Nitrogen In Car: టైర్లలో నైట్రోజన్ నింపితే మైలేజ్ పెరుగుతుందా? పంక్చర్లు తగ్గుతాయా? నిపుణుల సమాధానం ఇదే
కారు టైర్లలో నైట్రోజన్ నింపడం వల్ల నిజంగా ప్రయోజనాలున్నాయా? సాధారణ గాలి & నైట్రోజన్ మధ్య తేడాలు, లాభాలు, నష్టాలు, ఏది ఉత్తమ ఎంపికో పూర్తి వివరాలు తెలుసుకోండి.
Nitrogen vs regular air for car tyres: కారు గురించి జరిగే చర్చల్లో ఒకటి - టైర్లలో నైట్రోజన్ నింపాలా లేదా సాధారణ గాలి సరిపోతుందా అన్నది. నైట్రోజన్ వాడితే పంక్చర్లు తగ్గుతాయని, మైలేజ్ పెరుగుతుందని, టైర్ల జీవితం ఎక్కువ అవుతుందని చాలా మంది నమ్ముతుంటారు. ఇది కేవలం మార్కెటింగ్ ప్రచారమేనని మరికొందరు భావిస్తారు. మరి నిజంగా కారు టైర్లకు ఏది ఉత్తమం? ఈ అంశాన్ని వివరంగా పరిశీలిద్దాం.
నైట్రోజన్ & సాధారణ గాలి మధ్య తేడా ఏమిటి?
మనం సాధారణంగా టైర్లలో నింపే గాలిలో సుమారు 78 శాతం నైట్రోజన్, 21 శాతం ఆక్సిజన్ ఉంటాయి. మిగిలిన భాగంలో కార్బన్ డైఆక్సైడ్, ఆర్గాన్, నియాన్, హీలియం వంటి ఇతర వాయువులు ఉంటాయి. అయితే టైర్ల కోసం ప్రత్యేకంగా అందించే నైట్రోజన్ దాదాపు 100 శాతం స్వచ్ఛమైన నైట్రోజన్ వాయువు. ఇందులో ఆక్సిజన్ లేదా తేమ ఉండదు. అందువల్ల ఇది పొడిగా ఉండే వాయువుగా పరిగణిస్తారు.
నైట్రోజన్ వల్ల కలిగే ప్రయోజనాలు
నైట్రోజన్లో తేమ లేకపోవడం వల్ల టైర్ ప్రెజర్ ఎక్కువ స్థిరంగా ఉంటుంది. సాధారణ గాలిలో ఉండే తేమ వేడి కారణంగా ఆవిరిగా మారి టైర్ ప్రెజర్లో హెచ్చుతగ్గులకు కారణమవుతుంది. ప్రత్యేకించి ఎక్కువ దూరం హైవే ప్రయాణాలు చేసే సమయంలో టైర్ల ఉష్ణోగ్రత పెరుగుతుంది. అలాంటి పరిస్థితుల్లో నైట్రోజన్ నింపిన టైర్లు మరింత స్థిరమైన పనితీరును చూపిస్తాయి.
ఇంకో ముఖ్యమైన అంశం ఏమిటంటే, నైట్రోజన్ అణువులు ఆక్సిజన్ అణువుల కంటే కొంచెం పెద్దవిగా ఉంటాయి. అందువల్ల టైర్ నుంచి గాలి బయటకు లీక్ అయ్యే వేగం తక్కువగా ఉంటుంది. దీంతో టైర్ ప్రెజర్ ఎక్కువకాలం నిలిచి ఉంటుంది.
అలాగే సాధారణ గాలిలోని తేమ కారణంగా వీల్ రిమ్లపై తుప్పు పట్టే అవకాశం ఉంటుంది. నైట్రోజన్ వాడితే ఈ సమస్య కొంతవరకు తగ్గుతుంది.
నైట్రోజన్ వాడడంలో ఉన్న నష్టాలు
నైట్రోజన్ వాడకం వల్ల ప్రయోజనాలు ఉన్నప్పటికీ కొన్ని పరిమితులు కూడా ఉన్నాయి. ముఖ్యంగా ఇది ఉచితంగా అందుబాటులో ఉండదు. సాధారణ గాలిని చాలా పెట్రోల్ బంక్లలో ఉచితంగా నింపుకోవచ్చు.
నైట్రోజన్ నింపడానికి సాధారణంగా రూ.150 నుంచి రూ.200 వరకు ఖర్చవుతుంది. ప్రతి టాప్-అప్కు కూడా అదనపు వ్యయం ఉంటుంది.
మరో సమస్య - అన్నిచోట్లా అందుబాటులో లేకపోవడం. నగరాల్లో నైట్రోజన్ స్టేషన్లు ఎక్కువగా ఉన్నప్పటికీ గ్రామీణ ప్రాంతాలు, కొత్త ఎక్స్ప్రెస్వేలు లేదా దూర ప్రాంతాల్లో వీటి లభ్యత పరిమితంగా ఉండొచ్చు. అలాంటి సందర్భాల్లో టైర్ గాలి తగ్గితే సాధారణ గాలిని నింపాల్సి వస్తుంది. ఇలా నైట్రోజన్ & సాధారణ గాలి కలవడం వల్ల నైట్రోజన్ ప్రయోజనాలు క్రమంగా తగ్గిపోతాయి.
నైట్రోజన్ వల్ల మైలేజ్ పెరుగుతుందా?
టైర్లలో నైట్రోజన్ నింపితే మైలేజ్ భారీగా పెరుగుతుందని, పంక్చర్లు రాకుండా ఉంటాయని, టైర్లు వేడెక్కవని చాలామంది భావిస్తుంటారు. అయితే ఇవి పూర్తిగా నిజం కావు.
నైట్రోజన్ అనేది టైర్ ప్రెజర్ను స్థిరంగా ఉంచడంలో సహాయపడుతుంది. కానీ మైలేజ్లో గణనీయమైన పెరుగుదల, పంక్చర్ల నివారణ లేదా టైర్ల జీవితకాలంలో అద్భుతమైన మార్పు తీసుకురాదని నిపుణులు చెబుతున్నారు.
ఎప్పుడు నైట్రోజన్ వాడాలి?
మీరు తరచుగా హైవే ప్రయాణాలు చేస్తుంటే లేదా అధిక వేగంతో ఎక్కువ దూరాలు ప్రయాణిస్తుంటే నైట్రోజన్ ఒక మంచి ఎంపిక కావచ్చు. రేసింగ్ ట్రాక్లు, మోటార్ స్పోర్ట్స్ & ఏరోస్పేస్ రంగాల్లో నైట్రోజన్ వాడటానికి ఇదే కారణం. అయితే, రోజువారీ నగర ప్రయాణాలు, సాధారణ వినియోగం కోసం సాధారణ గాలి పూర్తిగా సరిపోతుంది.
తుది మాట
టైర్ల ఆరోగ్యం విషయంలో నైట్రోజన్ కంటే ముఖ్యమైనది సరైన మెయింటెనెన్స్. క్రమం తప్పకుండా టైర్ ప్రెజర్ చెక్ చేయడం, వీల్ అలైన్మెంట్ చేయించడం, టైర్ రొటేషన్ పాటించడం & జాగ్రత్తగా డ్రైవ్ చేయడం ద్వారా టైర్ల జీవితకాలాన్ని పెంచుకోవచ్చు.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
Before You Go
Auto Expo 2023 Day 1 Highlights: ఎంతో హైప్ తో మొదలైన ఆటో ఎక్స్ పో మొదటి రోజు హైలైట్స్
టాప్ హెడ్ లైన్స్
ట్రెండింగ్ వార్తలు
