Payal Ghosh: ఎన్టీఆర్ హీరోయిన్ పై యాసిడ్ ఎటాక్.. అంతా ప్లాన్ ప్రకారమే..

ముఖానికి మాస్క్ వేసుకొని వచ్చిన కొందరు వ్యక్తులు తనపై దాడి చేసినట్లు హీరోయిన్ పాయల్ ఘోష్ వెల్లడించింది.

Written By : ABP Desam | Updated at : 21 Sep 2021 05:44 PM (IST)

హీరోయిన్ పై యాసిడ్ ఎటాక్

ముఖానికి మాస్క్ వేసుకొని వచ్చిన కొందరు వ్యక్తులు తనపై దాడి చేసినట్లు హీరోయిన్ పాయల్ ఘోష్ వెల్లడించింది. ముంబైలో ఓ షాపులో మందులు కొనుక్కొని తిరిగి వచ్చి కారులో కూర్చుంటున్న సమయంలో ఈ దాడి జరిగినట్లు పేర్కొంది. పాయల్ తనపై జరిగిన దాడికి సంబంధించిన విషయాలను తెలియజేస్తూ.. ఇన్స్టాగ్రామ్ లో ఓ వీడియోను పోస్ట్ చేసింది. అందులో ఆమె తన కారులోకి వెళ్తుండగా.. కొంతమంది మాస్క్ ధరించిన వ్యక్తులు రాడ్ తో దాడి చేశారని వారి చేతిలో యాసిడ్ బాటిల్ కూడా ఉందని పాయల్ తెలిపింది.

Also Read: లహరి మావయ్యగా రవి.. ఫన్నీ టాస్క్ తో నవ్వించే ప్రయత్నం..

అయితే ఈ దాడి నుంచి తాను తప్పించుకున్నట్లు.. కానీ ఎడమ చేతికి గాయాలయ్యాయని తెలిపింది. దాడి జరుగుతున్న సమయంలో గట్టిగా అరవడంతో వారు అక్కడ నుంచి పారిపోయారని తెలిపింది. ఇలాంటి సంఘటన తన జీవితంలో ఎప్పుడూ జరగలేదని.. ఇదే మొదటిసారి అని పాయల్ చెప్పుకొచ్చింది. ఈ విషయంపై పోలీస్ కేసు నమోదు చేయనున్నట్లు స్పష్టం చేసింది. ఈ దాడికి సంబంధించి ఎవరినైనా.. అనుమానిస్తున్నారా అనే విషయంపై కొన్ని కామెంట్స్ చేసింది పాయల్.

తెలిసినవాళ్లు కాదు కానీ ఓ ప్లాన్ ప్రకారం చేశారని.. దీనిపై కఠిన చర్యలు తీసుకోవాలని కోరింది. ఆ సంఘటన తరువాత నుంచి ప్రతి క్షణం తనకు భయమేస్తుందని.. దాన్ని తలుచుకుంటుంటే ఇప్పటికీ కంగారుగానే ఉంటుందని వివరించింది.

పాయల్ కెరీర్ విషయానికొస్తే.. 'ప్రయాణం' సినిమాతో హీరోయిన్ గా పరిచయమైన ఈ బ్యూటీ ఆ తరువాత 'ఊసరవెల్లి' సినిమాలో హీరోయిన్ ఫ్రెండ్ క్యారెక్టర్ లో కనిపించింది. ఆ సినిమా ఫ్లాప్ అవ్వడంతో ఆమెకి టాలీవుడ్ లో అవకాశాలు రాలేదు. 'పటేల్ కీ పంజాబీ షాదీ' అనే సినిమాతో బాలీవుడ్ లో ఎంట్రీ ఇచ్చింది. అక్కడ కూడా ఆమెకి నిరాశే ఎదురైంది. ఇదిలా ఉండగా.. గతేడాది ఈ బ్యూటీ ప్రముఖ దర్శకుడు అనురాగ్ కశ్యప్ పై మీటూ ఆరోపణలు చేసింది.