Five years Law Course: ఇంటర్ తర్వాత మూడేళ్ల లా డిగ్రీ పిటిషన్‌పై విచారణకు సుప్రీంకోర్టు నిరాకరణ

ఇంటర్ తర్వాత నేరుగా మూడేళ్ల కోర్సుకు సాధ్యాసాధ్యాలపై దాఖలైన పిటిషన్‌పై సుప్రీంకోర్టు ఆగ్రహం వ్యక్తంచేసింది. ప్రస్తుతం అమల్లో విధానం బాగానే ఉందంటూ.. పిటిషన్‌పై విచారణ జరిపేందుకు నిరాకరించింది.

లా కోర్సు అర్హతల మార్పుపై సుప్రీం ఆగ్రహం

Five Years Law Degree: ఇంటర్ లేదా తత్సమాన విద్యాభ్యాసం పూర్తయిన తర్వాత నేరుగా మూడేళ్ల లా కోర్సు (LLB Degree) చదివేందుకు అవకాశం ఉండాలని అభ్యర్థిస్తూ సుప్రీంకోర్టులో పిటిషన్ దాఖలైన సంగతి తెలిసిందే. అయితే ఈ పిటిషన్‌పై సుప్రీంకోర్టు ఆగ్రహం వ్యక్తంచేసింది. ప్రస్తుతం అమల్లో ఉన్న కోర్సు విధానం బాగానే ఉందని స్పష్టంచేస్తూ.. పిటిషన్‌పై విచారణ జరిపేందుకు నిరాకరించింది. తక్షణమే పిటిషన్‌ను ఉపసంహరించుకోవాలని కోరింది.

ప్రస్తుతం లా కోర్సుల్లో అర్హతలకు సంబంధించి.. డిగ్రీ పూర్తిచేసినవారు మూడేళ్ల లా కోర్సులో, ఇంటర్ లేదా 12వ తరగతి ఉత్తీర్ణులైన వారు అయిదేళ్ల లా కోర్సులో చేరడానికి అర్హులు. అయితే, ఇంటర్ తర్వాత నేరుగా మూడేళ్ల కోర్సుకు సాధ్యాసాధ్యాలను పరిశీలించేందుకు నిపుణుల కమిటీని నియమించేలా కేంద్రం, బార్ కౌన్సిల్ ఆఫ్ ఇండియాను ఆదేశించాలని కోరుతూ న్యాయవాది అశ్వినీ ఉపాధ్యాయ్ పిటిషన్ దాఖలు చేశారు. మేధావులైన విద్యార్థులు మూడేళ్లలోనే న్యాయవాద కోర్సును పూర్తి చేయగలరని, ప్రస్తుత విధానం వల్ల అయిదేళ్ల కోర్సుతో వారికి సమయం వృథా అవుతుందన్నారు. ఈ విధానం వల్ల పేదలు, అమ్మాయిలు ఇబ్బంది పడుతున్నారని పిటిషన్‌లో పేర్కొన్నారు. 

ధర్మాసనం అసహనం..
ఈ పిటిషన్‌పై ప్రధాన న్యాయమూర్తి జస్టిస్‌ చంద్రచూడ్‌ నేతృత్వంలోని ధర్మాసనం తీవ్ర అసహనం వ్యక్తం చేసింది. ‘‘మూడేళ్లు కూడా ఎందుకు? హైస్కూల్‌పూర్తవగానే నేరుగా లా ప్రాక్టీస్‌ మొదలు పెట్టేయండి’’ అంటూ పిటిషనర్‌పై ఆగ్రహం వ్యక్తం చేసింది. న్యాయవిద్యకు అయిదేళ్ల కోర్సు కూడా సరిపోతదని, కానీ ప్రస్తుత విధానం సరైన మార్గంలోనే పనిచేస్తోందని కోర్టు తెలిపింది. ఇక దీనిపై ఆలోచించడానికి ఏమీ లేదు. ప్రస్తుతం జిల్లాస్థాయి న్యాయవ్యవస్థల్లో 70 శాతం మంది మహిళలు ఉన్నారు. రానున్న రోజుల్లో మరింతమంది స్త్రీలు లా కోర్సుల్లో చేరతారని ధర్మాసనం వ్యాఖ్యానించింది. వెంటనే పిటిషన్‌ను ఉపసంహరించుకోవాలని కోర్టు ఆదేశించింది.

తెలంగాణ లాసెట్‌ దరఖాస్తు గడువు పొడిగింపు..
టీఎస్‌ లాసెట్‌, పీజీఎల్‌‌సెట్‌ 2024 దరఖాస్తు గడువును ఉస్మానియా యూనివర్సిటీ పొడిగించిన సంగతి తెలిసిందే. ఏప్రిల్ 25 వరకు దరఖాస్తు చేసుకోవచ్చు. అభ్యర్థులు ఎలాంటి ఆలస్య రుసుము లేకుండా ఏప్రిల్ 25 వరకు దరఖాస్తులు సమర్పించవచ్చు. అయితే రూ.500 ఆలస్యరుసుముతో మే 4 వరకు, రూ.1000 ఆలస్యరుసుముతో మే 11 వరకు, రూ.2000 ఆలస్యరుసుముతో మే 18 వరకు, రూ.4000 ఆలస్యరుసుముతో మే 25 వరకు దరఖాస్తుకు అవకాశం కల్పించారు. దరఖాస్తు చేసుకున్న అభ్యర్థులకు ఎడిట్‌ (Lawcet Application Edit) చేసుకునేందుకు మే 20 నుంచి 25 వరకు అవకాశం కల్పించారు. అభ్యర్థులు మే 30 నుంచి హాల్‌టికెట్లు డౌన్‌లోడ్‌ చేసుకోవచ్చు. 
తెలంగాణ లాసెట్ దరఖాస్తు కోసం క్లిక్ చేయండి..

ఏపీలాసెట్ దరఖాస్తుకు ఏప్రిల్ 25 వరకు అవకాశం..
ఏపీలో లాసెట్, పీజీఎల్ సెట్ దరఖాస్తు ప్రక్రియ ప్రారంభమైంది. మార్చి 22న లాసెట్, పీజీఎల్ సెట్ నోటిఫికేషన్ విడుదల కాగా.. మార్చి 23 నుంచి ఆన్‌లైన్ దరఖాస్తు మొదలైంది. అభ్యర్థుల నుంచి మార్చి 23 నుంచి ఏప్రిల్ 25 వరకు దరఖాస్తులు స్వీకరించనున్నారు. అయితే రూ.500 ఆలస్య రుసుముతో మే 3 వరకు, రూ.1000 ఆలస్య రుసుముతో మే 11 వరకు, రూ.2000 ఆలస్య రుసుముతో మే 20 వరకు, రూ.3000 ఆలస్య రుసుముతో మే 29 వరకు  దరఖాస్తులు సమర్పించవచ్చు. 
ఏపీ లాసెట్ దరఖాస్తు కోసం క్లిక్ చేయండి..