Shreyas Talpade: బాలీవుడ్ నటుడు శ్రేయాస్ తల్పాడే‌కు హార్ట్ ఎటాక్ - ‘పుష్ప’లో అల్లు అర్జున్‌కు వాయిస్ ఇచ్చింది ఇతడే!

Shreyas Talpade: ఎన్నో బాలీవుడ్ హిట్ ఫ్రాంచైజ్‌లలో నటించి.. యాక్టర్‌గా గుర్తింపు తెచ్చుకున్న శ్రేయాస్ తల్పాడే హార్ట్ ఎటాక్ వచ్చి కుప్పకూలిపోయాడు. దీంతో కుటుంబ సభ్యులు తనను వెంటనే ఆసుపత్రికి తరలించారు.

శ్రేయాస్ తల్పాడే (Image Credit: Shreyas Talpade/Instagram)

‘పుష్ప: ది రైజ్’ మూవీ హిందీ వెర్షన్‌లో అల్లు అర్జున్‌కు డబ్బింగ్ చెప్పిన బాలీవుడ్ నటుడు శ్రేయాస్ తల్పాడే తీవ్ర అస్వస్థతకు గురయ్యాడు. శ్రేయాస్ తన అప్‌కమింగ్ చిత్రానికి షూటింగ్ జరుపుకుంటున్న సమయంలోనే హార్ట్ ఎటాక్ వచ్చిందని బాలీవుడ్ మీడియా అంటోంది. దీంతో తనను ముంబాయ్‌లోని ఆసుపత్రికి తరలించారు. వెంటనే తనకు ఆంజియోప్లాస్టి చేశారని సమాచారం.

రోజంతా సరదాగా ఉన్నాడు..
ప్రస్తుతం శ్రేయాస్ తల్పాడే ‘వెల్‌కమ్ టు ది జంగిల్’ అనే సినిమా షూటింగ్‌లో బిజీగా ఉన్నాడు. రోజంతా ఆ సినిమా షూటింగ్‌లో పాల్గొన్న తర్వాత గురువారం సాయంత్రం శ్రేయాస్‌కు హార్ట్ ఎటాక్ వచ్చి కుప్పకూలిపోయాడని సమాచారం. దీంతో వెంటనే తనను ముంబాయ్ అంధేరీ వెస్ట్‌లో ఉన్న బెల్లే వ్యూ హాస్పిటల్‌కు తరలించారు. ఆంజియోప్లాస్టి చేయడంతో ప్రస్తుతం శ్రేయాస్ ఆరోగ్యం స్టేబుల్‌గా ఉందని తెలుస్తోంది. రోజంతా షూటింగ్‌లో పాల్గొనడంతో ఇలా జరిగిందా అని బాలీవుడ్ మీడియా.. మూవీ టీమ్‌ను ప్రశ్నించింది. తన సహ నటులు మాత్రం శ్రేయాస్ రోజంతా సరదాగానే ఉన్నాడని, జోకులు వేసుకుంటూ నవ్వుకుంటూ తిరిగాడని చెప్పారు. షూటింగ్ నుంచి ఇంటికి వెళ్లిన వెంటనే తన ఆరోగ్యం బాగా లేదని, ఎందుకో ఇబ్బందిగా ఉందని తన భార్య దీప్తితో చెప్పాడట శ్రేయాస్.

ప్రముఖ హిట్ ఫ్రాంచైజ్‌లో..
గురువారం రాత్రి దాదాపు 10 గంటలకు శ్రేయాస్ తల్పాడేకు ఆంజియోప్లాస్టి చేశారు డాక్టర్లు. ప్రస్తుతం తన ఆరోగ్యం స్టేబుల్ అయ్యిందని, కొన్నిరోజుల్లోనే డిశ్చార్జ్ చేసే అవకాశాలు ఉన్నాయని డాక్టర్లు తెలిపారు. ప్రస్తుతం శ్రేయాస్ నటిస్తున్న ‘వెల్‌కమ్ టు ది జంగిల్’ అనేది ప్రముఖ బాలీవుడ్ హిట్ ఫ్రాంచైజ్ ‘వెల్‌కమ్’లో భాగంగా తెరకెక్కుతోంది. ఇప్పటికే ఈ ఫ్రాంచైజ్‌లో రెండు సినిమాలు వచ్చి హిట్ కొట్టగా ఇప్పుడు మూడో పార్ట్ షూటింగ్ జరుపుకుంటోంది. ‘వెల్‌కమ్ టు ది జంగిల్’ చిత్రంలో శ్రేయాస్ తల్పాడేతో పాటు అక్షయ్ కుమార్, దిశా పటానీ, సునీల్ శెట్టి, పరేశ్ రావల్, రవీనా టండన్, జాక్వెలిన్ ఫెర్నాండెజ్, సంజయ్ దత్ వంటి స్టార్లు నటిస్తున్నారు. ఈ సినిమాను అహ్మద్ ఖాన్ డైరెక్ట్ చేస్తున్నాడు.

సుష్మితా సేన్‌కు కూడా..
బాలీవుడ్‌లో ఒక ప్రముఖ నటుడికి, అది కూడా వయసులో చిన్న అయినవారికి హార్ట్ ఎటాక్ రావడం.. ఈ ఏడాదిలో ఇది రెండోసారి. 2023 మార్చిలో తనకు హార్ట్ ఎటాక్ వచ్చిన విషయాన్ని తాజాగా బయటపెట్టింది సుష్మితా సేన్. దాని వల్ల తనకు కూడా ఆంజియోప్లాస్టి చేయాల్సి వచ్చిందని తెలిపింది. ఈ విషయాన్ని ఇన్‌స్టాగ్రామ్ పోస్ట్‌లో షేర్ చేసిన సుష్మితా.. ‘కొన్నిరోజుల క్రితం నాకు హార్ట్ ఎటాక్ వచ్చింది. ఆంజియోప్లాస్టి జరిగింది. స్టెంట్ వేశారు. ముఖ్యమైన విషయం ఏంటంటే నాకు చాలా పెద్ద మనసు ఉందని నా కార్డియోలజిస్ట్ కన్ఫర్మ్ చేశారు’ అని చెప్పింది. అనూహ్యంగా శ్రేయాస్ తల్పాడే వయసు 47 ఏళ్లు కాగా.. సుష్మిత వయసు కూడా 47 ఏళ్లే. ‘పుష్ప’ మూవీలో అల్లు అర్జున్ డైలాగ్స్‌కు హిందీలో ప్రాణం పోశాడు శ్రేయాస్. అప్పటి నుంచి మరింత ఫేమస్ అయ్యాడు.