Vijayawada Crime: విజయవాడలో విషాదాలు - రోడ్డు ప్రమాదంలో ఒకరు దుర్మరణం, మహిళా డ్యాన్సర్ అనుమానాస్పద మృతి

Telugu_News_Today_-_2024-10-29T153316177

Source : ABP Desam

Women Dancer suspicious death in Vijayawada | విజయవాడ: విజయవాడలో విషాదాలు చోటుచేసుకున్నాయి. విజయవాడ వారధి జంక్షన్ సమీపంలో జరిగిన రోడ్డు ప్రమాదంలో ఓ వ్యక్తి దుర్మరణం చెందాడు. చూడటానికే భయానక పరిస్థితి కనిపించింది. అజిత్‌ సింగ్‌నగర్‌లో మహిళా డ్యాన్సర్ అనుమానాస్పద స్థితిలో మృతిచెందడం కలకలం రేపుతోంది.

వారధి జంక్షన్ సమీపంలో ఘోర రోడ్డు ప్రమాదం
విజయవాడ వారధి జంక్షన్ గుడ్ మార్నింగ్ టీ స్టాల్ సమీపంలో మంగళవారం మధ్యాహ్నం ఘోర రోడ్డు ప్రమాదం చోటుచేసుకుంది. శీను అనే వ్యక్తి రాణిగారి తోటలో నివాసం ఉంటున్నాడు. ముఠా పని ముగించుకొని ఇంటికి వెళ్తున్నాడు. రోడ్డు దాటే క్రమంలో లారీ ఢీకొట్టడంతో రోడ్డు ప్రమాదం జరిగింది. బండి చక్రాలలో ఇరుకుపోయి తీవ్ర రక్తస్రావమై అక్కడికక్కడే మృతిచెందాడు. పని ముగించుకొని మధ్యాహ్న భోజనానికి ఇంటికి వెళ్తుండగా ప్రమాదం జరిగినట్లు స్థానికులు చెబుతున్నారు.

చెన్నై - విశాఖపట్నం రహదారిపై దూసుకొచ్చిన AP 39U7463 అనే లోడ్ లారీ విజయవాడ వారధి జంక్షన్ దాటక సాయిబాబా టెంపుల్ సమీపంలో శ్రీనును ఢీకొట్టింది. అనంతరం 10 మీటర్ల మేర ఈడ్చుకెళ్లడంతో శరీరం నుజ్జునుజ్జయి తీవ్ర రక్తస్రావం కావడంతో శ్రీను చనిపోయాడు. ప్రమాదం జరిగిన వెంటనే లారీ డ్రైవర్ భయంతో అక్కడి నుంచి పరారయ్యాడని సమాచారం. పోలీసులు కేసు నమోదు చేసి విచారణ చేపట్టారు. శ్రీను మృతదేహాన్ని పోస్ట్ మార్టం నిమిత్తం విజయవాడ గవర్నమెంట్ హాస్పిటల్ కి తరలించారు. అతివేగమే కారణమా, లేక శ్రీను అజాగ్రత్తగా నడవడంతో ప్రమాదం జరిగిందా తెలియాల్సి ఉంది.

ఈవెంట్‌ మహిళా డ్యాన్సర్‌ అనుమానాస్పద మృతి
విజయవాడలోని అజిత్‌ సింగ్‌ నగర్‌లో విషాదం చోటుచేసుకుంది. ఈవెంట్‌ మహిళా డ్యాన్సర్‌ అనుమానాస్పద స్థితిలో మృతిచెందడం స్థానికంగా కలకలం రేపుతోంది. బంటుపల్లి వెంకటలక్ష్మి(25) కాకినాడ నుంచి విజయవాడకు ఉపాధి కోసం వచ్చింది. గత కొంతకాలంగా విజయవాడలో నివాసం ఉంటూ కెరీర్ ను మలుచుకునేందుకు ప్రయత్నిస్తోంది. డ్యాన్సర్ వెంకట లక్ష్మీ అజిత్ సింగ్ నగర్ లో అద్దెకు ఉంటున్న ఇంట్లోనే అనుమానాస్పద స్థితిలో చనిపోయి కనిపించింది. ఉరి వేసుకున్న స్థితిలో మహిళా డ్యాన్సర్ డెడ్ బాడీని స్థానికులు గమనించారు. సమాచారం అందుకున్న పోలీసులు అజిత్ సింగ్ నగర్ చేరుకుని పరిశీలించారు. మహిళా డ్యాన్సర్ వెంకట లక్ష్మీ శరీరంపై గాయాలు ఉండటంతో ఇది కచ్చితంగా హత్య అయి ఉంటుందని స్థానికులు చెబుతున్నారు. ఆమె మృతదేహాన్ని పోస్టుమార్టం కోసం ప్రభుత్వ ఆసుపత్రికి తరలించారు. కేసు నమోదు చేసిన పోలీసులు విచారణ ప్రారంభించారు. ఆమెకు ఎవరితోనైనా గొడవలు ఉన్నాయా, ప్రేమ వ్యవహారం ఉన్నాయా.. లేక డబ్బులు, నగల కోసం హత్య చేసి ఉరివేసి ఆత్మహత్యగా చిత్రీకరించారా అనే కోణాల్లో దర్యాప్తు జరుగుతోంది.

(ఇది బ్రేకింగ్ న్యూస్. ప్రస్తుతం దీనిని అప్‌డేట్ చేస్తున్నాం. లేటేస్ట్ అప్‌డేట్‌ కోసం రిఫ్రెష్ చేయండి)