'RC16' విషయంలో బుచ్చిబాబు పై మరింత ఒత్తిడి - కారణం అదేనా?

'ఉప్పెన' సినిమాకి జాతీయ అవార్డు రావడంతో దర్శకుడు బుచ్చిబాబు రాంచరణ్ తో చేయబోయే సినిమాపై మరింత జాగ్రత్తలు తీసుకుంటున్నట్టు తెలుస్తుంది. జాతీయ అవార్డుతో ఓ రకంగా బుచ్చిబాబు పై భారీగా ఒత్తిడి పెరిగింది.

బుచ్చిబాబు, రామ్ చరణ్ (Photo Credit : Ram Charan/twitter)

'ఉప్పెన' సినిమాతో తెలుగు వెండితెరకి దర్శకుడిగా పరిచయమయ్యాడు బుచ్చిబాబు (Buchi Babu Sana). ఈ సినిమా ఎంత పెద్ద సక్సెస్ అయిందో తెలిసిందే. ఇక తాజాగా ఈ సినిమాకి జాతీయ అవార్డు రావడం అందరిని ఆశ్చర్యపరచింది. 'ఉప్పెన' చిత్రానికి నేషనల్ అవార్డు రావడంతో బుచ్చిబాబు ఆనందం మామూలుగా లేదు. ఇక ఈ దర్శకుడు త్వరలోనే తన తదుపరి చిత్రాన్ని మెగా పవర్ స్టార్ రామ్ చరణ్ (Ram Charan)తో చేయబోతున్న సంగతి తెలిసిందే. స్పోర్ట్స్ బ్యాక్ డ్రాప్ లో చాలా డిఫరెంట్ కాన్సెప్ట్ తో ఈ సినిమా రూపొందనుందని ఇప్పటికే వార్తలు వచ్చాయి. 'ఆర్ ఆర్ ఆర్', 'గేమ్ ఛేంజర్' వంటి భారీ ప్రాజెక్టుల తర్వాత రామ్ చరణ్ చేస్తున్న సినిమా కావడంతో ఈ చిత్రంపై భారీ స్థాయిలో అంచనాలు ఉన్నాయి.

ఇప్పటికే స్క్రిప్ట్ పనులను పూర్తి చేసిన బుచ్చిబాబు ఈ ప్రాజెక్ట్ 2024 జనవరి నుంచి రెగ్యులర్ షూటింగ్ స్టార్ట్ చేసేలా ప్లాన్ చేసుకుంటున్నాడు. ఈలోపు రామ్ చరణ్ 'గేమ్ ఛేంజర్' షూటింగ్ పూర్తి చేస్తేనే జనవరిలో బుచ్చిబాబు ప్రాజెక్ట్ రెగ్యులర్ షూటింగ్ కి వెళ్లడం సాధ్యమవుతుంది. ఎందుకంటే బుచ్చిబాబు మూవీ కోసం చరణ్ పూర్తిగా కొత్త మేకోవర్ చేసుకోవాల్సి ఉంటుంది. 'ఉప్పెన'కి జాతీయ అవార్డు రావడంతో దర్శకుడుగా బుచ్చిబాబుపై మరింత బాధ్యత పెరిగింది. ఓ పక్క తన మీద అంచనాలు, మరో పక్క రామ్ చరణ్ ని హ్యాండిల్ చేస్తున్న ఒత్తిడి... ఈ రెండు బ్యాలెన్స్ చేసుకోవడం అంత ఈజీ కాదు. పైగా భారీ బడ్జెట్ ని చేతిలో పెట్టినప్పుడు ప్రాజెక్ట్ ని పక్కగా తెరకెక్కించాల్సి ఉంటుంది.

ఇదంతా ఎలా ఉన్నా ఇప్పుడున్న జనరేషన్ డైరెక్టర్స్ లో ఎవరికి దక్కని గొప్ప ఘనత బుచ్చిబాబుకి దక్కింది. 'ఉప్పెన' సినిమాకి దర్శకుడుగా జాతీయ అవార్డు రాకపోయినా ఆ సినిమాని తీసిన ఘనత ఆయనకే చెందింది కాబట్టి ఈ దర్శకుడిని ఏ కోణంలోనూ తక్కువ చేసి చూడలేము. అందుకే ఇప్పుడు రామ్ చరణ్ ప్రాజెక్టు కోసం బుచ్చిబాబు పై మరింత బరువు, బాధ్యతలు పెరిగినట్లు తెలుస్తోంది. భవిష్యత్తులో ఎన్టీఆర్ లాంటి అగ్ర హీరోతో సినిమా  ప్లానింగ్ తో ఉన్న ఈ ఈ దర్శకుడు రామ్ చరణ్ తో సినిమా తీసి ప్రూవ్ చేసుకోవడం చాలా కీలకం. వైష్ణవ్ తేజ్ అంటే కొత్త హీరో కాబట్టి అతని మీద ఏం చేసినా, ఏ ప్రయోగం చేసినా చెల్లి పోయింది.

కానీ ఇప్పుడు అలా కాదు. రామ్ చరణ్ సినిమా కోసం చాలా సవాళ్లు ఎదుర్కోవాల్సి ఉంటుంది. కాబట్టి బుచ్చిబాబు ఈ సినిమా విషయంలో చిన్న తప్పు చేసినా దాని తీవ్రత పెద్ద మోతాదులో ఉంటుంది. మరి బుచ్చిబాబు వీటన్నింటినీ దృష్టిలో పెట్టుకొని రామ్ చరణ్ ప్రాజెక్ట్ ని ఎలా హ్యాండిల్ చేస్తాడు అనేది చూడాలి. 'RC16' అనే వర్కింగ్ టైటిల్ తో ప్రకటించిన ఈ ప్రాజెక్ట్ కోసం రామ్ చరణ్ కి జోడిగా బాలీవుడ్ బ్యూటీ జాన్వీ కపూర్ ని హీరోయిన్ గా అనుకుంటున్నారట. అలాగే ఆస్కార్ విన్నింగ్ మ్యూజిక్ డైరెక్టర్ ఏ ఆర్ రెహమాన్ సంగీత దర్శకుడిగా వ్యవహరించబోతున్నట్లు వార్తలు వినిపిస్తున్నాయి. వ్రిద్ధి సినిమాస్, మైత్రీ మూవీ మేకర్స్ కలిసి ఈ చిత్రాన్ని నిర్మిస్తున్నారు.

Join Us on Telegram: https://t.me/abpdesamofficial