Cancer: యువతికి చిన్న మొటిమ వచ్చింది, తర్వాత ప్రాణాంతక క్యాన్సర్‌గా మారింది

క్యాన్సర్ ఇప్పుడు ప్రపంచంలో పెరిగిపోతున్న ఆరోగ్య సమస్యల్లో ఒకటిగా ఉంది.

(Image credit: Pixabay)

యువతలో మొటిమలు రావడం అనేది చాలా సాధారణ విషయం. ఇది హార్మోన్లకు సంబంధించినవి. కాలుష్యం వల్ల కూడా మొటిమలు వచ్చే అవకాశం ఉంది. అయితే  మొటిమలను తేలికగా తీసుకోకూడదు. ఒక మహిళ ముక్కుపై చిన్న మొటిమ వచ్చింది. దానిని సాధారణ మొటిమ అనుకుని ఆమె పట్టించుకోలేదు. అది ఎర్రటి గడ్డగా మారింది. తర్వాత పుండుగా రూపాంతరం చెందింది. ఎంతకీ తగ్గకపోవడంతో ఆమె వైపు దగ్గరికి వెళ్ళింది. ఆ పుండు నుంచి రక్తస్రావం జరగడం మొదలైంది. వైద్యులకు అనుమానం వచ్చి పరీక్షలు చేయించారు. బయాప్సీ చేస్తే అది చర్మ క్యాన్సర్లలో ఒక రకమైన క్యాన్సర్ అని తేలింది. దాని పేరు బేసల్ సెల్ కార్సినోమా. ఆ క్యాన్సర్ నుంచి ఉపశమనం పొందేందుకు ఆమెకు శస్త్ర చికిత్స చేశారు. వైద్యులు అక్కడున్న పుండును తొలగించారు. ఒకసారి ఆమె చర్మ కేన్సర్ బారిన పడడం వల్ల భవిష్యత్తులో మళ్లీ ఆ క్యాన్సర్ బారిన పడే అవకాశాలు ఉన్నట్టు వైద్యులు చెప్పారు.

ఏమిటీ క్యాన్సర్?
చర్మ క్యాన్సర్లలో ఒక రకమైనది బేసల్ సెల్ కార్సినోమా. శరీరంలో ఉండే కణాలు బేసల్ కణాలు. పాత కణాలు చనిపోవడంతో బేసల్ కణాలు కొత్త చర్మ కణాలను ఉత్పత్తి చేస్తాయి. తీవ్రమైన సూర్య కిరణాలు కణాలను చేరకుండా చేయడం ద్వారా క్యాన్సర్ రాకుండా ఇవి అడ్డుకుంటాయి. అయితే అవి సమర్ధవంతంగా పనిచేయకుండా క్యాన్సర్ కణాలుగా మారుతాయి. అక్కడ కొత్త కణాలు పుట్టవు. పాతవి పుండుగా మారి పేరుకుపోతాయి. దీనికి సకాలంలో రోగనిర్ధారణ జరగడం అవసరం. కొన్ని రకాల ప్రారంభ లక్షణాల ద్వారా దీన్ని తెలుసుకోవచ్చు. అలాంటి లక్షణాలు కనిపిస్తే తేలిగ్గా తీసుకోకుండా వైద్యులను సంప్రదించడం ఉత్తమం. 

లక్షణాలు ఇలా
పుండ్లు, ఎర్రటి పాచెస్, మెరిసే గడ్డలు, మచ్చల్లాంటివి కనిపిస్తాయి. చిన్న కురుపులు ఎత్తుగా ఎదుగుతాయి. పొట్టులా రాలుతుంది. దురద, రక్తస్రావం వంటివి జరుగుతాయి. సూర్యరశ్మి తగిలే ప్రదేశాలలోనే ఇవి వస్తాయి. 

చికిత్స ఉందా?
బేసల్ సెల్ క్యాన్సర్ ముందుగానే కనిపెట్టి చికిత్స అందిస్తే ఇది నయమయ్యే అవకాశం ఉంది. చర్మ క్యాన్సర్లలో 80శాతం మందికి ఇది సోకే అవకాశం ఉంది. ఈ క్యాన్సర్ కు చికిత్స తీసుకోకుండా వదిలేస్తే అది ప్రాణాంతకంగా మారే ఛాన్సులు ఉన్నాయి. 

వేసవిలో మండే ఎండల్లో సూర్య కాంతి చర్మం మీద పడకుండా జాగ్రత్తలు తీసుకోవాలి. లేకుంటే సూర్య కిరణాలలో ఉండే అతినీల లోహిత కిరణాలు చర్మాన్ని తాకి చర్మ క్యాన్సర్ వచ్చే అవకాశం ఉంది.

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.