Sarkaar 4 Promo: ‘సర్కార్ 4’లో సత్యభామ - కాజల్‌కు స్వీట్ సర్‌ప్రైజ్ ఇచ్చిన సుడిగాలి సుధీర్

Sarkaar 4: ఆహాలో ప్రసారమయ్యే ‘సర్కార్ 4’కు ‘సత్యభామ’ మూవీ టీమ్ అంతా గెస్టులుగా వచ్చారు. హీరోయిన్ కాజల్ కూడా ఈ షోకు గెస్ట్‌గా వచ్చి టీమ్ అందరితో కలిసి ఫన్ క్రియేట్ చేసింది.

Image Credit: Aha/Twitter

Sarkaar 4 Promo: ఆహాలో ప్రసారమయ్యే ‘సర్కార్ 4’ షోకు మొదటిసారి ఒక సీనియర్ హీరోయిన్ రాబోతోంది. తను ఎవరో గెస్ చేయమంటూ తాజాగా ఆహా.. ఒక పోస్ట్‌ను కూడా షేర్ చేసింది. దానికి చాలామంది కరెక్ట్‌గా సమాధానమిచ్చారు. చాలామంది ఊహించినట్టుగానే కాజల్ అగర్వాల్.. ‘సర్కార్ 4’ షోకు గెస్ట్‌గా రానుంది. తనతో పాటు తను హీరోయిన్‌గా నటించిన ‘సత్యభామ’ మూవీ టీమ్ అంతా వచ్చి ‘సర్కార్ 4’లో ఆటలు ఆడి ప్రేక్షకులను అలరించారు. ‘సత్యభామ’లో హీరోగా నటించిన నవీన్ చంద్ర, డైరెక్టర్ శశి టిక్కా, మ్యూజిక్ డైరెక్టర్ శ్రీచరణ్ పాకాల కూడా ఈ షోలో పాల్గొన్నారు. తాజాగా దీనికి సంబంధించిన ప్రోమో విడుదలయ్యింది.

సుధీర్‌కు నవీన్ క్లాసులు..

‘సర్కార్ 4’లో యాంకర్‌గా సుడిగాలి సుధీర్ ఎంట్రీ ఇచ్చాడు. నవీన్ చంద్ర గెస్ట్‌గా రాగానే అమ్మాయిలను పడేయడానికి టిప్స్‌ను అడిగి తెలుసుకున్నాడు. ‘‘అమ్మాయితో ఎలా మాట్లాడతావు’’ అని నవీన్ అడగగానే ‘‘అగ్గిపెట్టె ఉందా అని అడుగుతాను’’ అని సుధీర్ అన్నాడు. అది వినగానే నవీన్ ఆశ్చర్యపోగా.. ‘‘అగ్గిపెట్టె ఉందా అంటే ఎందుకు అని అడుగుతారు కదా మా ఇంట్లో దీపం వెలిగించడానికి రా అంటాను’’ అని సమాధానమిచ్చాడు సుధీర్. అది విని నవీన్ మరింత షాకయ్యాడు. ‘‘మన తెలుగువాళ్లు నేలపై చూసిన చందమామ.. మనందరి పంచదార బొమ్మ’’ అంటూ కాజల్‌కు వెల్‌కమ్ చెప్పాడు సుధీర్.

సత్యభామ ఆన్ ఫైర్..

కాజల్ రాగానే తాను కూడా చిన్నపిల్లాడినే అంటూ తనకు చాక్లెట్ ఇచ్చాడు సుధీర్. ఆ తర్వాత ‘మగధీర’ సీన్‌ను కాజల్‌తో రిపీట్ చేయడానికి ట్రై చేశాడు. కానీ సుధీర్‌ను కాలకేయ అంటూ తన గాలి తీసేసింది కాజల్. ఒక గేమ్‌లోకి వెళ్లగానే ఎవరి కోసం క్లూ ఇవ్వకుండా కాజల్ కోసం మాత్రమే క్లూ ఇవ్వాలనిపిస్తుంది అన్నాడు సుధీర్. ఇది విని నవీన్ చంద్ర హర్ట్ అయ్యాడు. మీకోసం కూడా ఒక క్లూ ఇస్తా అనగానే లేచి దండం పెట్టాడు నవీన్. దీంతో క్షమించమని అడిగాడు సుధీర్. ఆ తర్వాత ప్రశ్న అడగకుండానే తనకు సమాధానం తెలుసంటూ కాసేపు కామెడీ చేసింది కాజల్. ఆ తర్వాత కాజల్, శ్రీచరణ్ మధ్య పోటాపోటీగా గేమ్ నడిచింది. ఫైనల్‌గా ఒక ప్రశ్న కోసం రూ.2 లక్షల పాట పాడింది. ఇది చూసి ‘సత్యభామ ఆన్ ఫైర్’ అని కామెంట్ చేశాడు సుధీర్.

సర్‌ప్రైజ్..

సుధీర్ ఇచ్చే క్లూ నచ్చక ‘‘స్ట్రాంగ్ క్లూ ఇవ్వు. బచ్చా క్లూ కాదు’’ అని వార్నింగ్ ఇచ్చింది కాజల్. ‘‘ఇంట్లో మీరు చందమామ? సత్యభామ’’ అని అడగగా.. ‘‘నీల్‌తో చందమామ, గౌతమ్‌కు సత్యభామ’’ అంటూ ఫన్నీగా సమాధానమిచ్చింది కాజల్. 2011 గురించి ప్రశ్న అడుగుతుండగా.. తాను 2011లో చాలా బిజీగా ఉన్నానని చెప్పడంతో అందరూ షాకయ్యారు. కాజల్‌కు ఒక స్వీట్ సర్‌ప్రైజ్ అంటూ కొడుకుతో కలిసి కాజల్ ఉన్న ఫోటో ప్రింట్ ఉన్న టీషర్ట్‌ను వేసుకొని చూపించాడు సుధీర్. ఆ సర్‌ప్రైజ్ చూసి కాజల్ ఇంప్రెస్ అయిపోయింది. అలా ‘సత్యభామ’ టీమ్ అంతా కలిసి ‘సర్కార్ 4’లో సందడి చేశారు. మే 17న రాత్రి 8 గంటలకు ఈ ఎపిసోడ్ ఆహాలో స్ట్రీమ్ కానుంది.