Health Tips: రోజూ మెట్లు ఎక్కి దిగండి చాలు... జిమ్‌కు వెళ్లాల్సిన అవసరం లేదు

లిఫ్టు వాడకం తగ్గిస్తే మీకు కలిగే ఆరోగ్య ప్రయోజనాలు ఇన్నీ అన్నీ కావు.

(Image credit: Pixabay)

మెట్లు వాడకం తగ్గిపోయింది. అపార్ట్‌మెంట్లలో నివసించే వారు ఎంత మంది మెట్లు వాడుతున్నారు? తొంభైశాతం మంది లిఫ్టును వాడేందుకు ఇష్టపడుతున్నారు. అది వాడడం మానేసి రోజూ మెట్లెక్కి దిగడం చేస్తే ఎన్ని ఆరోగ్యప్రయోజనాలు కలుగుతాయో తెలిస్తే ఆశ్చర్యపోతారు. ఆరోగ్యకరమైన జీవనశైలిలో మెట్లు ఎక్కడం దిగడం కూడా చాలా అవసరం. అదొక వ్యాయామం. మీ కండరాలు ఆరోగ్యకరంగా ఉంచేందుకు ఈ వ్యాయామం చాలా సహాయపడుతుంది. రోజూ మెట్లు ఎక్కి దిగండి చాలు... జిమ్ కూడా అవసరం లేదు.

మంచి ఆకృతి కోసం
మెట్లు ఎక్కడం వల్ల శరీర శక్తి పెరుగుతుంది. తరచూ మెట్లు ఎక్కడం వల్ల శరీరం టోన్ అవుతుంది. తద్వారా మీ శరీరం మంచి ఆకృతిని పొందుతుంది. రోజుకు కనీసం ఇరవై నిమిషాల పాటూ మెట్లు ఎక్కి దిగడం చేస్తే కొన్ని వారాలకే మీరు శరీరంలో మార్పును గమనించవచ్చు. 

బరువు తగ్గుతారు
మెట్లు ఎక్కి, దిగడం వల్ల అనేక ప్రయోజనాలు ఉన్నాయి. వాటిలో బరువు తగ్గడం ముఖ్యమైనది. బరువు తగ్గాలనుకునేవారు రోజుకి అయిదు నిమిషాల పాటూ మెట్లు, ఎక్కడం, దిగడం చేయాలి. ఇది కచ్చితంగా మీ శరీరంలోని అదనపు బరువును కరిగిస్తుంది. 

డయాబెటిస్‌ను నియంత్రిస్తుంది
ఈ వ్యాయామం రక్తపోటను, రక్తంలో చక్కెర స్థాయిలను నియంత్రించడంలో సహాయపడుతుంది. మధుమేహం లక్షణాలను కూడా తగ్గిస్తుంది. 

మానసికంగానూ...
ఒత్తిడి, ఆందోళన వేధిస్తున్నవారికి మంచి శారీరక వ్యాయామం మెట్లు ఎక్కి, దిగడం. తరచూ ఈ వ్యాయామం చేసేవారిలో శరీరం మొత్తం శక్తిమంతంగా మారుతుంది. తద్వారా మానసిక సమస్యలు కూడా తగ్గుముఖం పడుతాయి. 

తలనొప్పి తగ్గుతుంది
ఒక అధ్యయనం ప్రకారం మెట్లు ఎక్కి దిగడం వల్ల తలనొప్పితో పోరాడే శక్తి, తట్టుకునే శక్తి శరీరానికి వస్తుంది. శరీరంలో రక్తప్రవాహం ఆరోగ్యకరంగా ఉండడం వల్ల నరాలలో తలనొప్పి దారితీసే లక్షణాలు తగ్గుతాయి. కనుక తలనొప్పిని వదిలించుకోవడానికి ఇది సులువైన వ్యాయామం. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌  చేయండి.