Heat Rash : చెమట పొక్కులు రాకుండా తీసుకోవాల్సిన జాగ్రత్తలు.. వస్తే తగ్గించుకునేందుకు ఫాలో అవ్వాల్సిన చిట్కాలు
Heat Rash in Summer : వేసవిలో వచ్చే స్కిన్ సమస్యల్లో హీట్ ర్యాష్ ఒకటి. ఈ చెమట పొక్కులు మంట, దురదతో ఇబ్బంది పెడతాయి. మీకు ఈ సమస్య తగ్గించుకోవాలంటే ఈ టిప్స్ ఫాలో అవ్వండి.
- చెమట గ్రంధులు మూసుకుపోవడం, తేమ వల్ల చర్మంపై పొక్కులు ఏర్పడతాయి.
- పరీక్షించని దుస్తులు, మందపాటి క్రీములు వాడకం వల్ల పొక్కులు పెరుగుతాయి.
- చల్లటి స్నానాలు, కలబంద, గంధం వంటి ఇంటి చిట్కాలు ఉపశమనం కలిగిస్తాయి.
- కాటన్ దుస్తులు, నీళ్లు తాగడం, మధ్యాహ్నం ఎండలో తిరగకపోవడం ముఖ్యం.
Tips to Prevent and Treat Heat Rash : వేసవిలో ఉష్ణోగ్రత పెరిగినప్పుడు చాలామంది చర్మంపై చిన్న చిన్న ఎర్రటి పొక్కులు, మంట, దురదతో ఇబ్బంది పడతారు. వాటినే చెమట పొక్కులు అంటారు. ఎండకాలంలో పిల్లల నుంచి పెద్దల వరకు అందరూ ఈ సమస్యతో బాధపడుతుంటారు. అయితే వీటిని కొన్ని జాగ్రత్తలు తీసుకుంటే తగ్గించుకోవచ్చు. రాకుండా ఎలాంటి జాగ్రత్తలు తీసుకోవాలి? వస్తే తగ్గించుకునేందుకు ఎలాంటి టిప్స్ ఫాలో అవ్వాలో చూసేద్దాం.
చెమట పొక్కులకు కారణాలు
చెమట పొక్కులు చెమట గ్రంధులు మూసుకుపోవడం వల్ల వస్తాయి. అంటే చెమట గ్రంధులు బ్లాక్ అయి.. చెమట చర్మం కింద చేరుకుంటుంది. ఆ ప్రదేశంలో మంట, దురదతో కూడిన పొక్కులు వస్తాయి. అలాగే తేమ ఎక్కువగా ఉన్నప్పుడు చెమట ఆరదు. చర్మం తడిగా ఉండటంతో బ్యాక్టీరియా పెరిగి కూడా స్కిన్పై ర్యాష్ వస్తుంది.
వేసవిలో, ఎండ ఎక్కువగా ఉన్నప్పుడు నైలాన్, పాలీస్టర్ వంటి బట్టలు వేసుకుంటే.. అవి గాలిని పాస్ చేయవు. దీనివల్ల చర్మానికి గాలి అందక పొక్కులు వస్తాయి. అలాగే పొడి చర్మాన్ని దూరం చేసుకోవడానికి మందపాటి క్రీములు రాయడం వల్ల పోర్స్ మూసుకుపోతాయి. ఇది కూడా చెమటపొక్కులకు కారణమే.
ఎవరికి ఎక్కువ వస్తాయంటే..
పిల్లల్లో చెమట గ్రంధులు పూర్తి అభివృద్ధి చెందవు కాబట్టి వారికి త్వరగా హీట్ ర్యాష్ వస్తుంది. ఎక్కువ సేపు కూర్చుని పని చేయడం, వ్యాయామం లేకపోవడం వల్ల చర్మం మరింత వేడెక్కుతుంది. అలాంటివారికి కూడా ఇవి వస్తాయి.
తగ్గించుకునేందుకు ఇంటి చిట్కాలు..
చెమట పొక్కులు ఇబ్బంది పెడుతుంటే రోజుకు రెండు సార్లు చల్లటి నీటితో స్నానం చేయండి. సబ్బు తక్కువగా వాడాలి. అలాగే తాజా అలోవెరా జెల్‌ని నేరుగా పొక్కులపై రాస్తే.. ఇది నొప్పి, మంటను తగ్గించి చర్మాన్ని చల్లగా చేస్తుంది. రోజుకు 2–3 సార్లు చేస్తే ఉపశమనం ఉంటుంది. గంధం, రోజ్ వాటర్ కలిపి చర్మానికి అప్లై చేసి.. తర్వాత చల్లటి నీటితో కడిగితే మంచి ఫలితాలు ఉంటాయి.
వేప ఆకులు నీళ్లలో మరిగించి ఆ నీటిని చల్లార్చి స్నానం చేసే నీళ్లలో కలపండి. ఇలా చేస్తే శరీరంపై బ్యాక్టీరియా పెరగకుండా ఉంటుంది. పెరుగును చర్మానికి రాసి 10 నిమిషాల తర్వాత కడగండి. లోపల నుంచి కూలింగ్ కోసం రోజూ మజ్జిగ తాగండి. ధనియాలు నీళ్లలో మరిగించి తాగితే కూడా శరీరం లోపల నుంచి చల్లబడుతుంది. చల్లటి క్లాత్ పొక్కులపై 5 నుంచి 10 నిమిషాలు పెడితే మంట వెంటనే తగ్గుతుంది. ఇది అత్యంత సులభమైన ట్రీట్‌మెంట్గా చెప్తారు.
రాకుండా తీసుకోవాల్సిన జాగ్రత్తలు
వేసవిలో చెమటపొక్కులు రాకుండా ఉండాలంటే.. కాటన్ దుస్తులు మాత్రమే వేసుకోవాలి. వదులుగా ఉండే దుస్తులు మరింత మంచిది. రోజుకు కనీసం 3 నుంచి 4 లీటర్ల నీళ్లు తాగండి. చర్మానికి థిక్గా ఉండే మాయిశ్చరైజర్స్, ఆయిల్స్ రాయకపోవడమే మంచిది. రాత్రి నిద్రకు ముందు చల్లని నీటితో స్నానం చేయండి. మధ్యాహ్నం 11 నుంచి 4 గంటల మధ్యలో బయటకు వెళ్లకపోవడమే మంచిది. ఏసీ లేదా ఫ్యాన్ గాలి బాగా తగిలేలా చూసుకోండి.
పొక్కులు ఎక్కువగా వ్యాపించి.. వాటి నుంచి చీము వస్తోందని అనిపిస్తే.. జ్వరం ఉంటే వైద్య సహాయం తీసుకోండి. ఎందుకుంటే సరైన జాగ్రత్తలు తీసుకోకపోతే ఇన్ఫెక్షన్కి దారితీస్తాయి. కాబట్టి సింపుల్ చిట్కాలతో సమస్యను దూరం చేసుకోండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
