Appendicitis: అపెండిసైటిస్ ఎందుకొస్తుంది? ఎవరికొస్తుంది?
అపెండిసైటిస్ అంటే అర్థంకాదేమో కానీ, ఇరవైనాలుగ్గంటల పొట్ట నొప్పి అంటే మాత్రం అందరికీ ఇట్టే అర్థమైపోతుంది.
ప్రపంచంలో ప్రతి పదమూడు మందిలో ఒకరి అపెండిసైటిస్ బారినపడుతున్నారు. ఒక్క ఇంగ్లాండులోనే ప్రతి ఏడాది 40,000 మంది ఈ పొట్ట నొప్పితో ఆసుపత్రిలో చేరుతున్నారు. మనదేశంలో కూడా ఈ సంఖ్య తక్కువేమీ కాదు. ఏటా వేలమంది కడుపునొప్పి అంటూ ఆసుపత్రిలో చేరి అపెండిసైటిస్ గా నిర్ధారణ చేసుకుంటున్నారు. అసలు అపెండిసైటిస్ ఎందుకొస్తుంది? ఎవరికొస్తుంది? కడుపునొప్పి రాక ముందు లక్షణాలు గుర్తించవచ్చా వంటివి తెలుసుకుందాం.
ఏమిటీ అపెండిసైటిస్?
అపెండిక్స్ అనేది చిన్న సంచిలా ఉండే అవయవం. పెద్దపేగులకు అనుబంధంగా చివరలో వేలాడినట్టు ఉంటుంది. అపెండిసైటిస్ వచ్చినప్పుడు అపెండిక్స్ వాచిపోయి తీవ్రమైన నొప్పి పెడుతుంది. ఆ నొప్పి మనకు పొత్తికడుపు వస్తున్నట్టు అనిపిస్తుంది. అయితే మన శరీరంలో అపెండిక్స్ లేకుండా కూడా జీవించగలదు. కాబట్టి దాన్ని తొలగిస్తుంటారు వైద్యులు.
ఎవరికి అపెండిసైటిస్ వచ్చే అవకాశం ఉంది?
అపెండిసైటిస్ ఏ వయసులో ఉన్న వారికైనా వచ్చే అవకాశం ఉంది. ఎక్కువగా అయితే పదేళ్ల నుంచి ఇరవైఏళ్ల మధ్యలో ఉన్నవారిలో అధికంగా కనిపిస్తుంది. కానీ ఇది ఎందుకు సంభవిస్తుందో మాత్రం ఇంతవరకు సరైన కారణం తెలియరాలేదు.
లక్షణాలేంటి?
నొప్పి హఠాత్తుగా, చాలా తీవ్రంగా వచ్చేస్తుంది. అప్పుడు వైద్యులు మొదటగా అపెండిసైటిస్ ఏమో అని చెక్ చేస్తారు. కానీ నొప్పి కన్నా ముందు కొన్ని లక్షణాలు కనిపించవచ్చు. అవి కాస్త నీరసంగా అనిపించడం, ఆకలి లేకపోవడం, విరేచనాలు కావడం, జ్వరం రావడం వంటివి కనిపించవచ్చు.
అపెండిసైటిస్ రావడానికి కారణాలేంటి?
ఈ పరిస్థితి ఎందుకొస్తుందో ఇంతవరకు సరైన కారణం తేలలేదు. అపెండిక్స్ ప్రవేశద్వారం మూసుకుపోయినప్పుడు ఇలా జరుగుతుందని భావిస్తారు. మలం అడ్డుపడడమో లేక, ఏదైనా కణితి పుట్టి ఇలా మూసుకుపోవడం జరగుతుంటుంది. ఈ పరిస్థితి ఏర్పడకుండా నిరోధించడం కష్టమే.
చికిత్స ఎలా ఉంటుంది?
అపెండిసైటిస్ రెండు రకాలు. ఒకటి దీర్ఘకాలిక లక్షణాలతో సాగితే, మరొకటి తీవ్రంగా వస్తుంది. అపెండిసైటిస్ తీవ్రంగా మారితే అపెండిక్స్ పగిలిపోయే ప్రమాదం ఉంది. వెంటనే చికిత్స చేయకపోతే ప్రాణాంతకంగా మారుతుంది. సమస్య చిన్నదైతే యాంటీ బయోటిక్స్ ఇచ్చి చికిత్స చేస్తారు. తీవ్రమైనదైతే ఆ అవయవాన్ని తొలగిస్తారు. దాని వల్ల మానవ శరీరానికి పెద్దగా ఉపయోగం ఉండదు.
ముఖ్య గమనిక: ఆరోగ్య నిపుణులు, పలు అధ్యయనాల్లో పేర్కొన్న అంశాలను ఇక్కడ యథావిధిగా అందించాం. మీకు ఎలాంటి సందేహాలు ఉన్నా వైద్యుడు లేదా ఆహార నిపుణులను సంప్రదించాలి. ఈ కథనం కేవలం మీ అవగాహన కోసమేనని గమనించగలరు.
Also read: చేపలతో తలనొప్పికి విరుగుడు... తరచూ తింటే మైగ్రేన్ మాయం
Also read: కోవిడ్ తరువాత పెరుగుతున్న కోపం... ఇలా తగ్గించుకోండి
Also read: వంటనూనెల్లో ఏది మంచిది? ఏ నూనె ఆరోగ్యానికి ఎక్కువ మేలు చేస్తుంది?
ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి
టాప్ హెడ్ లైన్స్
ట్రెండింగ్ వార్తలు
