TVK Vijay CBI Case: టీవీకే విజయ్కు సీబీఐ పిలుపు - పది రోజుల గడువు కోరిన దళపతి - ఒత్తిడి ప్రారంభమయిందా?
Karur Stampade Case: విజయ్కు సీబీఐ తాజాగా సమన్లు జారీ చేసింది. కరూర్ తొక్కిసలాట కేసులో మంగళవారం విచారణ కావాలని ఆదేశించింది. అయితే విజయ్ హాజరయ్యే అవకాశాలు కనిపించడం లేదు.
CBI issues notice to TVK Vijay again: తమిళనాడులోని కరూర్లో గతేడాది జరిగిన ఘోర తొక్కిసలాట ఘటనపై సెంట్రల్ బ్యూరో ఆఫ్ ఇన్వెస్టిగేషన్ దర్యాప్తును ముమ్మరం చేసింది. ఈ కేసులో తదుపరి విచారణ కోసం తమిళగ వెట్రి కజగం (TVK) అధ్యక్షుడు, నటుడు విజయ్కు సీబీఐ తాజాగా సమన్లు జారీ చేసింది. మార్చి 10వ తేదీన ఢిల్లీలోని సీబీఐ ప్రధాన కార్యాలయంలో విచారణకు హాజరుకావాలని ఆదేశించింది. ఈ కేసులో విజయ్ను ప్రశ్నించడం ఇది మూడోసారి. గతంలో జనవరి 12 , 19 తేదీల్లో ఆయనను సుదీర్ఘంగా ప్రశ్నించిన అధికారులు, తాజాగా సేకరించిన కొత్త సాక్ష్యాధారాల ఆధారంగా మరికొన్ని వివరణలు కోరనున్నారు.
ఈ విషాద ఘటన 2025 సెప్టెంబర్ 27న విజయ్ తన రాజకీయ పార్టీ తొలి బహిరంగ సభను కరూర్లో నిర్వహించినప్పుడు చోటుచేసుకుంది. ఆ రోజు సుమారు 10,000 మంది వస్తారని నిర్వాహకులు అంచనా వేయగా, వాస్తవానికి 30,000 మందికి పైగా జనం తరలివచ్చారు. దీనికి తోడు విజయ్ రాక ఏడు గంటల పాటు ఆలస్యం కావడంతో, ఎండలో వేచి ఉన్న జనం ఒక్కసారిగా అసహనానికి గురై ముందుకు తోసుకురావడంతో తొక్కిసలాట జరిగింది. ఈ ప్రమాదంలో 18 మంది మహిళలు, 10 మంది చిన్నారులతో సహా మొత్తం 41 మంది ప్రాణాలు కోల్పోగా, వందలాది మంది గాయపడ్డారు.
తొలుత ఈ కేసును రాష్ట్ర పోలీసులు విచారించినప్పటికీ, బాధితుల కుటుంబాలకు న్యాయం జరగాలని, దర్యాప్తు నిష్పక్షపాతంగా ఉండాలని సుప్రీంకోర్టు ఆదేశించడంతో ఈ కేసు సీబీఐకి బదిలీ అయ్యింది. సభ నిర్వహణలో తగిన జాగ్రత్తలు తీసుకోలేదని, భద్రతాపరమైన లోపాలు ఉన్నాయని ఆరోపణలు రావడంతో సుప్రీంకోర్టు స్వయంగా పర్యవేక్షక కమిటీని ఏర్పాటు చేసి దర్యాప్తును పర్యవేక్షిస్తోంది. ర్యాలీ నిర్వహణకు ముందు పోలీసుల నుంచి పొందిన అనుమతులు, సభ నిర్వహణలో పార్టీ వాలంటీర్ల సమన్వయం మరియు విజయ్ రాకలో జరిగిన ఆలస్యం వంటి అంశాలపై సీబీఐ దృష్టి సారించింది.
ప్రస్తుతం విజయ్ తన రాజకీయ పార్టీ అభ్యర్థుల ఎంపిక మరియు 2026 అసెంబ్లీ ఎన్నికల ప్రచార ప్రణాళికల్లో బిజీగా ఉన్నారు. ఈ కారణంగా సీబీఐ విచారణకు హాజరయ్యేందుకు తనకు కనీసం 10 రోజుల సమయం కావాలని విజయ్ తరపు న్యాయవాదులు ఒక విన్నపాన్ని సమర్పించారు. తన రాజకీయ బాధ్యతలతో పాటు, వ్యక్తిగత జీవితంలో సాగుతున్న విడాకుల కేసు విచారణల దృష్ట్యా తక్షణమే ఢిల్లీకి రావడం సాధ్యం కాదని ఆయన పేర్కొన్నారు. అయితే, సీబీఐ అధికారులు మాత్రం మరికొంత మంది టీవీకే పార్టీ ముఖ్య నేతలకు కూడా సమన్లు జారీ చేసే యోచనలో ఉన్నారు.
తమిళనాడు అసెంబ్లీ ఎన్నికలకు సమయం దగ్గరపడుతున్న వేళ, ఈ సీబీఐ విచారణ విజయ్ రాజకీయ భవిష్యత్తుపై ప్రభావం చూపే అవకాశం ఉందని విశ్లేషకులు భావిస్తున్నారు. బాధితుల కుటుంబాలు ఇప్పటికీ ఈ ఘటనకు బాధ్యులైన వారిపై కఠిన చర్యలు తీసుకోవాలని డిమాండ్ చేస్తున్నాయి. మరోవైపు విజయ్ మాత్రం తమ పార్టీ తరపున మృతుల కుటుంబాలకు ఆర్థిక సాయం ప్రకటించి, దర్యాప్తుకు సహకరిస్తామని ఇప్పటికే స్పష్టం చేశారు.
టాప్ హెడ్ లైన్స్
ట్రెండింగ్ వార్తలు
