Alzheimers Diet : మాంసం తింటే జ్ఞాపకశక్తి పెరిగి, అల్జీమర్స్ ప్రమాదం తగ్గుతుందట.. న్యూ స్టడీలో ఇంట్రెస్టింగ్ విషయాలు
Memory with Meat : అల్జీమర్స్, డిమెన్షియా ప్రమాదం ఉన్నవారు తమ డైట్లో మాంసం చేర్చుకుంటే చాలామంచిదని తాజా అధ్యయనం చెప్తుంది. ఇది ఎంతవరకు నిజమో చూసేద్దాం.
Meat Consumption Improve Brain Health : మీ శరీరంలో అల్జీమర్స్ వ్యాధితో సంబంధం ఉన్న జన్యువు ఉంటే.. మీరు తీసుకునే ఆహారంలో చిన్న మార్పు చేయాలని అంటున్నారు. దీంతో డిమెన్షియా ప్రమాదాన్ని చాలా వరకు తగ్గించవచ్చని అంటున్నారు. క్రమం తప్పకుండా మాంసం తినేవారిలో జ్ఞాపకశక్తి బలహీనపడటం, డిమెన్షియా వచ్చే ప్రమాదం దాదాపు సగానికి తగ్గుతుందని తాజా అధ్యయనం వెల్లడించింది.
శాస్త్రవేత్తల ప్రకారం.. APOE అనే జన్యువు అల్జీమర్తో ముడిపడి ఉంది. ఇది చాలా కేసులలో కనిపిస్తుంది. ముఖ్యంగా APOE4 వేరియంట్ ఉన్నవారిలో డిమెన్షియా వచ్చే ప్రమాదం ఎక్కువగా ఉంటుంది. కానీ అలాంటి వారు తమ డైట్లో మాంసం తీసుకోవడం పెంచితే.. దాని సానుకూల ప్రభావం వారి మెదడుపై పడుతుందని పరిశోధనలో తేలినట్లు గుర్తించారు.
పరిశోధనలో ఏమి కనుగొన్నారంటే..
ఈ అధ్యయనాన్ని స్టాక్హోమ్ విశ్వవిద్యాలయానికి చెందిన పరిశోధకులు నిర్వహించారు. ఇందులో 60 ఏళ్లు లేదా అంతకంటే ఎక్కువ వయస్సు ఉన్న 2000 మందికి పైగా వ్యక్తులను దాదాపు 15 సంవత్సరాల పాటు ట్రాక్ చేశారు. ఈ సమయంలో వారి ఆహారపు అలవాట్లను గమనించారు. ముఖ్యంగా మాంసం తీసుకోవడంపై దృష్టి పెట్టారు. దీంతో పరిశోధన ఫలితాలు ఆశ్చర్యకరంగా వచ్చాయి. APOE4 జన్యువు ఉన్నా.. ఎక్కువ మాంసం తినేవారిలో డిమెన్షియా వచ్చే ప్రమాదం తగ్గిందని గుర్తించారు. అంతేకాకుండా వారి ఆలోచనా సామర్థ్యం కూడా మెరుగైనట్లు గుర్తించారు. అలాగే మానసిక క్షీణత నెమ్మదించింది.
మాంసం తింటే మంచిదే కానీ..
ఇక్కడ తెలుసుకోవాల్సిన ముఖ్యమైన విషయం వెలుగులోకి వచ్చింది. ఎందుకంటే మాంసం మంచిది కదా అని అన్ని రకాల మాంసం తినకూడదట. ప్రాసెస్ చేసిన మాంసం, బేకన్, సాసేజ్ లేదా ఎక్కువ ప్రాసెస్ చేసిన మాంసం మెదడుకు హానికరమై డిమెన్షియా ప్రమాదాన్ని పెంచుతాయట. అంటే మీరు ప్రయోజనం కావాలనుకుంటే.. ప్రాసెస్ చేయని మాంసానికి ప్రాధాన్యత ఇవ్వడం అవసరం. ఈ ప్రయోజనం వెనుక విటమిన్ B12 పాత్ర ఉంటుందని శాస్త్రవేత్తలు భావిస్తున్నారు. మాంసంలో ఈ విటమిన్ మంచి మొత్తంలో లభిస్తుంది. ఇది మెదడు ఆరోగ్యం, జ్ఞాపకశక్తికి చాలా అవసరం. B12 లోపం ఉంటే.. జ్ఞాపకశక్తి బలహీనపడటం, అర్థం చేసుకోవడంలో ఇబ్బంది, మానసిక సమస్యలు కూడా వస్తాయి.
మెదడు ఆరోగ్యం కోసం
అయితే ఈ పరిశోధన ఇంకా ప్రారంభ దశలో ఉందని, దీనిని తుది నిర్ధారణగా పరిగణించలేమని శాస్త్రవేత్తలు కూడా భావిస్తున్నారు. జీవనశైలి, ఆర్థిక స్థితి, ఇతర అలవాట్లు కూడా దీనిపై ప్రభావం చూపుతాయని కొంతమంది నిపుణులు అంటున్నారు. అయినప్పటికీ సరైన ఆహారం, చురుకైన జీవనశైలి, మానసికంగా చురుకుగా ఉండటం వల్ల మెదడును ఎక్కువ కాలం ఆరోగ్యంగా ఉంచడంలో సహాయపడతాయని చెప్తున్నారు.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
