ఆయుర్వేద చిట్కాలు: చలికాలంలో జలుబు, జ్వరాలను దూరం చేసే ఆహారాలు ఇవే!

చలికాలం వచ్చిందంటే జ్వరాలు వెంటాడుతాయి. వాటి నుంచి బయటపడాలంటే.. ఆయుర్వేద నిపుణులు సూచించిన ఈ ఆహారాలను తీసుకోండి.

Representational Image/Pixabay

చలి కాలం వచ్చిందంటే.. వ్యాధుల సీజన్ మొదలైనట్లే. ఎందుకంటే.. ఈ సమయంలోనే వైరస్‌లు, బ్యాక్టీరియాలు యాక్టీవ్ అవుతాయి. అంతేకాదు చలికాలం వాత, పిత్త, కఫ దోషాలు కూడా కారణం కావచ్చని ఆయుర్వేద నిపుణులు చెబుతున్నారు. అయితే, వాటి నుంచి మిమ్మల్ని మీరు రక్షించుకోవాలంటే.. తప్పకుండా ఈ కింది ఆహారాలను మీ మెనూలో చేర్చుకోండి. 

శీతాకాలం ప్రారంభం నుంచి చివరి వరకు.. అంటే హేమంత రుతువు ఆరంభం నుంచి శిశిర రుతువు మొదలయ్యే వరకు వాత, కఫాలను సమతులంగా ఉంచడం అవసరం. కఫం సమతులంగా ఉంటే కీళ్ల ఆరోగ్యం, రోగనిరోధక శక్తి, చర్మంలో నిగారింపు నిలిచి ఉంటుంది. కఫ దోషం ఏర్పడితే శ్లేష్మ సంబంధ అనారోగ్యాలు, బరువు పెరగడం, నీరసం వంటివి ఏర్పడతాయి. వీటిని నివారించాలంటే చలికాలంలో కొన్ని ఆహార నియమాలు పాటించడం తప్పనిసరి.

సీజన్లు మారుతున్న క్రమంలో ఆహారంలో కూడా మార్పులు తప్పనిసరిగా చేసుకోవాలి. ఇవి శరీరంలో దోషాలు ఏర్పడకుండా నివారించేందుకు అవసరం. శీతాకాలం ఆహారంలో గుడ్డు, నెయ్యితో చేసిన కిచిడి, వెచ్చని పాలు, నువ్వులు, చెరకుతో చేసిన పదార్థాలు, బాదం, వాల్నట్ వంటి డ్రైఫ్రూట్స్ చేర్చుకోవడం మంచిది. మాంసాహారులైతే చికెన్ సూప్, నెయ్యితో వండిన ఆకుకూరలు తప్పనిసరిగా భోజనంలో భాగం చేసుకోవాలి. తులసి, లెమన్ గ్రాస్, అల్లం వంటి హెర్బ్స్ తో చేసిన గ్రీన్ టీ తరచుగా తీసుకోవాలి. ఇవన్నీ కూడా శీతాకాలంలో ఇమ్యూనిటి పెంచేందుకు దోహదం చేసే ఆహారాలు.

• వీటిలో బెల్లం శరీరంలో వేడి పెంచుతుంది. జీర్ణసంబంధ ఎంజైముల ఉత్పత్తికి, నిరోధక శక్తిని పెంపొందించడానికి మంచి ఆహారం.
• కిచిడి మన సనాతన వంటకాల్లో ఒకటి. ఆవు నెయ్యితో బియ్యం, గింజధాన్యాలు, కూరగాయలు కలిపి వండిన ఈ పదార్థం ఒక సూపర్ ఫుడ్. శరీరానికి కావల్సిన అమైనోఆసిడ్స్ ను అందిస్తుంది. అంతేకాదు, ఇందులో తగినన్ని ప్రొటీన్లు కూడా ఉంటాయి.
• నువ్వులు శరీరంలో వేడి పెంచే కొవ్వులను కలిగిన ఆహారం. వీటిలో ఐరన్, కాపర్, జింక్ రకరకాల విటమిన్లు కలిగిన మంచి ఆహారం. నిరోధక శక్తిని కూడా పెంపొందిస్తాయి.
• ఈ కాలంలో ఆకుకూరలు పుష్కలంగా లభిస్తాయి. బచ్చలి, పాలకూర, మెంతి కూర, ఉల్లి ఆకు, వంటి ఆకుకూరలు తప్పకుండా తీసుకోవాలి. ఇవి ఇమ్యూనిటి పెంచడమే కాదు శరీరానికి అవసరమయ్యే వెచ్చదనాన్ని కూడా ఇస్తాయి.
• పసుపు కలిపిన పాలను గోల్డెన్ మిల్క్ అని పిలుస్తారు. చలికాలంలో నిద్రకు ముందు తప్పనిసరిగా చిటికెడు పసుపు కలిపిన కప్పు పాలు తీసుకోవడం ఎంతో మేలు చేస్తుంది. కీళ్లు గట్టిపడడం మాత్రమే కాదు, చలికాలంలో తరచు వేధించే ఇన్ఫెక్షన్లు దరి చేరకుండా నివారిస్తాయి.
• చికెన్ సూప్ తీసుకోవడం కూడా చాలా మంచిది. దీని తయారీలో వాడే మసాలాలు శరీరంలో వేడి పుట్టిస్తాయి.
• చలికాలంలో వేడిగా టీ, కాఫీ లు తాగడం చాలా సౌకర్యంగా అనిపిస్తుంది. కానీ వీటి బదులుగా తులసి, అల్లం, లెమన్ గ్రాస్ తో చేసిన హెర్బల్ గ్రీన్ టీ తీసుకోవడం మంచిది. ఈ పానీయం వెచ్చగా సౌకర్యంగా ఉండడం మాత్రమే కాదు ఆరోగ్యానికి మేలు కూడా చేస్తుంది.