Spong Dosa : మీకు దోశలు మెత్తగా ఉంటే ఇష్టమా? అయితే టేస్టీ, సింపుల్ రెసిపీని ఫాలో అయిపోండి

South Indian Breakfast : దోశలు కొందరికి కరకరలాడితే ఇష్టం. మరికొందరికి మెత్తగా ఉంటే ఇష్టం. మీకు కూడా మెత్తని దోశలు అంటే ఇష్టమైతే.. ఈ టేస్టీ రెసిపీని ఫాలో అయిపోండి.

టేస్టీ దోశల రెసిపీ (Images Source : Envato)

Source : envato

Tasty Dosa Recipe : దోశలను ఎలా చేసుకున్నా బాగుంటాయి. అందుకే వివిధ రకాల దోశలు మనకి అందుబాటులో ఉంటాయి. కానీ కొన్ని టేస్ట్​లు మాత్రం చాలా యూనిక్​గా మళ్లీ మళ్లీ తినాలనిపించేలా చేస్తాయి. అలాంటి వాటిలో మెత్తని దోశలు కూడా ఒకటి. కొందరు దోశలు కరకరలాడితే బాగుంటుంది అనుకుంటారు. మరికొందరు మెత్తగా తింటే బాగుంటుంది అనుకుంటారు. అలాంటి మెత్తటి దోశలను ఎలా చేసుకోవాలో.. కావాల్సిన పదార్థాలు ఏమిటో.. ఏ టిప్స్​ని ఫాలో అయితే రుచి మరింత బాగుంటుందో ఇప్పుడు తెలుసుకుందాం. 

కావాల్సిన పదార్థాలు 

సగ్గు బియ్యం - 1 కప్పు 

బియ్యం - రెండు కప్పులు

పెరుగు - పావు కప్పు

బేకింగ్ సోడా - పావు టీస్పూన్ 

ఉప్పు - రుచికి తగినంత

పచ్చిమిర్చి - 2

అల్లం - అర అంగుళం

నూనె - దోశలు వేసుకునేందుకు 

తయారీ విధానం

ఉదయాన్నే తినాలనుకుంటే ముందురోజు రాత్రి.. నైట్ తినాలనుకుంటే ఓ మూడు గంటల ముందు సగ్గుబియ్యాన్ని నానబెట్టుకోవాలి. అలాగే బియ్యాన్ని కూడా బాగా కడిగి వేరుగా నానబెట్టుకోవాలి. ఇలా నానబెట్టుకున్న సగ్గుబియ్యాన్ని.. మిక్సీ జార్​లోకి తీసుకోవాలి. దానిలో పచ్చిమిర్చి, అల్లం, జీలకర్ర కూడా వేసుకుని మెత్తగా రుబ్బుకోవాలి. ఎంత మిక్సీ చేసినా.. సగ్గుబియ్యంలో కొంత గరుకు ఉండిపోతుంది. 

ఇప్పుడు ఓ మిక్సింగ్ బౌల్​ తీసుకుని.. దానిపై జల్లెడ లేదా పెద్ద టీ గరిట పెట్టి మిక్సీ చేసుకున్న సగ్గుబియ్యం పిండిని వేసి గరిటతో తిప్పాలి. ఇలా చేయడం వల్ల గరుకు పైన ఉండిపోతుంది. మెత్తని పిండి బౌల్​లోకి వెళ్లిపోతుంది. ఇలా తీసుకున్న పిండిలో పెరుగు వేసి బాగా కలపాలి. ఇప్పుడు మిక్సీ జార్​లోకి బియ్యాన్ని తీసుకోవాలి. బియ్యాన్ని మెత్తని పేస్ట్​గా చేసుకోవాలి. ముందుగా సిద్ధం చేసుకున్న మిక్సింగ్​ బౌల్​లో ఈ బియ్యం పిండిని వేయాలి. 

బియ్యం పిండి, సగ్గుబియ్యం పిండిని బాగా మిక్స్ చేయాలి. దానిలో ఉప్పు, బేకింగ్ సోడా కూడా వేసుకుని.. అన్ని కలిసేలా బాగా కలుపుకోవాలి. ఇలా తయారు చేసుకున్న పిండిని ఓ పదినిమిషాలు పక్కన పెట్టాలి. బేకింగ్ సోడా వేయడం వల్ల పిండి కాస్త పొంగుతుంది. అందుకే దానిని మరోసారి కలుపుకోవాలి. ఈ బ్యాటర్ దోశలు వేసుకోవడానికి సిద్ధంగా ఉంది. ఇప్పుడు స్టౌవ్ వెలిగించి దానిపై దోశ పాన్​ పెట్టాలి. 

తయారు చేసుకున్న పిండిని దోశలుగా వేసుకోవాలి. బాగా పలుచగా చేయకూడదు. చుట్టూ అంచుల, మధ్యలో కాస్త నూనె వేసి.. ఉడకనివ్వాలి. సగ్గుబియ్యంతో చేశాము కాబట్టి ఈ దోశ తయారవ్వడానికి ఎక్కువ సమయం పడుతుంది. కాబట్టి కాస్త నిదానంగా దోశలు వేసుకోవాలి. ఒకవైపు దోశ ఉడికిన తర్వాత.. మరోవైపు తిప్పి దోశను కాల్చుకోవాలి. రెండువైపులా దోశ ఉడికితే తినడానికి సిద్ధం. ఇవి మెత్తగా నోటికి చాలా రుచిగా ఉంటాయి. వీటిని పల్లీ చట్నీతో తీసుకుంటే ఆ రుచిని వర్ణించడం కష్టమే. అంత అద్భుతంగా ఉంటాయి.