రేణూ దేశాయ్‌పై అనుచిత వ్యాఖ్యలు - ఆ కామెంట్స్ చేసిన టీవీ చానెల్ ఉద్యోగిపై వేటు?

పవన్ కళ్యాణ్ తన్ని తరిమేశాడంటూ ఓ నెటిజన్ కామెంట్స్ చేయడంపై ఇటీవల ఆయన మాజీ భార్య రేణూ దేశాయ్ ఆవేదన వ్యక్తం చేసింది. ఆ కామెంట్ చేసిన వ్యక్తి ఎవరనే విష‌యం ఇప్పుడు బయటకు వచ్చింది. 

Image Credit: Renu Desai/Instagram

ఇటీవ‌ల త‌న‌ మాజీ భ‌ర్త ప‌వ‌న్‌ క‌ల్యాణ్‌ ను ఉద్దేశిస్తూ రేణు దేశాయ్ ఓ వీడియో సందేశం పోస్ట్ చేసిన సంగతి తెలిసిందే. తన విష‌యంలో పవన్ చేసింది వంద‌ శాతం తప్పేనని, కానీ రాజ‌కీయంగా మాత్రం తన మ‌ద్ద‌తు ఆయ‌న‌కే ఉంటుందని ప్రకటించింది. ప‌వ‌న్ డ‌బ్బు మ‌నిషి కాద‌ని, స‌మాజానికి మంచి చేయాల‌నే త‌ప‌న‌తో రాజ‌కీయాల్లోకి వ‌చ్చాడని, ఒక్కసారి అవ‌కాశం ఇవ్వాల‌ని కోరింది. దీనిపై సోషల్ మీడియాలో భిన్నాభిప్రాయాలు వ్య‌క్త‌మ‌య్యాయి. ఈ క్రమంలో ఓ నెటిజన్ ఆమెపై ఘాటు వ్యాఖ్యలు చేయగా.. ఆ విషయాన్ని రేణూ ఇంస్టాగ్రామ్ లో తెలుపుతూ ఆవేదన వ్యక్తం చేసింది. అయితే ఆ కామెంట్స్ చేసిన వ్యక్తి ఓ మీడియా సంస్థకి చెందిన ఉద్యోగి అని ప్రచారం జరుగుతోంది. 

జనసేన అధినేత పవన్‌ గురించి రేణూ దేశాయ్ మాట్లాడిన వీడియోకి ఓ నెటిజన్ స్పందిస్తూ.. ‘‘అందుకే పవన్ కళ్యాణ్ నిన్ను తన్ని తరిమేశాడు మేడమ్’’ అని కామెంట్ చేశాడు. దీనికి బాధ పడిన రేణూ ‘‘నన్ను తిట్టడంతో నీకు మనశ్శాంతి దొరికిందా? లేదంటే ఇంకా తిట్టండి. నా మాజీ భర్తను ఫాలో అయ్యేవారు లేదా ఆయన వ్యతిరేకుల నుంచి తిట్లు వినడం మాత్రమే నా జీవితానికి అర్థం. కానివ్వండి’’ అంటూ వాపోయింది. దీనికి సంబంధించిన స్క్రీన్ షాట్ ను షేర్ చేస్తూ, పెద్ద నోట్ రాసుకొచ్చింది. 

‘‘నేను విడాకుల గురించి, నా మాజీ భర్త చేతిలో ఎలా మోసపోయాననే దాని గురించి మాట్లాడినప్పుడు తన ఫ్యాన్స్ నన్ను వేధింపులకు గురిచేశారు. ఇప్పుడు ఒక పౌరురాలిగా ఆయనకు ఫేవర్ గా నిజాయితీగా మాట్లాడినందుకు.. ఆయన హేటర్స్ నన్ను నిందిస్తున్నారు. ఒకప్పుడు విడాకుల గురించి మాట్లాడడానికి ఆయన వ్యతిరేక వర్గం నుంచి డబ్బు తీసుకున్నానని అనేవాళ్లు. ఇప్పుడు నేను నా మాజీ భర్తకు చెందిన వ్యక్తుల నుండి డబ్బు తీసుకున్నానని ఆరోపిస్తున్నారు. నేను రెండు సందర్భాల్లో నిజం తప్ప ఇంకేమీ మాట్లాడలేదు. ప్రేమలో పడినందుకు, నిజాలు మాట్లాడినందుకు ఇదంతా అనుభవించక తప్పదేమో. ఒకవేళ ఇదే నా తలరాత అయితే, అలాగే ఉండండి. ఇంకా తిట్టడం స్టార్ట్ చేయండి’’ అని రేణూ దేశాయ్ పోస్ట్ చేయడం చ‌ర్చ‌నీయాంశ‌మైంది. 

అటు పవన్ కళ్యాణ్ అభిమానుల నుంచి ఇటు యాంటీ పవన్ ఫ్యాన్స్ నుంచి తాను ఎలాంటి ఇబ్బందులు ఎదుర్కొంటున్నాననేది చెబుతూ ఆవేదన వ్యక్తం చేయడంతో అందరూ రేణు దేశాయ్ పై సానుభూతి వ్య‌క్తం చేస్తున్నారు. ఆమెపై నెగెటివ్ కామెంట్స్ చేసిన నెటిజన్ ను దూషిస్తూ తమ మద్దతు తెలుపుతున్నారు. అయితే ఇప్పుడు మీడియా సర్కిల్స్ లో వినిపిస్తున్న టాక్ ప్రకారం, రేణూపై కామెంట్స్ చేసిన వ్యక్తి ఓ ప్రముఖ టీవీ చానెల్‌లో పని చేస్తున్నాడని తెలుస్తోంది. ఈ విషయం తెలిసి యాజమాన్యం అతణ్ని ఉద్యోగం నుంచి తొలగించారని చెప్పుకుంటున్నారు. 

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial