Bapatla Crime : కట్టుకున్న వాడే కాలయముడు, భార్యపై కత్తితో దాడి చేసి హత్య!

Bapatla Crime : బాపట్ల జిల్లాలో దారుణ ఘటన జరిగింది. మద్యానికి బానిసైన భర్త భార్యపై కత్తితో దాడి చేసి హత్య చేశాడు.

బాపట్లలో వివాహిత మర్డర్

Bapatla Crime : బాపట్ల జిల్లాలో దారుణం జరిగింది. కట్టుకున్న వాడే భార్యను కడతేర్చాడు. నిజాంపట్నం మండలం ఆముదాలపల్లిలో వివాహిత దారుణ హత్యకు గురైంది. భార్యను భర్త కత్తితో పీక‌ కోసి హత్య చేయడంతో ఆ ప్రాంతంలో ఒక్కసారిగా భయాందోళనలు నెలకొన్నాయి. నాగరాజు ఆటో డ్రైవర్ గా జీవనం సాగిస్తున్నాడు. మద్యానికి బానిసై  భార్య రమాదేవిని వేధించండం, దాడి చేయడం నిత్యకృత్యంగా మారింది. వేధింపులు భరించలేక తన పుట్టింటికి వెళ్లింది రమాదేవి. ప్రతిరోజు మద్యం తాగి భార్య పుట్టింటి వద్దకు వెళ్లి తాగాదాలాడటం ఇంటికి రావాలని లేకపోతే చంపేస్తానని బెదిరించడం చేసేవాడు. శనివారం మధ్వాహ్నం ఫూటుగా తాగిన నాగరాజు భార్య ఇంటి వద్దకు వెళ్లాడు. ఆ సమయంలో రమాదేవి  నిద్రపోతుంది. ఆమె తల్లిదండ్రులు పొలం పనులు వెళ్లారు. ఇంట్లో ఎవ్వరూ లేరు మద్యమత్తులో ఉన్న నాగరాజు నిద్రిస్తున్న రమాదేవిపై కత్తితో దాడి చేసి గొంతు కోయడంతో ఆమె అక్కడక్కడే  మృతి చెందింది. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు. వీరికి ఇద్దరు చిన్నారులు. తల్లి మృతదేహం వద్ద చిన్నారులు విలపించడం అక్కడ ఉన్న  ప్రతి ఒక్కరిని కంట తడి పెట్టించింది. హత్య చేసిన అనంతరం నిందితుడు నాగరాజు పోలీసులకు లొంగి పోయాడు. 

సినీఫక్కీలో భర్త మర్డర్ 

ఇంతకుముందు జరిగిన క్రైమ్స్ ఆధారంగా సినిమాలు తీశేవారు.. కానీ ఇప్పుడు అవే క్రైమ్ సినిమాలు చూసి తెలివిగా నేరాలు చేస్తున్నారు కొంతమంది. తాజాగా కర్ణాటకలో జరిగిన ఓ క్రైమ్ సీన్.. 'దృశ్యం-2' సినిమాను తలపించింది. వివాహేతర సంబంధాన్ని ప్రశ్నించినందుకు ప్రియుడితో కలిసి భార్య.. తన భర్తను హత్య చేసింది. సినిమా స్టైల్లో సాక్ష్యాలను తారుమారు చేసేందుకు ప్రయత్నించి.. చివరకు పోలీసులకు దొరికి పోయింది. బెంగళూరులోని సోలదేవనహళ్లిలో ఉండే ఓ జంటకు ఇద్దరు పిల్లలు ఉన్నారు. ఇద్దరూ వ్యవసాయం చేసుకుని బతుకుతున్నారు. కానీ భార్యాభర్తలు తరచూ గొడవ పడేవారు. అదే సమయంలో ఆ భార్యకు.. మరో వ్యక్తితో పరిచయం అయ్యింది. ఆ తర్వాత అతడితో వివాహేతర సంబంధం పెట్టుకుంది. అతడు ఎవరూ లేని సమయంలో వారి ఇంటికి వచ్చి వెళ్లేవాడు. కొన్ని రోజులకు భార్య వివాహేతర సంబంధం గురించి భర్తకు తెలిసింది. ఇదే విషయమై ఇటీవల ఓ రాత్రి భార్యతో గొడవ పడ్డాడు. అదే సమయంలో తన భర్తను ఎలాగైనా అడ్డు తొలగించుకోవాలని ఆమె ప్లాన్‌ వేసింది. ప్రియుడు ఇంటి వెనుక ద్వారం నుంచి అప్పటికే రాగా.. ఆమె తన భర్తను గొంతు కోసి చంపేసింది. ఆవుల కొట్టంలో నుంచి తాడు తెచ్చి కాళ్లు, చేతులను దగ్గరికి లాగి తాళ్లతో కట్టేసి సంచిలో వేశారు.

భర్త కనిపించడంలేదని ఫిర్యాదు 

కారులో మృతదేహాన్ని రామ్ నగర్ వద్దకు తీసుకెళ్లారు. మృతుడి ఫోన్‌ను ఓ ఖాళీ ప్రదేశంలో పడేశారు. తర్వాత సాక్ష్యాలు దొరక్కుండా హత్యకు ఉపయోగించిన వస్తువులను ఒక్కొక్కటిగా వేరే వేరే ప్రదేశంలో విసిరేశారు. తరువాత భర్త మృతదేహాన్ని మైసూరు-బెంగళూరు హైవే పక్కన ఉన్న ఓ కాలువలో 50 మీటర్ల లోతులో మృతదేహాన్ని పాతి పెట్టారు. ఆ తర్వాత రోజు మహిళ తనకు ఏమీ తెలియనట్లుగా నటించింది. పోలీసులకు తన భర్త కనిపించడం లేదంటూ ఫిర్యాదు చేసింది. ఈ కేసును సవాల్‌గా తీసుకున్న పోలీసులకు దర్యాప్తులో షాకింగ్ విషయాలు తెలిశాయి. భార్యే.. ప్రియుడితో కలిసి భర్తను చంపేసిందని దర్యాప్తులో తెలిసింది. రాంనగర్ జిల్లా కెంపేగౌడ దొడ్డి సమీపంలో అతని మృతదేహం లభ్యమైంది. దీంతో ఆమెతో సహా తన ప్రియుడ్ని పోలీసులు అరెస్ట్ చేశారు.