Norovirus in Kerala: కేరళలో కొత్త వైరస్.. దండయాత్ర.. ఇది మనుషులపై మహమ్మారుల దండయాత్ర!

కేరళలో కొత్త వైరస్ వ్యాపిస్తోంది. ఇప్పటికే పలు కేసులు నమోదుకాగా ప్రజలు తీవ్ర భయాందోళనలో ఉన్నారు.

కేరళలో కొత్త వైరస్

కేరళలో మరో వైరస్‌ కలకలం రేపుతోంది. నోరో వైరస్‌ పేరుతో పిలుస్తోన్నఈ వ్యాధి అత్యంత వేగంగా వ్యాపిస్తోంది. 2 వారాల వ్యవధిలో 13 కేసులు నమోదయ్యాయి. వయనాడ్‌ జిల్లాలోనే అన్ని కేసులు నిర్ధారణయ్యాయి. ఈ మేరకు ఆ రాష్ట్ర ఆరోగ్య మంత్రి వీణా జార్జ్‌ తెలిపారు.

Koo App

#నోరోవైరస్ కేరళలోని వాయనాడ్ జిల్లాలో నోరోవైరస్ ఉన్నట్లు ధృవీకృతమైంది. ఇది జంతువుల నుంచి మనుషులకు వ్యాపిస్తుంది. ప్రధానంగా కలుషిత నీరు, ఆహారం ద్వారా వ్యాపిస్తుంది. ముందు జాగ్రత్తలు తీసుకుంటే దీనిని నివారించవచ్చు. ఇదో అత్యంత అంటు వ్యాధి. వాయనాడ్ జిల్లాలోని వైథిరీ సమీపంలోని పూకొడేలోని వెటర్నరీ కాలేజ్‌లో13 కన్నా ఎక్కువ మంది విద్యార్థులకు ఇది సోకింది. ప్రస్తుతానికైతే ఎలాంటి ప్రమాదంలేదు.

 

- Lakshmi (@లక్ష్మి77) 13 Nov 2021

ఎలా వ్యాపిస్తోంది?

ఈ వైరస్ సోకిన వారంతా వయనాడ్​ జిల్లా పూకోడేలోని ఓ పశువైద్య కళాశాల విద్యార్థులు. వాంతులు, డయేరియాను ఈ వైరస్​ లక్షణాలుగా గుర్తించారు. ప్రజలు అప్రమత్తంగా ఉండాలని ప్రభుత్వం హెచ్చరించింది.

పశువైద్య కళాశాల క్యాంపస్​ బయట ఉండే హాస్టళ్లల్లోని విద్యార్థుల్లో తొలిసారి ఈ వైరస్​ను గుర్తించారు. వెంటనే అప్రమత్తమైన అధికారులు.. వారి రక్తనమూనాలను సేకరించి అలప్పుజలోని జాతీయ వైరాలజీ సంస్థ(ఎన్​ఐవీ)కి పంపించారు. వ్యాప్తిని అడ్డుకునేందుకు కఠిన చర్యలు చేపట్టాలని అధికారులకు ఆరోగ్య మంత్రి ఆదేశించారు.

ఇవే ప్రధాన లక్షణాలు..

1. పొట్ట, పేగులు చుట్టూ ఈ వైరస్ పట్టి ఉంటుంది. దీని వల్ల ఎక్కువగా వాంతులు, డయేరియా వచ్చే అవకాశం ఉంది. 
2. దీని వల్ల అతిగా దాహం వేస్తుంది. ఏమైనా వ్యాధులు ఉంటే ఈ వైరస్ వెంటనే సోకే ప్రమాదం ఉంది.
3. పిల్లలు, పెద్దలు తేడా లేకుండా ఈ వైరస్ వ్యాపిస్తుంది. 
4. ఈ వైరస్ సోకిన వారితో దగ్గరగా ఉంటే వాళ్లూ బాధితులు కాక తప్పదు. అంతేకాకుండా బాధితుల వల్ల కంటేమినేట్ అయిన ప్రాంతం నుంచి కూడా ఈ వైరస్ సోకుతోంది.

చికిత్స..

నోరో వైరస్‌కు ఇప్పటివరకు సరైన చికిత్స ఇది అని చెప్పడానికి లేదు. అయితే రికవరీ అనేది బాధిత వ్యక్తి రోగనిరోధక శక్తి పైన ఆధారపడి ఉంటుంది. ఆరోగ్యకరమైన వ్యక్తులు కొద్ది రోజుల్లోనే కోలుకుంటున్నారు. తాగు నీటి వనరులను ఎప్పటికప్పుడు శుభ్రం చేసుకోవాలని, చికిత్స తీసుకుంటే వ్యాధి నుంచి కోలుకోవచ్చని ఆరోగ్య నిపుణులు చెబుతున్నారు.

మొదటిసారి..

1929లో తొలిసారి నోరో వైరస్‌ను గుర్తించారు. దీన్ని వాంతుల రోగంగా పిలిచేవారు. అయితే 1968లోనే దీన్ని ఓ ప్రమాదకర రోగంగా పరిగణించారు. అమెరికాలోని ఓ ఎలిమెంట్రీ పాఠశాలలో ఈ వైరస్ సోకినప్పుడు అంతా భయపడ్డారు. కానీ 1990 నుంచి మాత్రమే శాస్త్రవేత్తలు ఈ వైరస్‌పై అధ్యయనాలు మొదలు పెట్టారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి