అన్వేషించండి

SBI PO Prelims Result 2024: ఎస్‌బీఐ పీవో ప్రిలిమ్స్ ఫలితాలు విడుదల, డైరెక్ట్ లింక్ ఇదే

SBI: ఎస్‍బీఐ పీవో ప్రిలిమ్స్-2024 ఫలితాలను స్టేట్ బ్యాంక్ ఆఫ్ ఇండియా విడుదల చేసింది. అధికారిక వెబ్‌సైట్‌లో ఫలితాలను అందుబాటులో ఉంచింది.

By : Omprakash | Updated at : 05 Apr 2025 11:38 PM (IST)

ఎస్‌బీఐ పీవో ప్రిలిమ్స్ ఫలితాలు

SBI PO Prelims Result: ఎస్‍బీఐ పీవో ప్రిలిమ్స్-2024 (Prelims) పరీక్ష ఫలితాలను స్టేట్ బ్యాంక్ ఆఫ్ ఇండియా (State Bank of India) ఏప్రిల్‌ 5న విడుదల చేసింది. అధికారిక వెబ్‌సైట్‌లో ఫలితాలను అందుబాటులో ఉంచింది. పరీక్షకు హాజరైన అభ్యర్థులు వెబ్‌సైట్‌లో ఫలితాలను చూసుకోవచ్చు. అభ్యర్థులు తమ రిజిస్ట్రేషన్ నెంబర్/రోల్ నెంబర్, పుట్టినతేది వివరాలు నమోదుచేసి ఫలితాలు తెలుసుకోవచ్చు. ప్రిలిమ్స్ పరీక్షలో అర్హత సాధించిన అభ్యర్థులకు మే మొదటివారంలో మెయిన్ పరీక్ష నిర్వహించనున్నారు. పీవో ఉద్యోగాలకు దరఖాస్తు చేసుకున్న అభ్యర్థులకు మార్చి 8, 16, 24 తేదీల్లో పరీక్షలు నిర్వహించిన సంగతి తెలిసిందే. ఈ పరీక్షల ఫలితాలను తాజాగా ఎస్‌బీఐ విడుదల చేసింది. దేశవ్యాప్తంగా 600 ప్రొబేషనరీ ఆఫీసర్ల పోస్టులను ఎస్‌బీఐ భర్తీ చేయనుంది. అభ్యర్థులను ప్రిలిమ్స్, మెయిన్, ఇంటర్వ్యూ ద్వారా ఎంపిక చేయనున్నారు.

ఎస్‌బీఐ పీవో ప్రిలిమ్స్ ఫలితాల కోసం క్లిక్ చేయండి..

స్టేట్‌ బ్యాంక్‌ ఆఫ్‌ ఇండియాలో 600 ప్రొబేషనరీ ఆఫీసర్ (పీవో) పోస్టుల భర్తీకి గతేడాది డిసెంబరు 27న నోటిఫికేషన్ వెలువడిన సంగతి తెలిసిందే. వీటిలో ఎస్సీ- 87, ఎస్టీ- 57, ఓబీసీ-158, ఈడబ్ల్యూఎస్‌- 58, యూఆర్‌- 240 పోస్టులు కేటాయించారు. అభ్యర్థుల నుంచి డిసెంబరు 27 నుంచి జనవరి 16 వరకు దరఖాస్తులు స్వీకరించారు. ప్రిలిమినరీ ఎగ్జామినేషన్, మెయిన్ ఎగ్జామినేషన్, సైకోమెట్రిక్ టెస్ట్, గ్రూప్ ఎక్సర్‌సైజ్, ఇంటర్వ్యూ, డాక్యుమెంట్ వెరిఫికేషన్, మెడికల్ ఎగ్జామినేషన్ ఆధారంగా అభ్యర్థులను ఎంపిక చేస్తారు. తాజాగా ప్రిలిమినరీ పరీక్షకు సంబంధించిన హాల్‌టికెట్లను ఎస్‌బీఐ విడుదల చేసింది. ఉద్యోగాలకు ఎంపికైనవారికి నెలకు రూ.48,480 - రూ.85,920 మధ్య జీతభత్యాలు ఉంటాయి. ఎంపికైన అభ్యర్థులు దేశ వ్యాప్తంగా ఉన్న ఎస్‌బీఐ శాఖల్లో విధులు నిర్వర్తించాల్సి ఉంటుంది. రెండేళ్ల ప్రొబేషనరీ పీరియడ్ ఉంటుంది.

ప్రిలిమినరీ పరీక్ష విధానం..
మొత్తం 100 మార్కులకు ప్రిలిమినరీ పరీక్ష నిర్వహిస్తారు. మూడు విభాగాల నుంచి మొత్తం 100 ప్రశ్నలు అడుగుతారు. ప్రతిప్రశ్నకు ఒకమార్కు. వీటిలో ఇంగ్లిష్ లాంగ్వేజ్ 30 ప్రశ్నలు-30 మార్కులు, క్వాంటిటేటివ్ ఆప్టిట్యూడ్-35 ప్రశ్నలు-35 మార్కులు, రీజనింగ్ ఎబిలిటీ 35 ప్రశ్నలు-35 మార్కులు ఉంటాయి. ఆబ్జెక్టివ్ విధానంలో ప్రశ్నలు అడుగుతారు. పరీక్షలో నెగెటివ్ మార్కులు ఉంటాయి. ప్రతి తప్పుడు సమాధానానికి ¼ వంతు మార్కులు కోత విధిస్తారు.

SBI PO Recruitment: స్టేట్ బ్యాంక్ ఆఫ్ ఇండియాలో 600 పీవో పోస్టులు, ప్రిలిమ్స్ పరీక్ష ఎప్పుడంటే?