UP EV Policy: యూపీలో తయారైన ఈవీలకే సబ్సిడీలు- కొత్త రూల్ తీసుకొచ్చిన యోగి సర్కారు!
UP EV Policy: ఉత్తరప్రదేశ్ ప్రభుత్వం ఎలక్ట్రిక్ వాహనాల సబ్సిడీ నిబంధనలు మార్చింది. యూపీలో తయారైన వాటికే రోడ్ టాక్స్, రిజిస్ట్రేషన్ ఫీజులో 100% మినహాయింపు ఇస్తోంది
- యూపీలో తయారైన ఈవీలకు మాత్రమే పన్ను, రిజిస్ట్రేషన్ మినహాయింపు.
- అక్టోబర్ 14, 2025 నుంచి స్థానిక తయారీని ప్రోత్సహిస్తారు.
- యూపీ తయారీ/అసెంబుల్ సర్టిఫికేట్ ఉంటేనే సబ్సిడీ లభిస్తుంది.
- ఇతర రాష్ట్రాల ఈవీలపై ప్రభావం, ధరలు పెరిగే అవకాశం.
UP EV Policy: ఉత్తరప్రదేశ్ ప్రభుత్వం ఎలక్ట్రిక్ వాహన (EV) సబ్సిడీ సిస్టమ్లో మార్పులు చేర్పులు చేసింది. ఇకపై, అక్టోబర్ 14, 2025 అంటే మంగళవారం నుంచి ఉత్తరప్రదేశ్లో తయారు చేసిన లేదా అసెంబుల్ చేసిన ఎలక్ట్రిక్ వాహనాలకు మాత్రమే పన్ను, రిజిస్ట్రేషన్ ఫీజుల్లో మినహాయింపు లభిస్తుంది. ఈ చర్య రాష్ట్రంలో స్థానిక తయారీని ప్రోత్సహించే లక్ష్యంతో తీసుకున్నారు. రాబోయే రోజుల్లో యూపీ భారతదేశంలోనే అతిపెద్ద EV తయారీ కేంద్రంగా మారాలని ప్రభుత్వం కోరుకుంటోంది.
కొత్త నియమం ఏమిటి?
కొత్త నియమం అక్టోబర్ 14, 2025 నుంచి అమలులోకి వచ్చింది. ఈ తేదీ నుంచి, యూపీ ప్రభుత్వం "మేడ్ ఇన్ యూపీ" ఎలక్ట్రిక్ వాహనాలకు మాత్రమే 100% రోడ్ టాక్స్, రిజిస్ట్రేషన్ ఫీజు నుంచి మినహాయింపును అందిస్తుంది. అంటే, ఏదైనా ఎలక్ట్రిక్ కారు, స్కూటర్ లేదా బైక్ ఉత్తరప్రదేశ్లో తయారు చేసినా లేదా అసెంబుల్ చేసినా, అప్పుడే ఈ మినహాయింపు లభిస్తుంది. ఇతర రాష్ట్రాల్లో లేదా విదేశాల్లో తయారు చేసిన వాహనాలకు ఇకపై ఈ సౌకర్యం లభించదు. స్థానికంగా తయారు చేసిన వాహనాలను కొనుగోలు చేయాలని ప్రజలను ప్రోత్సహించడమే ప్రభుత్వ లక్ష్యం, తద్వారా రాష్ట్ర పరిశ్రమ బలోపేతం అవుతుంది . కొత్త ఉపాధి అవకాశాలు లభిస్తాయి.
సబ్సిడీ పొందే విధానం
సబ్సిడీ పొందాలనుకునే కస్టమర్లు తమ వాహనం ఉత్తరప్రదేశ్లో తయారు చేసిందని లేదా అసెంబుల్ చేశారని నిరూపించాలి. దీని కోసం, వాహనానికి "యూపీ తయారీ/అసెంబుల్ సర్టిఫికేట్" ఉండాలి. కస్టమర్లు సబ్సిడీ కోసం రాష్ట్ర EV సబ్సిడీ పోర్టల్లో దరఖాస్తు చేసుకోవాలి. దరఖాస్తు చేసిన తర్వాత, సంబంధిత RTO (ప్రాంతీయ రవాణా కార్యాలయం) వాహనం , డాక్యుమెంట్లను పరిశీలిస్తుంది. ధృవీకరణ పూర్తయిన తర్వాత మాత్రమే సబ్సిడీ లేదా పన్ను మినహాయింపు మంజూరు చేస్తారు.
వినియోగదారులపై ప్రభావం
ఈ మార్పు వినియోగదారులపై నేరుగా ప్రభావం చూపుతుందని చెప్పవచ్చు. ఒకవైపు, ఇది రాష్ట్రంలో తయారు చేసిన ఎలక్ట్రిక్ వాహనాల అమ్మకాలను పెంచుతుంది, దీనివల్ల కొత్త ఫ్యాక్టరీలు ఓపెన్ అయ్యే అవకాశం ఉంది. ఉపాధి అవకాశాలు పెరుగుతాయి. దీనివల్ల యూపీ EV రంగం మరింత బలపడవచ్చు. అయితే, మరోవైపు, టాటా, BYD, అథర్, MG వంటి యూపీలో తయారీ లేని బ్రాండ్లకు ఇది నష్టం కలిగిస్తుంది. ఇప్పుడు, వాటి EVలు సబ్సిడీ పరిధి నుంచి బయటకు వస్తాయి, దీనివల్ల వాటి ధర పెరగవచ్చు.
యూపీ EV పాలసీ నేపథ్యం
ఉత్తరప్రదేశ్ తన మొదటి EV విధానాన్ని అక్టోబర్ 14, 2022న అమలు చేసింది. ఆ విధానం ప్రకారం, మూడు సంవత్సరాల పాటు రోడ్ టాక్స్, రిజిస్ట్రేషన్ ఫీజు మినహాయింపు ఇచ్చింది. దీనితోపాటు, కొనుగోలుదారులకు నేరుగా రూ.5,000 నుంచి రూ.20 లక్షల వరకు సబ్సిడీ అందించారు. ఆ సమయంలో, ద్విచక్ర EVలపై రూ.5,000, నాలుగు చక్రాల కార్లపై రూ. లక్ష, ఎలక్ట్రిక్ బస్సులపై రూ.20 లక్షల వరకు సబ్సిడీ ఇచ్చారు. ఇప్పటివరకు దాదాపు 17,600 మంది వాహన యజమానులు దీనిని పొందారు, అయితే 38,300 దరఖాస్తులు ఇంకా పెండింగ్లో ఉన్నాయి.
టాప్ హెడ్ లైన్స్
ట్రెండింగ్ వార్తలు
