Navjot Singh Sidhu Resignation: పీసీసీ చీఫ్‌గా సిద్ధూ కొనసాగింపు.. రాజీనామా ఉపసంహరణ

పంజాబ్ పీసీసీ చీఫ్ పదవిలో తాను కొనసాగుతున్నట్లు నవజోత్ సింగ్ సిద్ధూ తెలిపారు. తన రాజీనామాను వెనక్కి తీసుకున్నట్లు వెల్లడించారు.

పీసీసీ చీఫ్‌గా నవజోత్ సింగ్ సిద్ధూ కొనసాగింపు

పంజాబ్‌ కాంగ్రెస్ సంక్షోభం ఎట్టకేలకు ఓ కొలిక్కి వచ్చింది. పంజాబ్ పీసీసీ చీఫ్ పదవికి తాను చేసిన రాజీనామాను ఉపసంహరించుకున్నారు నవజోత్ సింగ్ సిద్ధూ.

" నా నిర్ణయాన్ని వెనక్కి తీసుకున్నాను. పంజాబ్ పీసీసీ చీఫ్‌గా కొనసాగుతాను. అయితే కొత్త అడ్వకేట్ జనరల్, ప్యానెల్ ఏర్పాటైన రోజు తిరిగి ఆఫీసుకు వచ్చి బాధ్యతలు స్వీకరిస్తాను. ఇది ఎంత మాత్రం వ్యక్తిగత ఈగో కాదు.                                   "

- నవజోత్ సింగ్ సిద్ధూ, కాంగ్రెస్ నేత

సెప్టెంబర్ 28న చరణ్‌జిత్ సింగ్ చన్నీ నేతృత్వంలోని కొత్త కేబినెట్ ఏర్పాటై శాఖలను కేటాయిస్తున్న సమయంలో సిద్ధూ పీసీసీ చీఫ్ పదవికి రాజీనామా చేశారు. అయితే పలు దఫాల చర్చల తర్వాత అక్టోబర్ 15న అప్పటి పంజాబ్ కాంగ్రెస్ ఇంఛార్జ్ హరీశ్ రావత్ కీలక ప్రకటన చేశారు. సిద్ధూ పీసీసీ చీఫ్ పదవిలో కొనసాగుతారని తెలిపారు. సిద్ధూ కూడా ఆ ప్రకటనకు సానుకూలంగా స్పందించారు.

సోనియాకు లేఖ...

కాంగ్రెస్ పార్టీ అధినేత్రి సోనియా గాంధీకి పంజాబ్ పీసీసీ చీఫ్ నవజోత్ సింగ్ సిద్ధూ లేఖ రాశారు. ఈ నెల 15న సోనియా గాంధీకి రాసిన నాలుగు పేజీల లేఖలోని వివరాలను సిద్ధూ ఈ రోజు ట్వీట్ చేశారు. వచ్చే ఏడాది జరగనున్న అసెంబ్లీ ఎన్నికల్లో భాగంగా 13 పాయింట్ల ఎజెండాతో కూడిన పంజాబ్ మోడల్‌ను రూపొందించానని, దానిని వివరించేందుకు తనకు సమయం కేటాయించాలని ఆ లేఖలో సోనియాను సిద్ధూ కోరారు.

పంజాబ్ ముఖ్యమంత్రి చరణ్ సింగ్ సింగ్ చన్నీ సారథ్యంలోని రాష్ట్ర ప్రభుత్వం తప్పనిసరిగా అమలు చేయాల్సిన ప్రాధాన్యతా క్రమాలను ఆ లేఖలో సిద్ధూ ప్రస్తావించారు. పంజాబ్‌లో కాంగ్రెస్‌ ప్రభుత్వం, పార్టీ పునరుద్ధరణకు ఇది చివరి అవకాశంగా పేర్కొన్నారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి