున్నారు. కాంటాక్ట్లెస్ చెక్-ఇన్, ముఖ గుర్తింపు వంటి అత్యాధునిక సాంకేతికతను ఇక్కడ ప్రవేశపెడుతున్నారు. మరీ ముఖ్యంగా, ఇది భారతదేశపు మొట్టమొదటి నెట్ జీరో ఎమిషన్ విమానాశ్రయం. అంటే, పర్యావరణానికి ఎటువంటి హాని కలగకుండా, పునరుత్పాదక ఇంధనం, హరిత సాంకేతికతతో ఈ విమానాశ్రయం పనిచేస్తుంది.
ఆర్థిక విప్లవం - వేలాది ఉద్యోగాలు
నోయిడా ఎయిర్పోర్ట్ రాకతో ఈ ప్రాంతంలో భారీగా పెట్టుబడులు రానున్నాయి. విమానాశ్రయం సమీపంలోనే ఎంఎస్ఎంఈ పార్కులు, టెక్స్టైల్ పార్కులు , మొబైల్ మాన్యుఫ్యాక్చరింగ్ హబ్లు ఏర్పాటు అవుతున్నాయి. దీనివల్ల ప్రత్యక్షంగా మరియు పరోక్షంగా సుమారు 1 లక్ష మందికి పైగా ఉద్యోగ అవకాశాలు లభిస్తాయని అంచనా. అలాగే ఆగ్రా, మథుర వంటి పర్యాటక ప్రాంతాలకు విదేశీ పర్యాటకుల రాక సులభతరం కానుంది.
Super excited for tomorrow as Delhi-NCR is going to get its 2nd international airport.
— Ram Mohan Naidu Kinjarapu (@RamMNK) March 27, 2026
Magnificent Noida International Airport is set to be inaugurated by Hon’ble Prime Minister Shri @narendramodi Ji in presence of Hon’ble Chief Minister of Uttar Pradesh Shri @myogiadityanath… pic.twitter.com/a71M174x9o
మల్టీ మోడల్ కనెక్టివిటీ
ఈ ఎయిర్పోర్ట్ను రోడ్డు, రైలు, మెట్రో మార్గాలతో అనుసంధానిస్తున్నారు. యమునా ఎక్స్ప్రెస్వే, వెస్ట్రన్ పెరిఫెరల్ ఎక్స్ప్రెస్వే , ప్రతిపాదిత హైస్పీడ్ రైలు మార్గం ద్వారా ప్రయాణికులు అతి తక్కువ సమయంలో విమానాశ్రయానికి చేరుకోవచ్చు. ఉత్తరప్రదేశ్ ప్రభుత్వం ఈ ప్రాజెక్టును ఒక గ్లోబల్ లాజిస్టిక్స్ హబ్ గా మార్చాలని లక్ష్యంగా పెట్టుకుంది.
టాప్ హెడ్ లైన్స్
ట్రెండింగ్ వార్తలు
