ముస్లిం వివాహం ఓ కాంట్రాక్టు.. ఆ విషయం గుర్తుపెట్టుకోవాలి.. హైకోర్టు

ముస్లిం వివాహం కాంట్రాక్కుతోనే మెుదలవుతుందని కర్ణాటక హైకోర్టు వ్యాఖ్యానించింది. ఒకవేళ పెళ్లి రద్దైనా.. మాజీ జీవిత భాగస్వామిపై బాధ్యతలు విస్మరణకు గురికావని తెలిపింది.

కర్ణాటక హైకోర్టు(ఫైల్ ఫొటో)

ముస్లిం వివాహం హిందూ మతంలో జరిగినట్లుగా ధార్మికమైనది కాదు అని కర్ణాటక హైకోర్టు పేర్కొంది. ముస్లిం వివాహం ఓ కాంట్రాక్టు అని.. ఒకవేళ అది రద్దైనా.. బాధ్యతలు మాత్రం అస్సలు రద్దు కావాని వ్యాఖ్యానించింది.  

ఇంతకీ కేసు ఏంటంటే..

బెంగళూరులోని భువనేశ్వరి నగర్​కు చెందిన ఎజాజుర్ రెహ్మాన్ అనే వ్యక్తి రూ.5000 కట్నం చెల్లించి సైరా బానును వివాహం చేసుకున్నాడు. 1991 నవంబర్ 5న ముమ్మారు తలాక్ చెప్పి సైరా బానుకు విడాకులు ఇచ్చాడు. అనంతరం కొన్ని రోజులకు మరో షాది చేసుకున్నాడు. ఓ బిడ్డకు కూడా తండ్రి అయ్యాడు. అయితే.. 2002 ఆగస్టు 24న సైరా బాను.. తన ఖర్చుల కోసం రెహ్మాన్​పై కేసు వేసింది.

ఈ కేసులో బెంగళూరు ఫ్యామిలీ కోర్టు జడ్జి మహిళకు అనుకూలంగా తీర్పు చెప్పారు. సైరా బాను మరో వివాహం చేసుకునే వరకైనా.. ఇద్దరిలో ఒకరు మరణించేంత వరకు రెహ్మాన్.. నెలకు రూ.3000 వేల చొప్పున మహిళకు చెల్లించాలని కోర్టు ఆదేశాలిచ్చింది. నిర్వహణ ఖర్చులు చెల్లించే విషయంపై.. బెంగళూరు ఫ్యామిలీ కోర్టు ఇచ్చిన తీర్పును సవాల్ చేస్తూ.. రెహ్మాన్.. హైకోర్టు మెట్లు ఎక్కాడు. ఈ పిటిషన్​ను కర్ణాటక హైకోర్టు కొట్టివేసింది. 

వివాహం అనేది ఓ కాంట్రాక్టు. దానికి ఎన్నో అర్థాలు ఉంటాయని హైకోర్టు తెలిపింది. హిందూ వివాహంలా.. ముస్లిం వివాహం ధార్మికమైనది కాదని వ్యాఖ్యానించింది. వివాహం రద్దు అయినంత మాత్రాన దాని ద్వారా తలెత్తే బాధ్యతలు, హక్కులు విస్మరణకు గురికావని హైకోర్టు స్పష్టం చేసింది. ఒప్పందంతోనే ముస్లిం వివాహం ప్రారంభమవుతుందని.. ఈ ఒప్పందమే క్రమంగా సాధారణ వివాహ స్థాయికి చేరుకుంటుందని కోర్టు చెప్పింది. అయితే ఇక్కడే కొన్ని న్యాయపరమైన బాధ్యతలు ఏర్పడతాయని గుర్తు చేసింది. విడాకులు ఇచ్చిన మాజీ భార్యకు సాయం అందించడం కూడా అందులోని ఒకటేనని విషయం గుర్తు పెట్టుకోవాలని స్పష్టం చేసింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి