రాయల్ ఎన్‌ఫీల్డ్ లైట్‌వింగ్ హెల్మెట్ రివ్యూ - స్టైల్, సేఫ్టీ, కంఫర్ట్ ఎలా ఉన్నాయి?

రూ.4,500 ధరలో అందుబాటులో ఉన్న రాయల్ ఎన్‌ఫీల్డ్ లైట్‌వింగ్ మాడ్యులర్ హెల్మెట్ ఎలా ఉంది? భద్రత, సౌకర్యం, నిర్మాణ నాణ్యత, వెంటిలేషన్, లోపాలు & ప్రత్యేకతలపై పూర్తి రివ్యూ.

తెలుగులో ఆటోమొబైల్‌ వార్తలు

Source : https://x.com/

Royal Enfield Lightwing Helmet: బైక్ రైడింగ్‌లో హెల్మెట్ అనేది కేవలం చట్టపరమైన అవసరం మాత్రమే కాదు, ప్రాణాలను కాపాడే అత్యంత కీలకమైన భద్రత పరికరం కూడా. కాబట్టి.. స్టైల్, భద్రత & సౌకర్యం అన్నీ ఒకే హెల్మెట్‌లో లభిస్తే అది మరింత ఆకర్షణీయంగా ఉంటుంది. రాయల్ ఎన్‌ఫీల్డ్ తాజాగా అందిస్తున్న లైట్‌వింగ్ మాడ్యులర్ హెల్మెట్ కూడా అలాంటి ఉత్పత్తిగానే కనిపిస్తోంది. రూ.4,500 ధరతో అందుబాటులో ఉన్న ఈ హెల్మెట్ రోజువారీ నగర ప్రయాణాలకు ఎంత వరకు ఉపయోగపడుతుందో చూద్దాం.

హాఫ్ ఫేస్ హెల్మెట్ నుంచి ఈ మాడ్యులర్ హెల్మెట్‌కు మారిన వెంటనే మొదటగా గుర్తించే అంశం దీని బరువు. సుమారు 1,475 గ్రాముల బరువుతో ఇది సాధారణ హాఫ్ ఫేస్ హెల్మెట్ కంటే కొంచం ఎక్కువ బరువు అనిపిస్తుంది. మొదటి కొన్ని రోజులు ఈ తేడా స్పష్టంగా తెలిసినా, వారం రోజుల పాటు నిరంతరం ఉపయోగించిన తర్వాత ఆ బరువుకు అలవాటు పడిపోవచ్చు. అదనపు భద్రత & మెరుగైన నిర్మాణ నాణ్యతను పరిగణనలోకి తీసుకుంటే ఈ బరువు పెద్ద లోపంగా అనిపించదు.

ప్లస్‌ పాయింట్లు
నిర్మాణ నాణ్యత విషయానికి వస్తే లైట్‌వింగ్ హెల్మెట్ మంచి మార్కులు సాధిస్తుంది. దీని బలమైన షెల్ మీకు నమ్మకాన్ని కలిగిస్తుంది. మ్యాట్ బ్లాక్ & ఎల్లో రంగుల కలయిక ఆకర్షణీయంగా కనిపించడమే కాకుండా, ఎండ తీవ్రంగా ఉన్న వాతావరణంలో కూడా రంగు వెలిసిపోకుండా నిలబడటం దీని నాణ్యతను తెలియజేస్తుంది.

ఇది కూడా చదవండి: నీళ్లలో కారు మునిగిపోతే పొరపాటున కూడా ఈ తప్పులు చేయవద్దు, ఇన్సూరెన్స్ రాదు

ఈ హెల్మెట్‌లో డబుల్ D రింగ్‌కు బదులుగా ర్యాచెట్ స్ట్రాప్‌ను కంపెనీ అందించింది. కొంతమంది రైడర్లకు ఇది పెద్దగా నచ్చకపోవచ్చు. అయితే రోజువారీ నగర ప్రయాణాలకు ఉపయోగించే వారికి ఇది పెద్ద సమస్యగా అనిపించదు. తక్కువ సమయంలో హెల్మెట్ ధరించడం & తీసేయడం సులభంగా ఉండటం దీని ప్లస్‌ పాయింట్‌.

ఇందులో ఉన్న ఇంటిగ్రేటెడ్ సన్ వైజర్ మరో ప్రధాన ఆకర్షణ. ఎండ తీవ్రంగా ఉండే ప్రాంతాల్లో ప్రయాణించే వారికి ఇది ఎంతో ఉపయోగపడుతుంది. కళ్లజోడు ధరించే వారు కూడా ఎలాంటి ఇబ్బంది లేకుండా సన్ వైజర్‌ను ఉపయోగించుకోవచ్చు. నగర ట్రాఫిక్‌లో ప్రయాణించే సమయంలో మాడ్యులర్ డిజైన్ కారణంగా ఓపెన్ ఫేస్ మోడ్‌లో కూడా దీనిని ఉపయోగించుకునే అవకాశం ఉంది.

అయితే వేసవి కాలంలో పూర్తిగా క్లోజ్డ్ ఫుల్ ఫేస్ మోడ్‌లో ఎక్కువసేపు ఉపయోగిస్తే వెంటిలేషన్ కొంత పరిమితంగానే అనిపిస్తుంది. అడ్జస్టబుల్ వెంట్లు ఉన్నప్పటికీ, ట్రాఫిక్‌లో ప్రయాణించే సమయంలో, హాఫ్ ఫేస్ హెల్మెట్‌తో పోలిస్తే గాలి ప్రవాహం తక్కువగా ఉంటుంది. అయితే మాడ్యులర్ హెల్మెట్లలో ఇది సాధారణ లక్షణమే.

ఇది కూడా చదవండి: E85 ఇంధనంతో నడిచే ఫ్లెక్స్-ఫ్యూయల్ బైక్‌ Yamaha FZ Blue వచ్చేసింది.. ధర, ఫీచర్లు ఇవే

సౌకర్యం విషయంలో మాత్రం ఈ హెల్మెట్ ఆకట్టుకుంటుంది. లోపలి ప్యాడింగ్ మృదువుగా ఉండటంతో ఎక్కువసేపు ప్రయాణించినా అసౌకర్యం అనిపించదు. అంతేకాకుండా ప్యాడింగ్‌ను సులభంగా తీసి శుభ్రం చేసుకునే అవకాశం ఉండటం డైలీ యూజర్లకు ఉపయోగకరంగా ఉంటుంది.

లోపాలు కూడా...
అయితే కొన్ని చిన్న లోపాలు కూడా ఉన్నాయి. హెల్మెట్ లాకింగ్ మెకానిజం కొన్నిసార్లు సరిగ్గా లాక్ కావడానికి అన్‌లాక్ బటన్‌ను నొక్కి ఉంచాల్సి వస్తుంది. అలాగే వైజర్‌ను తొలగించడం సులభమే అయినప్పటికీ తిరిగి అమర్చేటప్పుడు కొంత సమయం పట్టే అవకాశం ఉంది. గంటకు సుమారు 70 km వేగం వరకు గాలి శబ్దం బాగా నియంత్రణలో ఉంటుంది. అంతకంటే ఎక్కువ వేగంలో దీని పనితీరుపై స్పష్టమైన సమాచారం అందుబాటులో లేదు.

మొత్తంగా చూస్తే రూ.4,500 ధరలో రాయల్ ఎన్‌ఫీల్డ్ లైట్‌వింగ్ మాడ్యులర్ హెల్మెట్ మంచి విలువను అందించే ఉత్పత్తిగా చెప్పవచ్చు. స్టైలిష్ డిజైన్, బలమైన నిర్మాణం, సౌకర్యవంతమైన ప్యాడింగ్, ఉపయోగకరమైన సన్ వైజర్ వంటి అంశాలు దీనిని నగర ప్రయాణాలకు అనువైన ఎంపికగా నిలబెడుతున్నాయి. వెంటిలేషన్ & లాకింగ్ మెకానిజంలో చిన్న లోపాలు ఉన్నప్పటికీ, ఈ ధరలో భద్రతతో పాటు నాణ్యమైన మాడ్యులర్ హెల్మెట్ కోరుకునే వారికి ఇది పరిశీలించదగ్గ ఆప్షన్.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.

మరిన్ని చదవండి

పవర్ ఎక్కువైతే మైలేజ్ తగ్గుతుందా? రెనాల్ట్ డస్టర్ 1.0 - 1.3 రియల్‌ వరల్డ్‌ మైలేజ్‌ టెస్ట్‌ ఫలితాలు ఇవే!

దేశవ్యాప్తంగా ఇక E20 పెట్రోల్‌ ఒక్కటే - ప్యూర్ పెట్రోల్‌, E10కి కేంద్రం గుడ్‌బై!