Kisan Credit Card: కిసాన్ క్రెడిట్ కార్డ్ స్కీమ్ అంటే ఏమిటి? ఇది ఎలా పొందాలి, దాని ద్వారా కలిగే ప్రయోజనాలు
రైతులకు సాగు ఖర్చుల కోసం తక్కువ వడ్డీతో సకాలంలో రుణాలు అందించేందుకు ప్రభుత్వం 1998-99లో కిసాన్ క్రెడిట్ కార్డ్ (KCC) పథకాన్ని ప్రారంభించింది. రైతులు సులభమైన ప్రక్రియ ద్వారా ఈ కార్డును పొందవచ్చు.
KCC farmer loan scheme | రైతుల కోసం కేంద్ర ప్రభుత్వం ప్రతి ఏడాది పీఎం కిసాన్ యోజన కింద రూ.6 వేలు అందిస్తుంది. అదే విధంగా గతంలో కిసాన్ క్రెడిట్ కార్డ్ పథకం 1998–99 సంవత్సరంలో ప్రారంభించింది. ఎక్కువ డాక్యుమెంట్స్ అవసరం లేకుండా, రైతులను బ్యాంకింగ్ వ్యవస్థతో అనుసంధానించడం ద్వారా వారికి సకాలంలో లోన్ అందించడమే దీని లక్ష్యం. సకాలంలో లోన్స్ అందించడంలో ఈ స్కీమ్ వారికి ఎంతో మేలు చేస్తోంది.
తక్కువ వడ్డీ రేటు, సులభమైన ప్రక్రియ కారణంగా గ్రామీణ ప్రాంతాల్లో కిసాన్ క్రెడిట్ కార్డ్ వినియోగం వేగంగా పెరిగింది. దీని ద్వారా రైతులు విత్తనాలు, ఎరువులు, పురుగు మందులు, పశుపోషణతో పాటు ఇతర వ్యవసాయ పనుల కోసం కూడా ఆర్థిక సాయం పొందవచ్చు. ఈ కిసాన్ క్రెడిట్ కార్డ్ ఎలా పొందాలో, దీనికి ఏయే డాక్యుమెంట్స్ అవసరమో తెలుసుకుంటే రైతులకు ప్రయోజనకరంగా ఉంటుంది.
కిసాన్ క్రెడిట్ కార్డ్ స్కీమ్ అంటే ఏమిటి?
కిసాన్ క్రెడిట్ కార్డ్ పథకాన్ని 1998-99 లో ప్రభుత్వం ప్రారంభించింది. ఎక్కువ పేపర్ వర్క్, ఎక్కువ డాక్యుమెంటేషన్ లేకుండానే రైతులను బ్యాంకింగ్ వ్యవస్థతో అనుసంధానిస్తూ, వారికి సకాలంలో లోన్స్ అందించడమే దీని ఉద్దేశ్యం. ఈ స్కీమ్ కింద రైతులకు స్వల్పకాలిక రుణాలు (Short term loans) ఇస్తారు. వీటిని రైతులు వ్యవసాయం, ఇతర ఖర్చుల కోసం ఉపయోగించుకోవచ్చు.
కిసాన్ క్రెడిట్ కార్డ్ ఎలా పొందాలి?
కిసాన్ క్రెడిట్ కార్డ్ పొందడానికి రైతులు తమ సమీపంలోని బ్యాంకుకు వెళ్లాలి. అక్కడ KCC కోసం అప్లికేషన్ ఫాం నింపాలి. తర్వాత అవసరమైన డాక్యుమెంట్లను జతచేసి బ్యాంకులో సబ్మిట్ చేయాలి. ఆ తర్వాత బ్యాంకు అధికారులు దరఖాస్తును, డాక్యుమెంట్లను పరిశీలిస్తారు. అలాగే రైతు భూమి, ఆదాయానికి సంబంధించిన వివరాలను నిర్ధారించుకుంటారు. అన్ని వివరాలు సరిగ్గా ఉన్నాయని నిర్ధారించుకున్న తర్వాత, బ్యాంకు రైతులకు కిసాన్ క్రెడిట్ కార్డ్ (Kisan Credit Card) జారీ చేస్తుంది. దీని ద్వారా నిర్ణీత పరిమితి వరకు రుణం తీసుకోవచ్చు.
అవసరమైన డాక్యుమెంట్స్
కిసాన్ క్రెడిట్ కార్డ్ పొందడానికి కొన్ని డాక్యుమెంట్లు కావాలి.
గుర్తింపు కార్డు: ఆధార్ కార్డ్, ఓటర్ ఐడి, పాన్ కార్డ్ లేదా డ్రైవింగ్ లైసెన్స్.
అడ్రస్ ప్రూఫ్: అడ్రస్ నిర్ధారించే డాక్యుమెంట్స్, పుట్టిన తేదీ సర్టిఫికెట్
భూమి పత్రాలు: పట్టాదారు పాస్ బుక్, ఖస్రా- ఖతౌనీ లేదా భూమికి సంబంధించిన రశీదులు సబ్మిట్ చేయాలి.
ఇతర వివరాలు: బ్యాంకు అకౌంట్ వివరాలు, పాస్పోర్ట్ సైజ్ ఫోటోలు, సంతకం చేసిన అప్లికేషన్ ఫారమ్.
బ్యాంకులో డాక్యుమెంట్స్ సమర్పించేటప్పుడు వాటి జిరాక్స్ స్పష్టంగా ఉండాలి. అవసరమైతే ఒరిజినల్ పత్రాలను కూడా వెంట తీసుకెళ్లండి.
ఎవరు దరఖాస్తు చేసుకోవచ్చు?
వ్యక్తిగత రైతులు
ఉమ్మడి రైతులు
కౌలు రైతులు
వాటాదారులు, వ్యవసాయానికి సంబంధించిన ఇతర వ్యక్తులు.
వ్యవసాయ పనులతో సంబంధం ఉన్న ఎవరైనా కిసాన్ క్రిడిట్ కార్డ్ కోసం దరఖాస్తు చేసుకోవచ్చు. కిసాన్ క్రెడిట్ కార్డ్ ద్వారా రైతులకు చాలా తక్కువ వడ్డీకే లోన్స్ వస్తాయి. ప్రభుత్వం ఆ వడ్డీపై సబ్సిడీ కూడా ఇస్తుంది. దీనివల్ల రైతన్నకు మరింత ప్రయోజనం కలుగుతుంది. రైతులకు ఏటీఎం (ATM) వంటి సదుపాయం ఉన్న కార్డ్ ఇస్తారు. దీంతో వారు అవసరమైనప్పుడు క్యాష్ తీసుకోవచ్చు. కొన్ని సందర్భాల్లో బీమా కవరేజ్ కూడా లభిస్తుంది. దీనిద్వారా ప్రమాదకర పరిస్థితుల్లో వారికి ఆర్థిక సహాయం అందుతుంది.
టాప్ హెడ్ లైన్స్
ట్రెండింగ్ వార్తలు
