Gruhalakshmi February 15th: నందు ప్లాన్ గోవిందా..! తులసికి కొన్న నెక్లెస్ లాస్య మెడలోకి

నందు కేఫ్ బిజినెస్ స్టార్ట్ చేయడంతో సీరియల్ ఇంట్రెస్టింగ్ గా సాగుతోంది. ఈరోజు ఎపిసోడ్లో ఏం జరిగిందంటే..

Image Credit: Disney Plus Hotstar/ Star Maa

ప్రేమికుల రోజు అంటే ప్రేమికులు, భార్య భర్తల మీదే కాదు తల్లి పిల్లల మధ్య కూడా ఉంటుందని తులసి అంటుంది. రెండేళ్ల క్రితం వరకు నా కొడుకు గులాబీ ఇచ్చే వాడు కానీ ఏమైందో ఏమో ఈ మధ్య తల్లి చేదు అయ్యిందని తులసి అనేసరికి ప్రేమ్ బాధగా వెంటనే అక్కడ ఉన్న రోజా తీసుకుని ఇస్తాడు. తులసి, నందు మాట్లాడుకుంటూ ఉంటే లాస్య వచ్చి నక్లెస్ ఇవ్వకుండా  ఏంటి ఊరిస్తున్నాడని అనుకుంటుంది. ఎవరు చూడటం లేదని నందు నెక్లెస్ ఇచ్చే టైమ్ కి లాస్య వచ్చేస్తుంది. నెక్లెస్ ఇవ్వమని ఇన్ డైరెక్ట్ గా అడుగుతుంది. అప్పుడే సామ్రాట్ వచ్చి నందుని మెచ్చుకుని కేఫ్ బాగుందని ఒక హగ్ చేసుకోవచ్చా అని అంటాడు. పనిలో పనిగా తులసిని కూడా మెచ్చుకుంటాడు. కొంపదీసి తులసిని కూడా హగ్ చేసుకుంటాడా ఏంటని నందు అమాంతం వెళ్ళి సామ్రాట్ ని హగ్ చేసుకుంటాడు.

సామ్రాట్, తులసి నవ్వుతూ మాట్లాడుకోవడం చూసి మనసులో జలస్ గా ఫీల్ అవుతూ ఉంటాడు. లాస్య వచ్చి నందు దగ్గర నెక్లెస్ తీసుకోవడం కోసం బిస్కెట్స్ వేస్తూ ఉంటుంది. వాలెంటైన్స్ డే రోజు అందరూ గిఫ్ట్ లు ఇచ్చిపుచ్చుకుంటూ ఎంజాయ్ చేస్తున్నారు మనం కూడా అలాగే చేద్దామని లాస్య ట్రై చేస్తుంది. నందు ఎంతకీ స్పందించకపోవడంతో లాస్య కోపంగా ఇవ్వకపోతే లాగేసుకోవాలని అనుకుంటుంది. నందు కాఫీ తెచ్చి సామ్రాట్ కి ఇస్తాడు. తులసికి ఇంకొకటి తీసుకొస్తానులె అంటే వద్దని సామ్రాట్ కాఫీ షేర్ చేసి ఇస్తాడు. అది చూసి ఏంటి తేడాగా మాట్లాడుతున్నాడని నందు మనసులోనే తిట్టుకుంటాడు. ఈరోజు నుంచి తులసి మీ కళ్ళ ముందు ఉంది రేపటి నుంచి ఇక నా కళ్ళ ముందు ఉంటుందని సామ్రాట్ చెప్పేసరికి నందు మొహం మాడిపోతుంది.

జేబులో ఉన్న నెక్లెస్ తీసి తులసికి ప్రజెంట్ చేయలేకపోతున్నా అని నందు తిట్టుకుంటాడు. వాళ్ళిద్దరూ సరదాగా మాట్లాడుకోవడం చూసి నందు చిరాకుగా మొహం పెడతాడు. సామ్రాట్ వెళ్లబోతుంటే ఇంట్లో అందరం సరదాగా గడపాలని ప్లాన్ చేశాం రమ్మని పిలుస్తుంది. ఇంట్లో వాలెంటైన్స్ డే సెలెబ్రేషన్స్ మొదలవుతాయి. అందరూ అక్కడ కూడా తులసి భజన మొదలుపెట్టేస్తారు. ఎప్పటిలా తులసి నా గొప్ప కాదు సమిష్టి కృషి అని అంటుంది. సామ్రాట్ తులసి చేతి వంటకి వీరాభిమాని అనేసరికి నందు మొహం చిరాకుగా పెడతాడు. ఒక్కొక్క జంట వచ్చి పెర్ఫామెన్స్ ఇస్తారు. గేమ్స్ ఆడుతూ, డాన్స్ చేస్తూ అందరూ సరదాగా గడుపుతారు.

ఇక లాస్య జంటకి నాది నెక్లెస్ గొలుసు పాటకి డాన్స్ చేయమని చీటి వస్తుంది. భలే సాంగ్ వచ్చిందని లాస్య తెగ సంబరపడుతూ డాన్స్ వేస్తుంది.  నందుకి మొహమాటం ఎక్కువ మనసులో ఉన్న విషయం త్వరగా బయట పెట్టడు వాలెంటైన్స్ డే రోజు గిఫ్ట్ గా ఇద్దామనుకుని రెండు రోజుల నుంచి జేబులో పెట్టుకుని తిరుగుతున్నాడాని లాస్య చెప్పేసరికి నందు బిక్కమొహం వేస్తాడు. అదేమీ లేదని నందు చెప్తున్నా వినకుండా బలవంతంగా నెక్లెస్ బయటకి తీయిస్తుంది. నా జేబులో నెక్లెస్ సంగతి తనకి ఎలా తెలిసిందని నందు ఏడుపుమొహం పెడతాడు. నెక్లెస్ చూసి లాస్య తెగ సంబరపడుతూ మెడలో వేయించుకుంటుంది.