Chandrababu Singapore Tour: సింగపూర్‌ పర్యటనలో చంద్రబాబు.. ఏపీలో పెట్టుబడులకు వెంచర్ క్యాపిటలిస్టులకు ఆహ్వానం

ఆంధ్రప్రదేశ్ ముఖ్యమంత్రి చంద్రబాబు సింగపూర్‌లో స్టార్టప్ వెంచర్ క్యాపిటలిస్టులతో నిర్వహించిన రౌండ్ టేబుల్ సమావేశంలో పాల్గొన్నారు. ఏపీలో పెట్టుబడులకు ఇది అనుకూలమైన సమయమని ఈ సందర్భంగా పిలుపునిచ్చారు.

సింగపూర్ పర్యటనలో ఏపీ సీఎం చంద్రబాబు

అమరావతి: ఆంధ్రప్రదేశ్ ముఖ్యమంత్రి నారా చంద్రబాబు నాయుడు సింగపూర్‌లో స్టార్టప్ వెంచర్ క్యాపిటలిస్టులతో ఏర్పాటు చేసిన ఉన్నత స్థాయి రౌండ్ టేబుల్ సమావేశంలో పాల్గొన్నారు. ఈ సమావేశంలో సింగపూర్‌లోని భారత హైకమిషనర్ శిల్పక్ అంబులే, రాష్ట్ర పురపాలక శాఖ మంత్రి పి.నారాయణతో పాటు సింగపూర్‌కు చెందిన పలువురు ప్రముఖ స్టార్టప్ వెంచర్ క్యాపిటలిస్టులు, పెట్టుబడిదారులు హాజరయ్యారు.

ఈ సందర్భంగా ఏపీ సీఎం చంద్రబాబు మాట్లాడుతూ.. భారత్ ఇప్పుడు నిద్రిస్తున్న ప్రాంతం కాదని, విప్లవాత్మక సంస్కరణలతో ప్రపంచంలోనే దూసుకుపోతున్న ఒక అతిపెద్ద ఆర్థిక శక్తిగా అవతరించిందని స్పష్టం చేశారు. ప్రధానమంత్రి నరేంద్ర మోదీ లాంటి ఆధునిక ఆలోచనలు ఉన్న వ్యక్తి నేతృత్వంలో దేశం అద్భుతమైన వేగంతో అభివృద్ధి చెందుతోందని కొనియాడారు. చైనా వంటి దేశాలు ఆర్థిక వృద్ధి సాధించడానికి దశాబ్దాల కాలం పట్టిందని, కానీ భారత్‌కు అంత సమయం పట్టడం లేదని ఆయన విశ్లేషించారు.

ప్రస్తుతం మెడికల్ టెక్నాలజీతో పాటు ఇతర ఆధునిక పరికరాల తయారీలో భారత్ ప్రపంచంలోనే అగ్రస్థానంలో నిలుస్తోందని చంద్రబాబు పేర్కొన్నారు. ఒకప్పుడు దిగుమతులపై ఆధారపడిన భారత్ నుంచి ఇప్పుడు ఎలక్ట్రానిక్స్ పరికరాలు భారీగా ఎగుమతి అవుతున్నాయని, ఐదో తరం యుద్ధ విమానాల తయారీ సహా అత్యుత్తమ రక్షణ, పారిశ్రామిక ఉత్పత్తులు దేశంలోనే తయారవుతున్నాయని వెల్లడించారు. భారత్‌కు ఉన్న అతిపెద్ద బలం ఇక్కడి ‘డెమోగ్రాఫిక్ డివిడెంట్’ అని, ప్రపంచంలోనే మరే దేశానికి లేని విధంగా అతిపెద్ద యువశక్తి కలిగిన మానవ వనరులు భారత్ సొంతమని అన్నారు. ఈ మానవ వనరులను సమర్థవంతంగా వాడుకుంటూ, తయారీ రంగాన్ని మరింత ప్రోత్సహించేలా ఆంధ్రప్రదేశ్‌లో తాము ‘వన్ ఫ్యామిలీ, వన్ ఎంట్రప్రెన్యూర్’ (ఇంటికో పారిశ్రామికవేత్త) అనే వినూత్న విధానాన్ని అనుసరిస్తున్నట్లు చంద్రబాబు వివరించారు.

ఆంధ్రప్రదేశ్‌లో పెట్టుబడులకు ఉన్న అనుకూల వాతావరణాన్ని వివరించారు. భూ సమీకరణ అనే విధానం ద్వారా ఎలాంటి వివాదాలు లేకుండా ప్రాజెక్టులకు భూములు కేటాయిస్తున్నామని ఏపీ సీఎం చంద్రబాబు తెలిపారు. ఏపీ రాజధాని అమరావతిని సైతం ఇదే ల్యాండ్ పూలింగ్ ప్రాతిపదికన నిర్మిస్తున్నామని వెల్లడించారు. పారిశ్రామిక సానుకూల విధానాల వల్లనే ఆమ్కా, గూగుల్, ఆర్సెలార్ మిట్టల్ లాంటి అంతర్జాతీయ దిగ్గజ సంస్థలకు అత్యంత వేగంగా అనుమతులు ఇచ్చి భూములు కేటాయించామని గుర్తుచేశారు. రాష్ట్రంలో వివిధ పారిశ్రామిక ప్రాజెక్టులు ఏర్పాటు చేసేందుకు ఇదే అత్యంత సరైన సమయమని, పెట్టుబడిదారులు ఈ అవకాశాన్ని వాడుకోవాలని పిలుపునిచ్చారు. ఏపీలో ఉన్న ‘శ్రీసిటీ’ లాంటి ప్రత్యేక పారిశ్రామిక వాడలు ఇప్పటికే అంతర్జాతీయ స్థాయిలో పెద్ద ఎత్తున పెట్టుబడులను ఆకర్షిస్తున్నాయని తెలిపారు.

రాష్ట్రంలో పౌర సేవలతో పాటు పాలనాపరమైన అన్ని అంశాలకూ అత్యాధునిక టెక్నాలజీని అనుసంధానించామని ఏపీ సీఎం చంద్రబాబు స్పష్టం చేశారు. యువతలో సరికొత్త ఆవిష్కరణలను ప్రోత్సహించడానికి ఏర్పాటు చేస్తున్న ‘రతన్ టాటా ఇన్నోవేషన్ హబ్’ ద్వారా రాష్ట్రంలో పెట్టుబడులకు ఆస్కారం ఏర్పడిందని పేర్కొన్నారు. వెంచర్ క్యాపిటలిస్టులు ఈ హబ్ ద్వారా వచ్చే సరికొత్త స్టార్టప్‌లకు ఆర్థిక తోడ్పాటు, పెట్టుబడులు అందించేందుకు భారీగా అవకాశాలు ఉన్నాయని తెలిపారు. అంతర్జాతీయ స్థాయిలో అత్యుత్తమ సాంకేతిక, వ్యాపార ఆవిష్కరణలను ప్రోత్సహించేందుకు, ఆంధ్రప్రదేశ్ అభివృద్ధిలో భాగస్వాములు కావడానికి వెంచర్ క్యాపిటలిస్టులు ఉత్సాహంతో ముందుకు రావాలని సీఎం చంద్రబాబు ఆకాంక్షించారు.