Non Detention Policy: 5, 8 తరగతుల విద్యార్థులు పాస్ కావాల్సిందే - 'నో డిటెన్షన్ విధానం' రద్దు చేస్తూ కేంద్రం సంచలన నిర్ణయం

Central Government: కేంద్ర ప్రభుత్వం సంచలన నిర్ణయం తీసుకుంది. 5, 8 తరగతులకు సంబంధించి నాన్ డిటెన్షన్ విధానం రద్దు చేసింది. దీని ప్రకారం ఈ విద్యార్థులు పాస్ కాకుంటే మళ్లీ అదే తరగతి చదవాల్సి ఉంటుంది.

కేంద్ర ప్రభుత్వం సంచలన నిర్ణయం

Source : ABP Desam

Central Government Suspended Non Detention Policy: పాఠశాల విద్యార్థులకు సంబంధించి కేంద్ర ప్రభుత్వం సంచలన నిర్ణయం తీసుకుంది. కేంద్రీయ విద్యాలయాలు, నవోదయ, సైనిక్ పాఠశాలల్లో 'నో డిటెన్షన్ విధానం' (No Detention Policy) రద్దు చేసింది. ఈ క్రమంలో ఇకపై 5, 8 తరగతుల విద్యార్థులు వార్షిక పరీక్షల్లో తప్పనిసరిగా పాస్ కావాల్సి ఉంది. ఒకవేళ పాస్ కాకుంటే విద్యార్థులు మళ్లీ అదే తరగతుల్లో కొనసాగాల్సి ఉంది. విద్యా హక్కు చట్టం - 2019కు చేసిన సవరణ ప్రకారం దేశవ్యాప్తంగా తెలుగు రాష్ట్రాలు మినహా 16 రాష్ట్రాలు, 2 కేంద్ర పాలిత ప్రాంతాలు ఇప్పటికే ఈ 2 తరగతులకు సంబంధించి నో డిటెన్షన్ విధానాన్ని తొలగించాయని పేర్కొంది.

2 నెలల్లో మళ్లీ ఛాన్స్..

కేంద్ర ప్రభుత్వ గెజిట్ నోటిఫికేషన్ ప్రకారం.. పరీక్షల్లో విద్యార్థి పైతరగతులకు ప్రమోట్ కావడంలో విఫలమైతే.. మళ్లీ పరీక్ష రాసేందుకు కొంత సమయం ఇస్తారు. ఫలితాల ప్రకటన తేదీకి 2 నెలల్లోపే మళ్లీ పరీక్ష నిర్వహిస్తారు. ఒకవేళ ఆ పరీక్షలోనూ విద్యార్థి ఫెయిల్ అయితే.. సదరు విద్యార్థులు అదే తరగతుల్లోనే చదవాల్సి ఉంటుంది. ఎలిమెంటరీ విద్య పూర్తైనంత వరకూ ఏ విద్యార్థినీ బహిష్కరించరాదని స్పష్టం చేసింది. ఈ నోటిఫికేషన్ కేంద్ర ప్రభుత్వ పరిధిలోని దాదాపు 3 వేల కేంద్రీయ విద్యాలయాలు, నవోదయ, సైనిక్ పాఠశాలలకు వర్తిస్తుందని.. కేంద్ర విద్యా శాఖ ఉన్నతాధికారి ఒకరు తెలిపారు.

మరోవైపు, పాఠశాల విద్య రాష్ట్ర జాబితాలోని అంశం కనుక ఈ విషయంలో ఆయా రాష్ట్రాలు నిర్ణయం తీసుకోవచ్చని.. ఇప్పటికే 16 రాష్ట్రాలు, ఢిల్లీ సహా 2 కేంద్ర పాలిత ప్రాంతాలు ఈ 2 తరగతుల విద్యార్థులకు నో డిటెన్షన్ పాలసీని రద్దు చేసినట్లు అధికారులు వెల్లడించారు. హరియాణా, పుదుచ్చేరి ఇంకా ఎలాంటి నిర్ణయం తీసుకోలేదని.. మిగిలిన రాష్ట్రాలు మాత్రం ఈ విధానాన్నే కొనసాగించాలని నిర్ణయించుకున్నట్లు చెప్పారు. కాగా, నూతన విద్యా విధానంలో భాగంగా కేంద్ర ప్రభుత్వం డిటెన్షన్ విధానంపై గతంలో రాష్ట్రాల నుంచి అభిప్రాయాలను కోరింది. ఇక తెలుగు రాష్ట్రాల్లో 'నో డిటెన్షన్ విధానం' కొనసాగుతోంది.