Kiran Abbavaram: సినిమా మధ్య నుండే వచ్చేశాను, అది మంచి సినిమా అని అసత్యం చెప్పలేను - కిరణ్ అబ్బవరం

Kiran Abbavaram: ఒకప్పుడు పక్కింటబ్బాయిగా గుర్తింపు తెచ్చుకున్న కిరణ్ అబ్బవరం.. ఇప్పుడు తన స్టోరీ సెలక్షన్ వల్ల ట్రోల్ ఎదుర్కుంటున్నాడు. తాజాగా తన సినిమాల్లో ఒకటి తనకే నచ్చలేదని బయటపెట్టాడు.

Image Credit: Kiran Abbavaram/Instagram

Kiran Abbavaram: ‘రాజావారు రాణీగారు’ లాంటి యూత్‌ఫుల్ సినిమాతో టాలీవుడ్‌లో హీరోగా పరిచయమయ్యాడు కిరణ్ అబ్బవరం. ఆ సినిమా సూపర్ సక్సెస్‌ను అందుకోవడంతో స్టార్ మేకర్స్ సైతం తనతో మూవీ చేయడానికి ముందుకొచ్చారు. అలా బ్యాక్ టు బ్యాక్ ఆఫర్లు బాగానే వచ్చినా కూడా ‘రాజావారు రాణీగారు’లాంటి సక్సెస్‌ను మాత్రం తను మళ్లీ చూడలేకపోయాడు. దీంతో రాకెట్‌లాగా సినిమాలు చేసినా హిట్లు రావడం లేదని కిరణ్‌పై ట్రోల్స్ పెరిగాయి. తాజాగా తన సినిమాల్లో ఒకటి తనకే నచ్చలేదని, అందుకే స్క్రీనింగ్ మధ్యలో నుండే వెళ్లిపోయానని ఆసక్తికర విషయాన్ని బయటపెట్టాడు.

అసత్యం ఎందుకు చెప్పాలి?

తాజాగా ఓ ఇంటర్వ్యూలో పాల్గొన్న కిరణ్ అబ్బవరం.. తన సినిమాల రిజల్ట్‌పై స్పందించాడు. ‘‘సినిమా ఇంటర్వెల్‌ అయ్యే సమయానికి మేము సరిగా తీయలేదని అర్థమయ్యింది. అది చాలా దారుణమైన సినిమా అని, అస్సలు చూడలేం అని నాకే అనిపించింది. అందుకే నేను స్క్రీనింగ్ నుండి బయటికి వచ్చేశాను. నేను ఆ సినిమా హీరోను కాబట్టి అలా మధ్యలో నుండి వచ్చేయడం కరెక్ట్ కాదని నా టీమ్ చెప్పారు. నేను హీరో అయితే ఏంటి? ఒక చెత్త సినిమాను మంచి సినిమా అని అబద్ధం చెప్పలేం కదా’’ అని చెప్పుకొచ్చాడు. అయితే అసలు అది ఏం సినిమా అని టైటిల్ మాత్రం రివీల్ చేయలేదు. దీంతో ప్రేక్షకులు అది ఏం సినిమా అయ్యింటుందా అని గెస్ చేయడం మొదలుపెట్టారు.

రహస్యతో ఎంగేజ్‌మెంట్..

ఇక బ్యాక్ టు బ్యాక్ సినిమాలు చేయడం కోసం కిరణ్ అబ్బవరం.. అసలు మంచి కథలను ఎంచుకోవడం లేదని అప్పట్లో తెగ ట్రోల్స్ వచ్చాయి. దీంతో సినిమాలు చేసే విషయంలో కాస్త స్పీడ్ తగ్గించాడు. చివరిగా రత్నం కృష్ణ దర్శకత్వంలో తెరకెక్కిన ‘రూల్స్ రంజన్’లో కనిపించాడు. ఇది కూడా తన కెరీర్‌లో మరో ఫ్లాప్‌ను యాడ్ చేసింది. ఇక ఈ మూవీ విడుదలయ్యి ఎన్నో నెలలు అవుతున్నా కూడా తన తరువాతి మూవీ నుండి ఎలాంటి అప్డేట్ ఇవ్వలేదు కిరణ్ అబ్బవరం. పైగా తాజాగా తన కో స్టార్ రహస్యను ఎంగేజ్‌మెంట్ చేసుకొని పర్సనల్ లైఫ్‌లో ఒక ముందడుగు వేశాడు. కిరణ్ అబ్బవరం, రహస్య కలిసి ‘రాజావారు రాణీగారు’తో తమ సినీ ప్రయాణాన్ని కలిసి మొదలుపెట్టారు.

రుక్సార్ జంటగా..

2019లో రవికిరణ్ కోలా దర్శకత్వంలో తెరకెక్కిన చిత్రమే ‘రాజావారు రాణీగారు’. ఇందులో హీరోహీరోయిన్లుగా నటించిన కిరణ్ అబ్బవరం, రహస్య ఎవరు అని అప్పటివరకు ప్రేక్షకులకు తెలియదు. అప్పటివరకు కిరణ్.. పలు షార్ట్ ఫిల్మ్స్‌లో హీరోగా నటించాడు. రహస్య మాత్రం క్యారెక్టర్ ఆర్టిస్టుగా సెటిల్ అయ్యింది. కానీ కథ రిఫ్రెషింగ్‌గా ఉండి, యూత్‌ను ఆకట్టుకోవడంతో ‘రాజావారు రాణీగారు’ సూపర్ హిట్‌ను అందుకుంది. ఆ తర్వాత హీరోగా కిరణ్ బిజీ అయిపోయినా రహస్య మాత్రం సినిమాలకు దూరంగా ఉంటూ తాజాగా ఈ హీరోనే ఎంగేజ్‌మెంట్ కూడా చేసుకుంది. ప్రస్తుతం కిరణ్ అబ్బవరం.. ‘దిల్ రుబా’ అనే చిత్రంలో నటిస్తున్నాడు. ఇందులో రుక్సార్ ధిల్లోన్ హీరోయిన్‌గా కనిపించనుంది.