Siddharth : నా సినిమా గురించి అలా మాట్లాడిన వాళ్లే 'యానిమల్' సినిమాని చూస్తారు, ఇది సిగ్గు చేటు - సిద్ధార్థ్ సంచలన వ్యాఖ్యలు

Siddharth: హీరో సిద్ధార్థ్ తాజాగా ఓ ఈవెంట్లో 'చిన్నా' సినిమా గురించి కొందరు మగవాళ్ళు చేసిన కామెంట్స్ గురించి మాట్లాడుతూ అదే క్రమంలో 'యానిమల్' మూవీపై విమర్శలు చేశాడు.

సిద్ధార్థ్(Image Credit : Siddharth/Instagram)

Siddharth Comments On Animal Movie : తెలుగులో ఒకప్పుడు భారీ ఫాలోయింగ్ సంపాదించుకున్న సిద్ధార్థ్ గత ఏడాది 'చిన్నా' అనే సినిమాతో ప్రేక్షకుల ముందుకు వచ్చిన విషయం తెలిసిందే. మొదట తమిళంలో 'చిత్తా' పేరుతో రిలీజ్ అయి విమర్శకుల ప్రశంసలు అందుకున్న ఈ సినిమా ఆ తర్వాత తెలుగులో 'చిన్నా' పేరుతో రిలీజ్ అయ్యింది. తమిళంలో వచ్చినంత రెస్పాన్స్ తెలుగులో ఈ సినిమాకు రాలేదు. కమర్షియల్ గానూ అనుకున్న విధంగా కలెక్షన్స్ రాబట్టలేకపోయింది. కానీ చిన్నపిల్లల మీద లైంగిక వేధింపుల నేపథ్యంలో సాగే ఈ సినిమాని అందరూ చూసి తట్టుకోలేరనే అభిప్రాయాలు మాత్రం వ్యక్తం అయ్యాయి. అయితే తాజాగా ఓ ఈవెంట్ కు హాజరైన సిద్ధార్థ్ తన సినిమాపై వచ్చిన కామెంట్స్ గురించి స్పందించాడు. ఈ క్రమంలోనే 'యానిమల్' మూవీపై విమర్శలు గుప్పించాడు.

'చిన్నా' సినిమా వాళ్లకు డిస్టర్బింగ్ గా అనిపించిందట

హీరో సిద్ధార్థ్ స్టేజ్ ల  పై కానీ ఇంటర్వ్యూలో గాని మాట్లాడేటప్పుడు ఓపెన్ గానే ఉంటాడు. ఎవరి మీదైనా కౌంటర్లు వేయాలన్నా అసలు వెనకాడడు. బాధ వస్తే అందరి ముందే ఏడ్చేస్తాడు. అలా 'చిన్నా' సినిమాను తెలుగులో రిలీజ్ చేద్దామంటే థియేటర్స్ దొరకలేదంటూ స్టేజ్ మీదే ఎమోషనల్ అయిన విషయం తెలిసిందే.  తాజాగా ఓ ఈవెంట్ కి హాజరైన సిద్ధార్థ్ 'చిన్న' సినిమాపై వచ్చిన కామెంట్స్ గురించి మాట్లాడుతూ.." చిన్నా సినిమాని చూడడం కష్టమని ఒక్క మహిళ కూడా నాతో కానీ డైరెక్టర్ అరుణ్ తో గాని చెప్పలేదు. కానీ మగవాళ్ళు మాత్రం చాలా మంది ఈ సినిమా చూసి తట్టుకోవడం కష్టమని అన్నారు. నా సినిమా విషయంలో ఇలా మాట్లాడిన వాళ్లే మృగం అనే సినిమాను మాత్రం చూస్తారు. కానీ వాళ్లకు 'చిన్నా' సినిమా మాత్రం డిస్టర్బింగ్ గా అనిపిస్తుందట. ఇలాంటి సినిమాని చూసి డిస్టర్బింగ్ గా ఉందని అనడం సిగ్గుచేటు. ఈ విషయంలో త్వరలోనే ప్రేక్షకులు మారతారని ఆశిస్తున్నా" అని అన్నాడు.

'యానిమల్' ని ఉద్దేశిస్తూ..

సిద్ధార్థ్ తన సినిమా గురించి మాట్లాడిన వాళ్లు 'మృగం' అనే సినిమాను చూస్తారని తమిళంలో చెప్పాడు. నిజానికి అతను కౌంటర్ వేసింది 'యానిమల్' మూవీ గురించేనా అనిపిస్తుంది. సిద్ధార్థ్ ఈ ఈవెంట్ లో 'యానిమల్' అని డైరెక్ట్ గా చెప్పకుండా తమిళంలో మృగం అనే పేరుతో 'యానిమల్' పై విమర్శలు చేశాడు. 'యానిమల్' మూవీని వివిధ ఇండస్ట్రీలకు చెందిన ప్రముఖులు విమర్శించగా.. ఇప్పుడు ఆ లిస్ట్ లో సిద్ధార్థ్ కూడా చేరాడు .

అదితి రావ్ హైదరితో నిశ్చితార్థం

సిద్ధార్థ్, హీరోయిన్ అదితి రావ్ గత కొంతకాలంగా రిలేషన్షిప్ లో ఉన్న విషయం తెలిసిందే. కాగా ఇటీవల వీళ్లిద్దరూ పెళ్లి చేసుకోబోతున్నారంటూ వార్తలు సైతం వినిపించాయి. ఇదే విషయంపై ఓ అవార్డు ఫంక్షన్ లో సిద్ధార్థ్ స్పందిస్తూ.." మేము రహస్యంగా నిశ్చితార్థం చేసుకున్నామని అంటున్నారు. నిజానికి సీక్రెట్‌, ప్రైవేట్‌ అనే పదాలకు నా దృష్టిలో చాలా వ్యత్యాసం ఉంది. మాది పెద్దల సమక్షంలో జరిగిన ప్రైవేట్‌ ఫంక్షన్‌. మా నిశ్చితార్థానికి ఎవరినైతే పిలవలేదో వారు ఇది సీక్రెట్‌ అని అంటున్నారు. ఇవన్ని నేను పట్టించుకోను. మాది షూటింగ్‌ డేట్‌ కాదు, లైఫ్ టైమ్ డేట్‌. పెద్దల నిర్ణయం ప్రకారమే మా పెళ్లి జరుగుతుంది" అని అన్నాడు.