Kurnool Crime News: కర్నూలులో మాజీ ప్రియుడి భార్యకు HIV ఇంజెక్షన్ ఇచ్చిన యువతి! రివెంజ్ కోసం దారుణం
Kurnool News | తనను ప్రేమించిన వ్యక్తి మరో యువతిని వివాహం చేసుకున్నాడని కోపం పెంచుకుంది. మాజీ ప్రియుడి భార్యకు హెచ్ఐవీ ఇంజెక్షన్ ఇచ్చి జైలుపాలైంది. కర్నులు నగరంలో ఘటన జరిగింది.
Kurnool Crime News: కర్నూలు నగరంలో అత్యంత దారుణమైన, విస్తుపోయే ఘటన వెలుగులోకి వచ్చింది. తాను ప్రేమించిన వ్యక్తి మరో మహిళను వివాహం చేసుకున్నాడన్న కక్షతో, ఓ యువతి తన మాజీ ప్రియుడి భార్యకు హెచ్ఐవీ (HIV) వైరస్ను ఇంజెక్షన్ ద్వారా ఎక్కించడం కలకలం రేపుతోంది.
అసలేం జరిగింది..
కర్నూలుకు చెందిన ఒక డాక్టర్, ఆదోనికి చెందిన ఒక యువతి కొంతకాలం పాటు ప్రేమించుకున్నారు. అయితే, ఏం జరిగిందో కానీ వారి ప్రేమ పెళ్లిపీటల వరకు వెళ్లకుండానే విడిపోయారు. ఆ తర్వాత ఆ డాక్టర్ మరో మహిళా డాక్టర్ను వివాహం చేసుకున్నారు. బాధితురాలు కర్నూలు వైద్య కళాశాలలో అసిస్టెంట్ ప్రొఫెసర్గా పనిచేస్తుండగా, ఆమె భర్త ఒక ప్రైవేటు ఆసుపత్రిలో డాక్టర్ గా విధులు నిర్వహిస్తున్నారు.
తమ ప్రేమ విఫలమవడానికి కారణమైన మాజీ ప్రియుడైన డాక్టర్, అతని భార్యపై పగ పెంచుకున్న యువతి, వారిని విడదీయాలని దారుణమైన కుట్ర పన్నింది. ఈ నెల 9వ తేదీన మహిళా డాక్టర్ డ్యూటీ పూర్తి చేసుకుని తన ఇంటికి తిరిగి వెళ్తుండగా, నిందితురాలు నలుగురు వ్యక్తులతో కలిసి ఆమెను బైకుతో ఢీకొట్టి కిందపడేలా చేసింది. ప్రమాదానికి గురైన ఆమెకు సహాయం చేస్తున్నట్లు కొందరు వ్యక్తులు నటించారు. ఆటో ఎక్కించే క్రమంలో అత్యంత ప్రమాదకరమైన వైరస్ (HIV) నింపిన ఇంజెక్షన్ను ఆమె శరీరంలోకి ఎక్కించారు.
ఈ ఘటనపై అనుమానం వచ్చిన బాధితురాలి భర్త పోలీసులకు ఫిర్యాదు చేయడంతో అసలు విషయం బయటపడింది. కర్నూలు డీఎస్పీ బాబు ప్రసాద్ తెలిపిన వివరాల ప్రకారం.. మూడో పట్టణ పోలీసులు ఘటనా స్థలంలోని సీసీ కెమెరాల ఆధారంగా దర్యాఫ్తు చేపట్టి నిందితులను గుర్తించారు. ఈ కేసులో ప్రధాన సూత్రధారి అయిన మాజీ ప్రియురాలితో పాటు ఆమెకు సహకరించిన మరో నలుగురు వ్యక్తులను పోలీసులు అరెస్ట్ చేసి రిమాండ్కు తరలించారు. తాను ప్రేమించిన వ్యక్తితో పెళ్లి జరగలేదని, మరొకర్ని వివాహం చేసుకున్నాడని కోపంతో రగిలిపోయింది. ఆ డాక్టర్ జంట ఎలాగైనా విడిపోవాలని మాజీ ప్రియుడి భార్యకు వైరస్ ఇంజెక్షన్ చేసింది. డబ్బు ఇచ్చి కొందరు వ్యక్తుల సహకారంతో ఆమె ఈ పని చేసినట్లు పోలీసుల విచారణలో వెల్లడైంది.
టాప్ హెడ్ లైన్స్
ట్రెండింగ్ వార్తలు
