ఐదేళ్లలో 1 లక్ష సేల్స్ దాటిన Skoda Kushaq - Creta, Grand Vitara కు పోటీగా పాపులారిటీ
Skoda Kushaq భారత మార్కెట్లో 1 లక్ష అమ్మకాల మైలురాయిని చేరుకుంది. 2021లో లాంచ్ అయిన ఈ మిడ్సైజ్ ఎస్యూవీ ఇప్పటివరకు 4,632 యూనిట్లను ఎగుమతి చేసింది.
Skoda Kushaq crosses 1 lakh sales: భారత మార్కెట్లో స్కోడా కుషాక్ మరో కీలక మైలురాయిని చేరింది. 2021 జూన్ 28న విడుదలైన ఈ మిడ్సైజ్ SUV, తాజాగా 1 లక్ష అమ్మకాల మార్క్ను దాటింది. 2026 మే నెలాఖరు నాటికి మొత్తం 1,00,838 యూనిట్లు విక్రయించి, స్కోడా ఇండియా చరిత్రలో అత్యంత విజయవంతమైన ఎస్యూవీల్లో ఒకటిగా నిలిచింది.
కుషాక్ విడుదలైనప్పటి నుంచి స్కోడా బ్రాండ్కు భారత్లో బలమైన గుర్తింపును తీసుకొచ్చింది. దేశీయ మార్కెట్లో మాత్రమే కాకుండా అంతర్జాతీయ మార్కెట్లలో కూడా మంచి ఆదరణ పొందుతోంది. ఇప్పటివరకు 4,632 యూనిట్లను విదేశాలకు ఎగుమతి చేసినట్లు కంపెనీ వెల్లడించింది.
అయితే, అమ్మకాల పరంగా కుషాక్ ఈ మైలురాయిని చేరుకోవడానికి, కొన్ని ప్రధాన ప్రత్యర్థులతో పోలిస్తే కాస్త ఎక్కువ సమయం తీసుకుంది. హ్యుందాయ్ క్రెటా ఫేస్లిఫ్ట్ (Hyundai Creta facelift) విడుదలైన ఆరు నెలల్లోనే లక్ష అమ్మకాల మార్క్ను చేరుకోగా, మారుతి గ్రాండ్ విటారా (Maruti Grand Vitara) ఒకే ఏడాదిలో ఈ ఘనత సాధించింది. అయినప్పటికీ కుషాక్ తన విభాగంలో స్థిరమైన కస్టమర్ బేస్ను ఏర్పరుచుకోవడంలో విజయవంతమైంది.
ఆర్థిక సంవత్సరం వారీగా అమ్మకాలు
2021-22 ఆర్థిక సంవత్సరంలో కుషాక్ 21,427 యూనిట్లు విక్రయించింది. ఆ సమయంలో స్కోడా ఇండియా మొత్తం ఎస్యూవీ అమ్మకాలలో దాదాపు 98 శాతం వాటాను ఈ ఒక్క మోడల్నే సాధించింది. అదే సమయంలో స్కోడా కొడియాక్ కేవలం 381 యూనిట్లు మాత్రమే విక్రయించబడింది.
కుషాక్కు అత్యుత్తమ ఆర్థిక సంవత్సరం 2022-23. ఆ ఏడాదిలో 25,300 యూనిట్లు విక్రయించి, అంతకుముందు ఏడాదితో పోలిస్తే 18 శాతం వృద్ధిని నమోదు చేసింది. ఆ సమయంలో స్కోడా ఇండియా మొత్తం ఎస్యూవీ అమ్మకాలలో 94 శాతం వాటా కుషాక్దే కావడం విశేషం.
అయితే 2023-24 నుంచి అమ్మకాలు తగ్గుముఖం పట్టాయి. ఆ ఏడాదిలో 23,396 యూనిట్లు అమ్ముడవగా, 2024-25లో 17,363 యూనిట్లకు పడిపోయాయి. 2025-26లో పరిస్థితి మరింత బలహీనమై కేవలం 10,191 యూనిట్లు మాత్రమే విక్రయించింది. దీంతో స్కోడా మొత్తం ఎస్యూవీ అమ్మకాలలో కుషాక్ వాటా గణనీయంగా తగ్గింది.
ఈ ఏడాది మళ్లీ వేగం
అయినప్పటికీ, తాజా అప్డేటెడ్ కుషాక్ మార్కెట్లో మళ్లీ పుంజుకుంటున్న సంకేతాలు కనిపిస్తున్నాయి. 2026 మార్చి నుంచి మే మధ్యకాలంలో దేశవ్యాప్తంగా డీలర్షిప్లకు 5,468 యూనిట్లను పంపిణీ చేసింది. గత ఏడాది ఇదే కాలంతో పోలిస్తే ఇది 135 శాతం వృద్ధి కావడం విశేషం.
ఇంజిన్ ఆప్షన్లు
ఇంజిన్ ఎంపికల విషయానికి వస్తే స్కోడా కుషాక్ రెండు టర్బో పెట్రోల్ ఇంజిన్ ఆప్షన్లతో అందుబాటులో ఉంది.
1.0 లీటర్ 3 సిలిండర్ TSI ఇంజిన్ 115 hp పవర్ & 178 Nm టార్క్ను ఉత్పత్తి చేస్తుంది. దీనికి 6-స్పీడ్ మాన్యువల్ లేదా కొత్త 8-స్పీడ్ టార్క్ కన్వర్టర్ ఆటోమేటిక్ గేర్బాక్స్ ఎంపికతో అందుబాటులో ఉంది.
1.5 లీటర్ 4 సిలిండర్ TSI ఇంజిన్ 150 hp పవర్ & 250 Nm టార్క్ను అందిస్తుంది. ఈ వేరియంట్కు 7-స్పీడ్ డ్యూయల్ క్లచ్ ఆటోమేటిక్ గేర్బాక్స్ను జత చేశారు.
హ్యుందాయ్ క్రెటా, మారుతి గ్రాండ్ విటారా, కియా సెల్టోస్ వంటి బలమైన ప్రత్యర్థుల మధ్య పోటీని ఎదుర్కొంటూనే లక్ష అమ్మకాల మైలురాయిని చేరుకోవడం స్కోడా కుషాక్కు ఒక కీలక విజయంగా చెప్పవచ్చు. తాజా అప్డేట్లు & పెరుగుతున్న డీలర్ నెట్వర్క్తో రానున్న రోజుల్లో ఈ ఎస్యూవీ అమ్మకాలు మరింత పెరిగే అవకాశాలు కనిపిస్తున్నాయి.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
