Viral News: ఊళ్లో తగవు తీర్చలేక తలలు పట్టుకున్న పోలీసులు, ఇట్టే పరిష్కరించిన బర్రె

UP News: యూపీలో వింత ఘటన జరిగింది. ఓ బర్రె కోసం ఇద్దరు వ్యక్తులు తీవ్రంగా గొడవపడ్డారు. బర్రె నేరుగా యజమాని ఇంటికి వెళ్లి సమస్యని పరిష్కరించింది.

యూపీలో వింత ఘటన జరిగింది. ఓ బర్రె కోసం ఇద్దరు వ్యక్తులు తీవ్రంగా గొడవపడ్డారు. బర్రె నేరుగా యజమాని ఇంటికి వెళ్లి సమస్యని పరిష్కరించింది. (Image Credits: Pixabay)

Source : Other

Buffalo Settles Village Dispute: ఊళ్లో పంచాయితీ తీర్చాలంటే పెద్దలు వస్తారు. రచ్చబండ దగ్గర మీటింగ్ పెట్టి ఎవరిది తప్పు ఎవరిది ఒప్పు అనేది డిసైడ్ చేస్తారు. అక్కడా రాజీ కుదరకపోతే పోలీసులు, కోర్టుల చుట్టూ తిరుగుతారు. ఓ ఊళ్లో ఇద్దరి మధ్య జరిగిన గొడవకి బర్రె పరిష్కారం చూపించి ఆ తగవు తీర్చింది. యూపీలోని ప్రతాప్‌గఢ్‌లో జరిగిందీ ఘటన. ఈ బర్రె నాదంటే నాదంటూ ఇద్దరు పంచాయితీ పెట్టుకున్నారు. చివరకు ఆ బర్రె అసలు యజమాని ఇంటికి నడుచుకుంటూ వెళ్లిపోయింది. అక్కడితో ఆ గొడవకు ఫుల్‌స్టాప్ పడింది. ఇదంతా పోలీసుల సమక్షంలోనే జరిగింది. బర్రె కోసం గొడవ పెట్టుకున్న ఇద్దరూ పోలీసుల దగ్గరికి వెళ్లి ఫిర్యాదు చేశారు. ఈ పంచాయితీని ఎలా తేల్చాలో తెలియక కాస్త వినూత్నంగా ఆలోచించారు పోలీసులు. రోడ్డుపైకి తీసుకొచ్చి వదిలి పెట్టారు. అది నేరుగా తన యజమాని ఇంటికి వెళ్లిపోయింది. అక్కడితో ఈ తగవు తీరిపోయింది. 

ఏం జరిగిందంటే..?

ప్రతాప్‌గఢ్‌లోని ఓ గ్రామంలో బర్రె ఉన్నట్టుండి అదృశ్యమైంది. చాలా రోజులుగా జాడ కోసం ప్రయత్నించాడు. దాదాపు మూడు రోజుల పాటు వెతగ్గా మరో వ్యక్తి ఇంట్లో అది కనిపించింది. ఆ వ్యక్తిపై యజమాని ఫిర్యాదు చేశాడు. అక్రమంగా తన బర్రెని లాక్కున్నాడని ఆరోపించాడు. కేసు నమోదు చేసిన పోలీసులకు ఏం చేయాలో అర్థం కాలేదు. గంటల పాటు పంచాయితీ నడిచింది. అయినా బర్రె నాదంటే నాదంటూ ఇద్దరూ వాదించారు. ఈ సమస్యకి బర్రె మాత్రమే పరిష్కారం చూపించగలదని భావించిన పోలీసులు దాన్ని రోడ్డుపైన వదిలేశారు. పోలీస్ స్టేషన్‌ నుంచి నేరుగా అసలు యజమాని ఇంటికి వెళ్లిపోయింది. అప్పటి వరకూ బర్రె నాదని వాదించిన మరో వ్యక్తిని పోలీసులతో పాటు గ్రామస్థులూ మందలించి పంపించారు.