Kushi Movie : విజయ్ దేవరకొండ 'ఖుషి'ని ఎందుకు చూడాలి? స్పెషల్ ఎట్రాక్షన్స్ ఏంటి?

Kushi Review : విజయ్ దేవరకొండ, సమంత జంటగా నటించిన సినిమా 'ఖుషి'. లవ్, రొమాంటిక్, ఫ్యామిలీ ఎంటర్‌టైనర్‌గా తెరకెక్కింది. ఈ సినిమాను ఎందుకు చూడాలి? స్పెషల్ ఎట్రాక్షన్స్ ఏంటి?

'ఖుషి'లో విజయ్ దేవరకొండ, సమంత

'ది' విజయ్ దేవరకొండ (Vijay Devarakonda) కథానాయకుడిగా నటించిన సినిమా 'ఖుషి'. ఇందులో సమంత (Samantha Ruth Prabhu) కథానాయిక. శివ నిర్వాణ దర్శకత్వం వహించారు. మైత్రీ మూవీ మేకర్స్ పతాకంపై నవీన్ ఎర్నేని, రవిశంకర్ యలమంచిలి నిర్మించారు. ఈ సినిమాను ఎందుకు చూడాలి? 'ఖుషి'లో స్పెషల్ ఎట్ట్రాక్షన్స్ ఏంటి? అనేది చూస్తే...

విజయ్ దేవరకొండ ప్రేమ కథ చేస్తే?
'ఖుషి'లో ఫస్ట్ & మెయిన్ ఎట్రాక్షన్ విజయ్ దేవరకొండ. ప్రేమ, ఫ్యామిలీ ఎమోషన్స్ నేపథ్యంలో ఆయన సినిమా చేస్తే తప్పకుండా హిట్టే. ఇప్పటి వరకు విజయ్ దేవరకొండ చేసిన సినిమాలు గమనించండి... 'పెళ్లి చూపులు', 'గీత గోవిందం' అన్ని వర్గాల ప్రేక్షకుల్ని ఆకట్టుకున్నాయి. 'అర్జున్ రెడ్డి'లో సైతం బలమైన ప్రేమ కథ ఉంటుంది. 'డియర్ కామ్రేడ్' ఓ సెక్షన్ ఆఫ్ ఆడియన్స్ ఫేవరెట్ ఫిల్మ్. 'ఖుషి' సినిమాలో విజయ్ దేవరకొండ ప్రేమికుడిగా, లవ్ మ్యారేజ్ చేసుకున్న భర్తగా కనిపించనున్నారు.

విజయ్ దేవరకొండ జోడీగా సమంత!
విజయ్ దేవరకొండ, సమంత జంటగా నటించిన చిత్రమిది. ఈ కాంబినేషన్ 'ఖుషి'కి కావాల్సిన క్రేజ్ తీసుకొచ్చింది. తెరపై చాలా కొత్తగా ఉంది. ఆల్రెడీ విడుదలైన పాటలు, ప్రచార చిత్రాల్లో ప్రేక్షకుల్ని ఆకట్టుకుంది కూడా! పైగా... ప్రేమ, పెళ్లి నేపథ్యంలో సినిమా అంటే సమంత అద్భుతంగా నటిస్తారు. ఆమె నటనకు తోడు చిన్మయి డబ్బింగ్ కూడా యాడ్ అయ్యింది. ప్రచార చిత్రాల్లో విజయ్ దేవరకొండ, సమంత కెమిస్ట్రీ ఆకట్టుకుంది. 

హిషామ్ పాటలు హిట్టు... మళ్ళీ వినేట్టు!
'ఖుషి' విడుదలకు ముందు ప్రేక్షకుల చూపు సినిమాపై పడేలా చేసిన అంశాల్లో పాటలు కీలక పాత్ర పోషించాయి. 'ఖుషి' పాటల కంటే ముందు సంగీత దర్శకుడు హిషామ్ అబ్దుల్ వాహెబ్ తెలుగులో అభిమానుల్ని సొంతం చేసుకున్నారు. ప్రణవ్ మోహన్ లాల్, దర్శన, కల్యాణీ ప్రియదర్శన్ నటించిన మలయాళ సినిమా 'హృదయం'లో పాటలు తెలుగు ప్రేక్షకులు చాలా మంది విన్నారు. 'ఖుషి' పటాలపై అంచనాలు పెంచుకున్నారు. ఆ అంచనాలకు తగ్గట్టు 'ఖుషి' సినిమాకు హిషామ్ బాణీలు అందించారు. 

సినిమా కాన్సెప్ట్ & ఈతరం ఆలోచనలు!
'ఖుషి'కి మరో మేజర్ ఎట్రాక్షన్... సినిమా కథాంశం! గతంతో పోలిస్తే ఇప్పుడు వివాహ వ్యవస్థలో మార్పులు వచ్చాయి. ప్రేమ పెళ్లిళ్లు ఎక్కువ అవుతున్నాయి. ఇంకా  సూటిగా చెప్పాలంటే... పెద్దలను కాదని వేరు కాపురాలు పెడుతున్న జంటలు సైతం సమాజంలో ఉన్నాయి. ప్రేమ, పెళ్లి తర్వాత ఎటువంటి పర్యవసానాలు ఉంటాయనే కథతో 'ఖుషి' తెరకెక్కించారని ట్రైలర్ చూస్తే తెలుస్తోంది. ఈతరం ప్రేక్షకులు కనెక్ట్ అయ్యే కథాంశం ఇది. థియేటర్లలో ప్రేక్షకులకు సర్‌ప్రైజ్‌లు ఉంటాయని, మరో రెండు క్యారెక్టర్లు ఉన్నాయని సంగీత దర్శకుడు హిషామ్ చెప్పారు. 

లాస్ట్, బట్ నాట్ లీస్ట్... శివ నిర్వాణ!
విజయ్ దేవరకొండ, సమంత ఈ సినిమా చేయడానికి... మైత్రీ మూవీ మేకర్స్ అన్ని డబ్బులు ఖర్చు చేయడానికి... హిషామ్ మంచి బాణీలు ఇవ్వడానికి... కారణమైన ఈ కథను రాసింది దర్శకుడు శివ నిర్వాణ. ఆయన ట్రాక్ రికార్డ్ చూస్తే... 'నిన్ను కోరి', 'మజిలీ' సినిమాల్లో పాత్రల మధ్య సంఘర్షణను ఆయన తెరకెక్కించిన తీరు మనసుకు హత్తుకునేలా ఉంటుంది. సున్నితమైన భావోద్వేగాలను చాలా చక్కగా శివ నిర్వాణ చూపిస్తారు. 'ఖుషి'లో ఏం చేశారో? వెయిట్ అండ్ వాచ్. 

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial