Nani: పవన్ కళ్యాణ్ దర్శకుడితో నాని గ్యాంగ్‌స్టర్ యాక్షన్ మూవీ!?

పవన్ కళ్యాణ్ హీరోగా రూపొందుతున్న పాన్ ఇండియా సినిమా దర్శకుడితో నాని ఓ సినిమా చేయనున్నారని సమాచారం. పూర్తి వివరాల్లోకి వెళితే...

నాని

న్యాచురల్ స్టార్ నాని (Nani)లో మంచి నటుడు మాత్రమే కాదు... యాక్షన్ హీరో కూడా ఉన్నారు. అయితే... ఆయన నటించిన రొమాంటిక్ కామెడీ సినిమాలు ఎక్కువ శాతం విజయాలు సాధించడంతో ఆయనపై ఫీల్ గుడ్ మూవీస్ హీరో అని ముద్ర పడింది. అయితే... అది తప్పని, యాక్షన్ హీరోగానూ నాని విజయాలు సాధిస్తాడని 'దసరా' విజయం నిరూపించింది. ఇప్పుడు ఆయన మరో యాక్షన్ మూవీ చేయడానికి రెడీ అయ్యారట. పవర్ స్టార్ పవన్ కళ్యాణ్ హీరోగా పాన్ ఇండియా సినిమా చేస్తున్న దర్శకుడితో నాని సినిమా చేస్తారని ఫిల్మ్ నగర్ టాక్. పూర్తి వివరాల్లోకి వెళితే...

నానితో 'ఓజీ' దర్శకుడు సుజిత్ సినిమా!
పవన్ కళ్యాణ్ హీరోగా చేస్తున్న సినిమాల్లో భారీ అంచనాలు ఉన్న సినిమా 'ఓజీ' (ఒరిజినల్ గ్యాంగ్‌ స్టర్). దే కాల్ హిమ్ ఓజీ (అందరూ ఆయన్ను ఒరిజినల్ గ్యాంగ్‌ స్టర్ అంటారు)... అనేది ఉపశీర్షిక. ఆ చిత్రానికి 'రన్ రాజా రన్', 'సాహో' సినిమాల ఫేమ్ సుజిత్ దర్శకత్వం వహిస్తున్నారు. ఆయనతో నాని ఒక సినిమా చేయడానికి రెడీ అవుతున్నారని తెలిసింది. 

మాఫియా నేపథ్యంలో నాని హీరోగా పాన్ ఇండియా సినిమా చేయడానికి సుజిత్ ప్లాన్ చేస్తున్నారట. 'సాహో'తో పాన్ ఇండియా ప్రేక్షకులకు పరిచయం అయ్యారాయన. ప్రజెంట్ చేస్తున్న 'ఓజీ' కూడా పాన్ ఇండియా ఫిల్మ్. మాఫియా నేపథ్యంలో యాక్షన్ ఎంటర్‌టైనర్‌గా తెరకెక్కిస్తున్నారు. నానితో చేయబోయేది కూడా సేమ్ జానర్ ఫిల్మ్ అంట!

నాని సినిమాకూ 'ఓజీ' నిర్మాతే!
పవన్ కళ్యాణ్, సుజిత్ సినిమాను డీవీవీ దానయ్య ప్రొడ్యూస్ చేస్తున్నారు. నాని హీరోగా సుజిత్ చేయబోయే సినిమాను సైతం ఆయన ప్రొడ్యూస్ చేయనున్నారని తెలుస్తోంది. ప్రస్తుతం చర్చలు జరుగుతున్నాయట. 'ఓజీ' కంప్లీట్ అయ్యాక ఈ సినిమా సెట్స్ మీదకు వెళుతుందట.

'సరిపోదా శనివారం' తర్వాత మరో రెండు!
వివేక్ ఆత్రేయ దర్శకత్వంలో ఇప్పుడు 'సరిపోదా శనివారం' సినిమా చేస్తున్నారు నాని. దాని తర్వాత ఆయన మరో రెండు సినిమాలకు 'యస్' చెప్పారు. తనకు 'దసరా' వంటి యాక్షన్ హిట్ ఇచ్చిన శ్రీకాంత్ ఓదెల దర్శకత్వంలో ఒక సినిమా చేయనున్నారు. ప్రస్తుతం ఆ సినిమా స్క్రిప్ట్ వర్క్ జరుగుతోంది. అది కాకుండా 'బలగం'తో భారీ విజయం అందుకున్న వేణు టిల్లు (జబర్దస్త్ వేణు) దర్శకత్వంలో ఒక సినిమా చేయనున్నారు. ఇప్పుడు సుజిత్ సినిమా లైనులోకి వచ్చింది. మరి, ఈ మూడు సినిమాల్లో ఏది ముందు సెట్స్ మీదకు వెళుతుందో? వెయిట్ అండ్ సి. ఇప్పుడు నాని మార్కెట్ పెరిగింది. తన ప్రతి సినిమానూ తెలుగుతో పాటు తమిళ, హిందీ, మలయాళ భాషల్లో విడుదల చేస్తున్నారు. బలంగా ప్రమోట్ చేస్తున్నారు. ఆయనకు సుజిత్ యాడ్ అయితే సినిమాకు మరింత క్రేజ్ వస్తుంది. హిందీలో బాగా మార్కెట్ చేయవచ్చు.