Vamshi Paidipally: దళపతి విజయ్‌తో వంశీ పైడిపల్లి తమిళ చిత్రం.. నిర్మాత దిల్ రాజు!

తమిళ స్టార్ హీరో దళపతి విజయ్‌తో వంశీ పైడిపల్లి త్వరలోనే భారీ ప్రాజెక్టును తెరకెక్కించేందుకు సిద్ధమవుతున్నారు. ఈ సందర్భంగా ఆయన విజయ్‌ను కలిశారు.

Image Credit: Vamshi Paidipally/Twitter

తమిళ దర్శకులకు తెలుగులో ఎంత క్రేజ్ ఉందో తెలిసిందే. వారు తెలుగులో సినిమా తీస్తామంటే చాలు.. వెంటనే డేట్స్ ఇచ్చేస్తారు. కథ గురించి కూడా పెద్దగా ఆలోచించరు. ముఖ్యంగా మణిరత్నం, శంకర్, మురుగదాస్ వంటి దర్శకులకు ఏ స్థాయిలో డిమాండ్ ఉందో తెలిసిందే. అయితే, మన తెలుగు దర్శకుడు వంశీ పైడిపల్లి.. ఈ సాంప్రదాయాన్ని తమిళానికి పరిచయం చేయడానికి సిద్ధమవుతున్నారు. చివరికి నిర్మాణ సంస్థ కూడా మనదే. 

ఔనండి.. దర్శకుడు వంశీ పైడిపల్లి, నిర్మాత దిల్ రాజు కోలీవుడ్‌లోకి అడుగుపెడుతున్నారు. దళపతి విజయ్‌తో భారీ బడ్జెట్ చిత్రాన్ని నిర్మించేందుకు సిద్ధమవుతున్నారు. వంశీ, రాజులు దళపతిని కలిశారు. ఈ చిత్రం చేయడానికి విజయ్ అంగీకరించడంతో.. వంశీ పైడిపల్లి ట్విట్టర్ ద్వారా ఈ విషయాన్ని ప్రకటించారు. పాన్ ఇండియా మూవీగా ఈ చిత్రాన్ని తెరకెక్కించనున్నట్లు తెలిపారు. 

#Thalapathy66... Sharing with you all an exciting update about my next film with The #Thalapathy @actorvijay Sir, Produced by #DilRaju garu & #Shirish garu under my home banner @SVC_official pic.twitter.com/R24UhFGNlW

— Vamshi Paidipally (@directorvamshi) September 26, 2021

ఇది దళపతి విజయ్‌కు 66వ చిత్రం కానుంది. మహేష్‌బాబు నటించిన ‘మహర్షి’ సినిమా ఏ స్థాయిలో హిట్ కొట్టిందో తెలిసిందే. ఆ తర్వాత చిత్రాన్ని కూడా ఆయన మహేష్ బాబుతోనే తీయాలని అనుకున్నారు. కానీ, అనుకోకుండా ఆ ప్రాజెక్ట్ పట్టాలెక్కలేదు. దీంతో ఆ కథనే వంశీ విజయ్‌కు వివరించినట్లు తెలిసింది. విజయ్ కూడా చాలా ఏళ్ల నుంచి పాన్ ఇండియా మూవీ చేయడనికి ఆసక్తి చూపుతున్నారు. పైగా, తెలుగులోనూ ఆయన ఇప్పటివరకు నేరుగా నటించలేదు. ఈ నేపథ్యంలో విజయ్ వెంటనే ఒకే చెప్పినట్లు తెలిసింది. 

విజయ్ నటించిన కొన్ని చిత్రాలు తెలుగులో మంచి విజయమే సాధించాయి. ‘తుపాకీ’, ‘అదిరింది’ ‘మాస్టర్’ సినిమాలు మంచి విజయాన్ని అందుకున్నాయి. ప్రస్తుతం విజయ్ తమిళంలో ‘బీస్ట్’ సినిమా షూటింగులో బిజీగా ఉన్నారు. తెలుగు దర్శకుడు వంశీ పైడిపల్లి దర్శకత్వంలో విజయ్ నటిస్తున్నాడనే సమాచారం తెలియగానే.. దళపతి అభిమానుల సంతోషానికి అవధుల్లేవు. మహేష్‌ బాబుకు మంచి హిట్ ఇచ్చిన వంశీ.. తప్పకుండా తమ అభిమాన హీరోకు బ్లాక్‌బస్టర్ ఇస్తారనే నమ్మకంతో ఉన్నారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి