Mohanlal: మలయాళ 'బాహుబలి'ని ఓటీటీకి ఇచ్చేశారుగా.. 

మోహన్ లాల్ నటించిన భారీ సినిమా 'మరక్కార్'ను అమెజాన్ ప్రైమ్ లో విడుదల చేయాలని నిర్ణయించుకున్నారు. దానికి కారణమేంటంటే..?

మలయాళ 'బాహుబలి'ని ఓటీటీకి ఇచ్చేశారుగా.. 

మలయాళ సూపర్ స్టార్ మోహన్ లాల్ నటించిన భారీ బడ్జెట్ సినిమా 'మరక్కార్'. ప్రముఖ దర్శకుడు ప్రియదర్శన్ రూపొందించిన ఈ సినిమాను మొదలుపెట్టినప్పటి నుంచి మలయాళ 'బాహుబలి'గా అభివర్ణిస్తున్నారు. అదే రేంజ్ లో ప్రమోషన్స్ కూడా చేశారు. ఈ సినిమా విజువల్స్, టీజర్స్ చూస్తుంటే మాత్రం పైరేట్స్ ఆఫ్ ది కరేబియన్ స్టయిల్ లో ఈ చిత్రాన్ని తెరకెక్కించినట్లు అనిపించింది. నిజానికి ఈ సినిమా మొదలై చాలా కాలమవుతుంది. ఏడాదిన్నర క్రితమే రిలీజ్ కావాల్సిన సినిమా ఇది. కానీ కరోనా కారణంగా వాయిదా పడుతూ వచ్చింది. 

2020లో ఈ సినిమాను ఓటీటీకి ఇచ్చేయమని చాలా మందిదర్శకనిర్మాతలను సంప్రదించారు. కొన్ని డిజిటల్ ఫ్లాట్ ఫామ్స్ భారీ డీల్ ను ఆఫర్ చేశాయి. కానీ చిత్రబృందం మాత్రం అసలు టెంప్ట్ అవ్వలేదు. ఇంతటి భారీ సినిమాను థియేటర్లలో చూస్తేనే కిక్కుంటుందని ఎదురుచూశారు. ఈ ఏడాది మార్చిలో సినిమాను రిలీజ్ చేయడానికి సన్నాహాలు జరిగాయి. కానీ అదే సమయంలో కేరళ రాష్ట్రంలో కరోనా కేసులు ఎక్కువయ్యాయి. అప్పటినుంచి మళ్లీ థియేటర్లు పూర్తి స్థాయిలో నడిచేవరకు ఎదురుచూశారు. కానీ ఇప్పుడు ఉన్నట్టుండి సినిమాను ఓటీటీకి ఇచ్చేసినట్లు తెలుస్తోంది. 

మలయాళంలో థియేటర్లు తెరుచుకున్న కొన్ని రోజుల్లోనే వంద శాతం ఆక్యుపెన్సీ వస్తుందని అనుకున్నారు. అలాంటి సమాచారం 'మరక్కార్ను అమెజాన్ ప్రైమ్ కి ఇచ్చేయడంతో అభిమానులు షాకయ్యారు. అయితే మంచి లాభాలకే సినిమాను అమ్మేసినట్లు తెలుస్తోంది. దేశంలో మిగతా రాష్ట్రాలతో పోలిస్తే కరోనా ప్రభావం కేరళపై చాలా ఎక్కువగా ఉంది. ఇప్పుడిప్పుడే పరిస్థితులు చక్కబడుతున్నాయి. కానీ మళ్లీ కరోనా ముప్పు ఉంటుందనే సంకేతాలు వస్తున్నాయి. దీంతో ప్రేక్షకులు సినిమా థియేటర్లకు వస్తారనే నమ్మకం పోయింది. ఒకవేళ వచ్చినా.. ఆశించిన స్థాయిలో కలెక్షన్స్ వస్తాయనే ఆశలు లేక.. సినిమాను ఓటీటీకి అమ్మేసి ఉంటారనిపిస్తుంది. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి