Naga Chaitanya: సమంతని ఫాలో అవుతున్న చైతు.. ఈ టైమ్‌లో ఆ నిర్ణయం ఎందుకు తీసుకున్నాడో!

నటనకు ప్రాధాన్యం ఉన్న పాత్ర అయితే చాలు ఏ రోల్ కి అయినా సై అంటున్నారు నేటి హీరోలు. ఇప్పుడీ లిస్టులో చేరాడు అక్కినేని నాగచైతన్య.

Image credit : chaitanya akkineni Twitter

డిజిటల్ ఫ్లాట్ ఫార్మ్స్ హవా మొదలైన తర్వాత ఫిలిం మేకర్స్ సరికొత్త కంటెంట్ ని ప్రేక్షకులకు అందించే ప్రయత్నం చేస్తున్నారు. రాబోయే రోజుల్లో ఓటీటీలదే హవా అని అర్థమైన  హీరోహీరోయిన్లు సైతం వెబ్ సిరీస్‌లలో నటించేందుకు ఆసక్తి చూపుతున్నారు. మరోవైపు హీరోయిజాన్ని మాత్రమే ప్రదర్శించాలనే ఆలోచన నుంచి నేటి హీరోలు బయటకు వచ్చేశారు. ఫ్యాన్స్ హర్టవుతారనే ఆలోచనతో ఒకే చట్రంలో ఉండిపోవడం లేదు. పాత్ర ఏంటన్నది కాదు దాని వెయిట్ ఎంతో చూస్తున్నారు. అందుకే హీరోలు కూడా నెగెటివ్ రోల్ చేయడానికి అస్సలు ఆలోచించడం లేదు. ఇప్పటికే రానా ‘బాహుబలి’లో భళ్లాల దేవగా ఓ రేంజ్  క్రేజ్ సంపాదించుకున్నాడు. బాలీవుడ్ లోనూ ఓ మూవీలో విలన్‌గా మెప్పించాడు. ఇప్పుడు పవర్ స్టార్ పవన్ కళ్యాణ్ నటిస్తున్న భీమ్లా నాయక్ సినిమాలో నెగిటివ్ షేడ్స్ ఉన్న పాత్రలో మెప్పించేందుకు సిద్ధమవుతున్నాడు. కూల్ హీరో నాని కూడా ‘వి’ సినిమాలో ప్రతినాయకుడి ఛాయలున్న రోల్ పోషించాడు. ఇప్పుడీ లిస్టులో చేరాడు నాగచైతన్య.

ఓ వైపు సోలో హీరోగా, మల్టీ స్టారర్ మూవీస్.. క్లాస్, మాస్ అన్ని క్యారెక్టర్స్ లో తనకంటూ ప్రత్యేకత సొంతం చేసుకున్న నాగ చైతన్య ఇప్పుడు రూట్ మారుస్తున్నాడు. త్వరలో విలన్‌గా మెప్పించేందుకు రెడీ అవుతున్నాడు. శేఖర్ కమ్ముల దర్శకత్వంలో నటించిన ‘లవ్ స్టోరీ’ విడుదలైపోవడంతో విక్రమ్ కుమార్ దర్శకత్వంలో ‘థాంక్యూ’ అనే సినిమా చేస్తున్నాడు. బాలీవుడ్‌లో అమీర్ ఖాన్ ‘లాల్ సింగ్ చద్దా’ సినిమాలో కీలక పాత్ర పోషిస్తున్నాడు. ఇలా వరుస సినిమాలతో బిజీగా ఉన్న చైతూ త్వరలో ఓ వెబ్ సిరీస్‌లో నటించనున్నాడు. ‘లవ్ స్టోరీ’ మూవీ ప్రమోషన్స్‌లో భాగంగా ఓ ఇంటర్వ్యూలో చైతూ మాట్లాడుతూ.. అమెజాన్ ప్రైమ్ వీడియో కోసం ఓ హారర్ వెబ్ సిరీస్‌లో నటించబోతున్నానని చెప్పాడు. ఈ సిరీస్‌లో నెగిటివ్ షేడ్స్ ఉన్నపాత్రలో నటించనున్నాడట. విక్రమ్ కె. కుమార్ దర్శకత్వంలో ఈ వెబ్ సిరీస్ తెరకెక్కనుందని వెల్లడించాడు చైతన్య.

కెరీర్ పీక్స్‌లో ఉన్నప్పుడు చైతూ తీసుకున్న ఈ నిర్ణయం సంగతి విన్న అభిమానులు నిజంగా ఇది డేర్ స్టెప్పే అంటున్నారు. అక్కినేని వారసుడిగా ఇండస్ట్రీలో ఎంట్రీ సులువుగా దొరికినా తనని తాను ప్రూవ్ చేసుకునేందుకు చాలా కష్టపడ్డాడు చైతూ. మంచి పాత్రలు ఎంపిక చేసుకుంటూ సినిమా హిట్టు-ఫట్టు అనే సంబంధం లేకుండా తన పాత్రకు న్యాయం చేసుకుంటూ వచ్చాడు. ఇలాంటి సమయంలో వెబ్ సిరీస్, పైగా నెగిటివ్ షేడ్స్ ఉన్న రోల్ అంటే ఎలా ఉంటుందో అంటున్నారు అభిమానులు. మరోవైపు ఇప్పటికే ‘ఫ్యామిలీ మెన్ 2’ వెబ్ సిరీస్ తో సమంత క్రేజ్ ఎక్కడికో వెళ్లిపోయింది. ఇప్పుడు చైతూ తీసుకున్న నిర్ణయం కూడా అలాంటి ఫలితాలనే ఇస్తుందంటున్నారు అభిమానులు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి