BreastMilk: బాలింతలకు పాలు బాగా పడాలంటే కొన్ని చిట్కాలు ఇవిగో...

నెలల పిల్లలకు అమ్మ పాలే ఆహారం. తల్లి పాలు సరిగా పడాలంటే కొన్ని చిట్కాలు ఇవిగో.

(Image credit: Pixabay)

ఏడాదిలోపు పిల్లలకు తల్లి పాలు చాలా అవసరం. ఇక ఆరునెలలలోపు పిల్లలకైతే తల్లి పాలు మాత్రమే ఆహారం. కాబట్టి బాలింతలకు పాలు పుష్కలంగా పడితేనే బిడ్డల పొట్ట నిండేది. కానీ కొంత మంది తల్లులకు పాలు సరిగా పడవు. బిడ్డలకు సరిపడక... పోత పాలు పోయాల్సిన పరిస్థితి వస్తుంది. కొన్ని రకాల ఆహారాలు రోజూ తింటే బాలింతల్లో పాల ఉత్పత్తి పెరుగుతుంది. చిన్న చిన్న చిట్కాల ద్వారా పాలు అధికంగా ఉత్పత్తి అయ్యేలా చేసుకోవచ్చు. 

1. మునక్కాయల కూర, మునక్కాయల రసం వంటివి చేసుకుని తింటుండాలి. అలాగే మునక్కాయలను బాగా శుభ్రం చేసి పైన పొట్టు తీసేయాలి. మిగతా భాగాలను మిక్సీలో వేసి, నీళ్లు పోసి రసం తయారుచేయాలి. వాటిని వడకట్టి ఓ అరకప్పు తాగితే చాలా మంచిది. రోజుకోసారి తాగితే పాలు ఉత్పత్తి అయ్యే అవకాశం ఉంది. 
2. సోంపు గింజలు కూడా పాల  ఉత్పత్తిని పెంచే లక్షణాలను కలిగి ఉంటాయి. సోంపు గింజలను నీళ్లలో మరిగించి, అనంతరం వడకట్టాలి. ఆ నీటిని తరచూ తాగుతూ ఉంటే పాల ఉత్పత్తి పెరుగుతుంది. 
3. మెంతుల్లో కూడా పాల ఉత్పత్తిని పెంచే లక్షణాలు ఉన్నాయి.టీస్పూను మెంతులను నీటిలో మరిగించి వడకట్టి అర గ్లాసు నీటిని తేనే కలుపుకుని తాగాలి. ఇలా రోజుకు రెండు సార్లు తాగితే మంచిది. ఆగకుండా పాల గ్రంధులు ఉత్పత్తి చేస్తూనే ఉంటాయి. మెంతుల్లో ఫైటో ఈస్ట్రోజెన్ ఉంటుంది. ఇది పాల ఉత్పత్తిని పెంచుతుంది. 
4. దాల్చిన చెక్కతో టీ తయారు చేసుకుని తాగినా మంచి జరుగుతుంది. లేదా చిటికెడు దాల్చిన చెక్క పొడిని వేడి నీళ్లలో కలుపుకుని తాగినా, లేదా పాలలో కలుపుకుని తాగినా మంచిదే. 
5. వెల్లుల్లి రెబ్బల్లోను పాల ఉత్పత్తిని పెంచే లక్షణాలు అధికం. కాబట్టి వెల్లుల్లి రెబ్బలను ఆహారంలో భాగం చేసుకోవాలి. నేరుగా తినలేమనుకునే వారు, కూరల్లో ఎక్కువగా వేసుకుని తింటే మంచిది. పాలు బాగా ఉత్పత్తి అవుతాయి. 
6. రోజుకో గుప్పెడు నానబెట్టిన బాదం పప్పులను తింటే చాలా మేలు. బాదం పప్పులో ఉండే ఒమెగా 3 ఫ్యాటీ ఆమ్లాలు పుష్కలంగా ఉంటాయి. బాదం పాలు తాగినా మంచిదే. 
7. మటన్ కూరలో కూడా లాక్టోజెనిక్ లక్షణాలు అధికం. రోజూ మటన్ కూర తినడం వల్ల బాలింతల్లో పాల ఉత్పత్తి పెరుగుతుంది. 
8. పాలిచ్చే తల్లులు రోజూ ఆవు లేదా గేదె పాలు తాగిన మంచి ఫలితం ఉంటుంది. ఖాళీ పొట్టతో మాత్రం ఉండకూడదు. ఏదో ఒకటి ప్రతి రెండు మూడు గంటలకోసారి తింటూనే ఉండాలి.